އިހުސާސްތަކާއި ޖަޒުބާތުތަކަކީ ހަމަ ކޮންމެ މީހަކުވެސް، އެމީހެއްގެ ހަޔާތުގައި ތަޖުރިބާ ކުރަންޖެހޭ ކަންކަމެވެ. އެކިއެކި އިހުސާސްތަކަށް އެކި މީހުން ޖަވާބުދޭނީ އެކި ގޮތަށެވެ. ހިތާމައާއި ވޭނުގެ އިހުސާސްތަކަކީ ދެރައާއި މާޔޫސްކަން ކުރިމަތިކުރުވާ އިހުސާސްތަކެކެވެ. އަދި އެ ދެރައާއި މާޔޫސްކަމުގައި ހިތާމަކޮށް ރޮވޭފަދަ އިހުސާސްތަކެކެވެ.
ބައެއް މީހުންނީ އެމީހުންގެ ލޮލުން ރޯ ބައެކެވެ! އަނެއްބައި މީހުން ރޮަނީ އެމީހުންގެ ހިތުންނެވެ. އަދި އަނެއްބައި މީހުންނީ ލޮލާއި ހިތުން ރޯ މީހުންނެވެ. މި ތިންބައިމީހުންގެ ތަފާތަކީ ކޮބާ ހެއްޔެވެ؟
ހަމައެކަނި ލޮލުން ރޯ މީހުންނަކީ ގިނަފަގަރަށް ކަންދައްކަން ރޯ މީހުންނެވެ. އެމީހުންގެ ހިތުގައި މާބޮޑު އިހުސާސް ތަކެއް ނުވާނެއެވެ. ވަކި މަގުސަދެއް ހާސިލް ކުރުމަށް ނުވަތަ ކަމި ކަމެއް ކުރުމަށް އެމީހުން ގެންގުޅޭ އުކުޅެއް ކަމުގައި މިކަން ވެގެން ދެއެވެ. މޫނުމަތީގެ ކުލަވަރު ބަދަލުކޮށްލާ ދެލޮލުން ކަރުނަތައް ފާއްދާލަނީ ހިތުގައި ވޭނީ އެއްވެސް އިހުސާސެއް ނެތިއެވެ.
ހަމައެކަނި ހިތުން ރޯ މީހުންނަކީ ވަރަށް ކެތްތެރި ބައެކެވެ. އެމީހުން ވަނީ ވަރަށް ބޮޑަށް ހިތުގައި ޖެހިފައެވެ. އެމީހުންނަށް ވަނީ ވަރަށް ބޮޑަށް އަސަރުކޮށްފައެވެ. ނަމަވެސް އެމީހުން އެކަން އެހެން މީހުންނަށް ދައްކާކަށް ބޭނުމެއް ނުވެއެވެ. އެއީ އެކަމުގެ ސަބަބުން އެހެން މީހެއްގެ ދިރިއުޅުމަށް އަސަރެއް ކޮށްފާނެތީއެވެ. އެބައިމީހުން އެ އިހުސާސްތައް ހިތުގައި ފޮރުވާ މޫނުމަތިން ދައްކާނީ ހިނިތުންވުމެކެވެ. އެ ހިނިތުންވުމަކީ އެހެން މީހުންގެ ލޯމަތީގައި އުފާވެރި ހިނިތުންވުމެކެވެ. ނަމަވެސް ހަގީގަތަކީ އެ ހިނިތުންވުމުގައި ފޮރުވިފައި ހިތްދަތި އިހުސާސް ތަކެކެވެ. އެމީހުންގެ ހިތް އެ ދަނީ ރޮމުންނެވެ. އެހެނަސް އެކަން އެހެން މީހުންނަކަށް ނޭނގޭނެއެވެ.
ދެން އޮތީ ހިތާއި ލޮލުން ރޯ މީހުންނެވެ. މިއީ އެންމެ ގިނަ މީހުންނަށް ރޮވޭ ގޮތެވެ. ހިތްދަތިވާ ކަމެއް ދިމައިވުމުން، އެ ހިތްދަތިކަމުގައި ހިތުން ރޮވޭ ހާލު، ލޮލުން އެ މަންޒަރު އެހެން މީހުންނަށް ފެންނާނެއެވެ.
ރުއިމުގެ މައިގަނޑު ތިން ވައްތަރަކީ މިއީއެވެ. މިތަނުން އަހަރެމެންނަށް ރޮވެނީ ކޮން ގޮތަކަށް ހެއްޔެވެ؟ ތިބާއީ ކިހިނެއް ރޯ މީހެއް ހެއްޔެވެ؟
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން