"ފަހެ، ނަރަކައިން އެއްކިބާކުރައްވައި، ސުވަރުގެޔަށް ވެއްދެވި މީހާ (ދަންނާށެވެ!) ފަހެ، އެ މީހަކު ނަޞީބު ލިބިގެންފިކަން ކަށަވަރެވެ." (އާލުޢިމްރާން: 185 ވަނަ އާޔަތުގެ މާނަ) މި އާޔަތުން ދޭހަވާ ގޮތުގައި ކާމިޔާބަކީ ނަރަކައިން މުއްތިކުރެވެ ސުވަރުގެއަށް ވެއްދެވުމެވެ. އެހެންކަމުން ނަރަކައިން ދިންނަވައިތޯ ދެންނެވުން ގިނަކުރަން ވާނެއެވެ. ބުއްދީގެ އަހުލުވެރިންނަކީ އެކަމަށް އެދި ﷲގެ ޙަޟްރަތުގައި ދަންނަވާ މީހުންނެވެ.
ބުއްދިވެރިންނަކީ ކޮބައިބާއެވެ؟ "އެއުރެންނީ، ކޮޅަށް ތިބެގެންނާއި، އިށީނދެ ތިބެގެންނާއި، އޮށޯވެ ތިބެގެން، ﷲ ހަނދުމަކޮށް، އުޑުތަކާއި ބިން ހެއްދެވުމާ މެދު، ފިކުރުކޮށް އުޅޭ މީހުންނެވެ. (އެއުރެން ދަންނަވާނެތެވެ.) އަޅަމެންގެ ވެރިރަސްކަލާކޮ! އިބަރަސްކަލާނގެ މި ތަކެތި ހައްދަވައިފައި ވަނީ، ބާޠިލް ގޮތެއްގައެއް ނޫނެވެ. އިބަރަސްކަލާނގެ ހުސްޠާހިރުވަންތަކަމާއެވެ! ފަހެ، ނަރަކައިން އަޒާބުން އަޅަމެން ދިންނަވާނދޭވެ! (ޢާލުޢިމްރާން: 191 ވަނަ އާޔަތުގެ މާނަ)
ނަރަކައިގެ ވޭންދެނިވި އަޒާބަކީ އެ ތަނުގެ އަހުލުވެރީންގެ މައްޗަށް ނުޖެހި ނުދާނެ އެއްޗެކެވެ. އެ ނަރަކައަށް ހުށަހެޅޭ ކޮންމެ މީހަކީ ނިކަމެތިކަން އިހުސާސް ކުރަން ޖެހޭނޭ މީހެކެވެ. އަދި އޭނާ އަށް ލިބޭ ނިކަމެތިކަމަކީ އެންމެ ބޮޑު ނިކަމެތިކަމެވެ. އެއީ ﷲ އޭނާ ނިކަމެތި ކުރައްވާ ނިކަމެތި ކުރެވުމެކެވެ. ދެން އެއަށްވުރެ ބޮޑު ނިކަމެތިކަމެއް އޮންނާނެތޯއެވެ؟ އެ ނިކަމެތިކަމުން ސަލާމަތްކުރައްވައިތޯ ﷲ އަށް ދަންނަވާށެވެ!
"އަޅަމެންގެ ވެރިރަސްކަލާކޮ! ހަމަކަށަވަރުން، އިބަރަސްކަލާނގެ ނަރަކަޔަށް ވައްދަވައިފިމީހާ، ފަހެ، އިބަރަސްކަލާނގެ އެ މީހަކު ނިކަމެތި ކުރައްވައިފިކަން ކަށަވަރެވެ. އަނިޔާވެރިން ނަޞްރު ދޭނެ އެއްވެސް ބަޔަކު ނުވެއެވެ." (ޢާލުޢިމްރާން: 192 ވަނަ އާޔަތުގެ މާނަ) ﷲ ނޫން އެހެން އެއްވެސް ފަރާތެއްގައި ދަންނަވައިގެން ނަރަކައިން މިންޖު ނުވާހުއްޓެވެ. ނަޞްރެއް، ކާމިޔާބެއް، ފަލާޙެއް، އަދި ޝަފާޢަތެއް ވިޔަސް ނުލިބޭ ހުއްޓެވެ.
"އަޅަމެން ވެރިރަސްކަލާކޯއެވެ! ދުނިޔޭގައި ވެސް ހެޔޮކަން އަދި އާޚިރަތުގައި ވެސް އަޅަމެންނަށް ދެއްވާނދޭވެއެވެ. އަދި ނަރަކައިގެ އަޒާބުން އަޅަމެން ދިންނަވާނދޭވެ!" (އަލް-ބަޤަރާ: 201 ވަނަ އާޔަތުގެ މާނަ) މިފަދަ ދުޢާތައް ދޫމައްޗަށް ފަރިތަކޮށް ނަރަކައިން ސަލާމަތް ވޭތޯ ދަންނަވާށެވެ!
މުސްލިމުންނަކީ ސުވަރުގެ ވަނުމުގެ ނިޢުމަތް ލިބޭ މީހުންނެވެ. އެހެނަސް ދުނިޔޭގައި ގޯސްކޮށް އުޅެ ނުބައި ޢަމަލު ކުޅަ ނަމަ އެ ކުޅަ ނުބައި ޢަމަލުތަކަށް ސަޒާ ދެއްވުމަށް ނަރަކައަށް ވައްދައިފައި މެނުވީ ސުވަރުގޭގެ ނިޢުމަތްތައް ނުދެއްވާ ހުއްޓެވެ. ﷲ އިރާދަކުރެއްވި އަޅަކަށް މެނުވީއެވެ.
"ސައްޔިދުލް ޚައިރާތީ" އޭ ކިޔުނު ފޮތުގައި އިބްނުލް ޖައުޒީ ރަހިމުﷲ ލިޔުއްވައިފައި އޮތް ދުޢާފުޅެއްގައި އޮންނަނީ އަންނަނިވި ފަދައިންނެވެ. "އޭ ހައްދަވައި ގެންގުޅުއްވާ އިލާހެވެ. ނަރަކައިގެ އަލިފާނުން މި ނިކަމެތި އަޅާ މިންޖުކުރައްވާނދޭވެ! ސުވަރުގެ ދެއްވުން އެދި ދަންނަވާވަރުގެ މީހަކު ކަމުގައި މި އަޅާ ނުވަމުއެވެ."
(ނަރަކައިން ދިންނަވައިތޯ ދަންނަވާށެވެ! - އައްޝެއިޚް މުޙައްމަދު އަފްޟަލް؛ ދީނުގެ މަގު، އަހަރު 3، އަދަދު 11، ޞ.1 – 10 މާރިޗް 2023)
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން