އަހަރެމެން ފެންނަނީ ކަމަކު ޖެހުނީމައޭ، މިއީ ވަރަށްގިނަ މީހުން ބުނާ ޖުމުލައެކެވެ. ވަރަށްގިނަ މީހުންގެ ހިތުގެ ވޭނީ ިއިހުސާސެކެވެ. އާދޭހެވެ! ހަމަ ހަގީގަތުގައިވެސް އަހަރެމެން ފެންނަނީ ކަމަކު ޖެހުނީމައެވެ. މިއީ ވަރަށްބޮޑު ތެދެކެވެ. އެކަމަކު އަހަރެމެންގެ ބޭނުން ހިފާ މީހުން މިކަންކަން މި މަގަކުން ގަބޫލެއް ނުކުރެއެވެ. އަދި މިކަންކަން މިހެން ހިނގާ ކަމަކަށްވެސް ނުވެއެވެ.
ދައްކަން މިއުޅެނީ ސިޔާސީ މީހުންގެ ވާހަކައޭ ހިތަށް އަރާފާނެއެވެ. އެހެނީ އެބައިމީހުންގެ ގިނަބައެއްގެ އަމަލުތައް ހުންނަނީ މި މަގުން ކަމުގައި ވާތީއެވެ. ނަމަވެސް ދައްކަން މިއުޅެނީ ސިޔާސީ މީހުންގެ ވާހަކައެއް ނޫނެވެ. ސިޔާސީ މީހުން އުޅޭ ގޮތަކީ ބަޔަކަށް ނޭނގޭ ކަންކަމެއް ނޫނެވެ.
ދައްކަން މިއުޅެނީ ވިޔަފާރިވެރިންގެ ވާހަކައެވެ. ވިޔަފާރިތައް ފުޅާކުރާން މަަސައްކަތްކުރާ ވިޔަފާރިވެރިންގެ ވާހަކައެވެ. އަދި ކަންނުވެ ނަންވާ މީހުންގެ ވާހަކައެވެ.
ވިޔަފާރިތައް ފުޅާކޮށް ފެތުރުމަށްޓަކައި ވިއްކާނެ ރީތި ނަމަކާއި ދައްކާނެ ރީތި މަންޒަރެއް އެބައިމީހުން ހޯދާނެއެވެ. އެގޮތުން އެ ދުވަސްކޮޅު، ވަރަށް އިޖްތިމާއީ ކަންކަމާވެސް ވެގެން އުޅޭނެއެވެ. ތަންތަނަށް އެހީވެސް ވާނެއެވެ. އާއިލާ މީހުންނާއި ރައްޓެހިންވެސް ވަރަށް ގިނަ ވާނެއެވެ. އެމީހުން ވަރަށް ގާތްވެސް ވާނެއެވެ. އެކި އެކި ދިމަ ދިމާލުން ވަކަރަށް ޖަހާނެއެވެ. އާރުލާ ދައްކުވާވަރު ކުރާނެއެވެ. ދެން އެ ހޯދަނީ އެ ވިޔަފާރީގައި ކުރިއެރުމެވެ. އެ ފުޅާކޮށް ބޮޑުކޮށްލީ ކުރަމުން އައި ވިޔަފާރިއެވެ. ދެން އަހަރެމެންނެއް ނުފެންނާނެއެވެ. ގައިގައި ލައިގަތީމަވެސް ނުފެންނަ ވާހަކައެއް ނޫނެވެ. އޭރުގައި އެ ދެކުނު ގޮތަކަށް އަދި އެ ގޮތަކާއި ގާތަށްވެސް ނުފެންނާނެއެވެ. މިއީ ކަން ހިނގާ ގޮތެވެ. ހަމަ ހަގީގަތެވެ. އެމީހުން އެ ބޭނުންވި ކަމެއް އެ ކުރެވުނީތާއެވެ. ކަމަކު ޖެހުނީމާ އަހަރެމެން ފެނުނުތާއެވެ. އެކަމެއްވެ، އެބަޔަކަށް ތަނަވަސްކަން ލިބުމުން އަހަރެމެން ދަންނަ ކަމަށްވެސް ނުހެދިތާއެވެ.
ދެންއޮތީ ކަންނުވެ ނަންވާ މީހުންނެވެ. އެމީހުން ނަންވާން ބޭނުންވުމުން، އަހަރެމެން ފެނެއެވެ. އެއީ ކަން ކުރާށެވެ. މިފަދަ މީހުން، އަހަރެމެން ލައްވާ އެތައް ކަމެއް ކުރުވާނެއެވެ. ހައްޓަށް ބުރަ ނޫނަސް ކިތައްމެ ކަމެކެވެ. އެކަންކަމުން ފައިދާ އެ ނަގަނީ އެމީހުންނެވެ. ދޮގެއްވާ ނޫނެވެ. އަހަރެމެންނަށްވެސް ވަކި ގެއްލުމެއް ވަނީކީއެއް ނޫނެވެ. އެކަމަކު އެމީހުންގެ މަގުސަދު ހާސިލް ވެ، އެމީހުންގެ ނަން ވިކުމުން، ދެން އަހަރެމެންގެ ބޭނުމެއް ނޯންނާނެތާއެވެ. ދެން އަހަރަމެންނަށް ވަނީ ކީއްތޯވެސް ބަލައެއް ނުލާނެއެވެ. އެހެނަސް އެބައިމީހުންނަށް އެނގެއެވެ. މާދަމާވެސް އެބައިމީހުން ކަމަކު ބުނެފިނަމަ، އަހަރެމެން ކޮށްދޭނެއެވެ.
މިކަން މިމަގުން ހިނގާކަމީ، ބައެއް އިންސާނުން އަނެއް އިންސާނުންގެ ނާޖާއިޒް ފައިދާ ކަމެވެ. އިންސާނުންގެ ބޭނުން ނަހަމަ ގޮތުގައި ހިފާކަމެވެ. މިއީ ހިތާމަ ހުރި ކަމެކެވެ. ތަަނަވަސްކަން ބޭނުންވާނީ ތިމާ އެކަންޏެއް ނޫނެވެ. ރީތި ނަމެއްވެސް އެދޭނީ ހަމަ ތިމާ އެކަންޏެއް ނޫނެެެވެ. ނުވަތަ ތިމަތިމާމެންނެއްވެސް ނޫނެވެ. ހަމަ ކޮންމެ މީހަކުވެސް އެކަންކަން އެދޭނެއެވެ. އެހެންކަމުން ކަމަކު ޖެހުނީމާ އަހަރެމެން ފެންނަ ބަޔަކަށް ތިމާމެން ނުވާށެވެ. އަބަދުވެސް އަހަރަމެން ދެކިގެން ތިބޭށެެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން