ރަމަޟާންމަހު ރޯދަ ހިފަންވީ ހަށިގަނޑުގެ ހުރިހާ ގުނަވަނަކުން އިޙްލާޞްތެރި ކަމާއި އެކުގައި ކަމަށް މިއަދުގެ ހުކުރު ޚުތުބާގައި ބުނެފިއެވެ.

''މިއީ ހަޔާތުގެ އެންމެފަހު ރަމަޟާން މަހަށް ވެދާނެ'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނެފައިވަނީ މިރަމަޟާން މަހަކީ ހަޔާތުގައި ބައްދަލުވާނެ އެންމެފަހު ރަމަޟާން މަސް ކަމަށް ދެކި ނަފްސު އިސްލާހު ކުރުމުގެ އިހްލާސްތެރި ނިޔަތުގައި މިމަހާ ކުރިމަތިލާން ޖެހޭ ކަމަށާއި، މިއީ މާތް ﷲ ތިބާއަށް ދެއްވި މަތިވެރި ނިއުމަތެއް ކަމުގައި ދެކި ހެޔޮގޮތުގައި މިމަހުގެ ބޭނުން ހިފަންޖެހޭ ކަމަށެވެ. ރަމަޟާން މަހު މަތިވެރި ނިދާއަށް އިޖާބަދީ ފާފަތަކުން ތައުބާވެ، ތެދުވެރިކަމާއި އިހްލާސްތެރިކަމާއެކު ހެޔޮކަމާގެން އެމަހުގައި ކުރިއަރައި ދިއުމަށް ޚުތުބާގައި ވަނީ ގޮވާލާފައެވެ.

ޚުތުބާގައި ބުނީ ހެޔޮކަމުގެ މޫސުންތަކުގައި ހެޔޮކަމުގައި އުޅުމަށް ލިބޭ ފުރުސަތަކީ ކުޑަ އަދި އެހާމެ އަގުބޮޑު ހިނދުކޮޅެއް ކަމަށެވެ. ޚުތުބާގައި ބުނީ އޭގެ އަގު ވަޒަން ކުރެވޭނީ އެފުރުސަތުން މަހްރޫމްވާނެ ވަގުތުކަމުގައިވާ މަރު، އަހަރެމެންނާ ބައްދަލު ކުރުމުން ކަމަށާއި، ހެޔޮކަމުގެ ފުރުސަތުތަކަށް އެދި އިންސާނާ އާދޭސް ކުރާނެ ކަމަށެވެ. އަދި އެދުވަހުން ތައުބާވެ ނަމާދުކޮށް ސަދަގާތްކޮށް، މީސްތަކުންނަށް ހެޔޮފޯރުވާން އޭނާ ކިތަންމެހައި ވެސް ބޭނުންވާނެ ކަމަށާއި، ހެޔޮގޮތުގައި ރަމަޟާން މަހު ރޯދަ ހިފައި ކީރިތި ޤުރުއާން ކިޔަވައި ރޭއަޅުކަން ކޮށް ލައިލަތުލްޤަދްރީގެ މަތިވެރި ސަވާބު ހޯދަން އޭނާ ދަހިވެތިވާނެ ކަމަށެވެ.

މީގެ އިތުރުން ޚުތުބާގައި ބުނީ އެއްހާސް މައްސަރަށްވުރެ ހެޔޮކަން ބޮޑު ލައިލަތުލްގަދްރި ހޯދުމުގެ މަތިވެރި ނިއުމަތުން އެތައް ބަޔަކު މަހްރޫމްވެފައިވާ ކަމަށެވެ. ނަމަވެސް މާތް ﷲ ގެ އޯގާވަންތަކަމުން ތިބާވަނީ އަދި މިދުނިޔޭގައި ކަމަށާއި، މިއީ ތިބާ ތައުބާވުމަށް އޮތް އެންމެ ފަހުގެ ފުރުސަތު ކަމުގައި ވެދާނެ ކަމަށެވެ. އަދި ލައިލަތުލްޤަދްރީގެ މަތިވެރި ސަވާބު ހޯދުމަށް ގަދައަޅައި މަސައްކަތް ކުރުމަށް ޚުތާބާގައި ގޮވާލާފައިވެއެވެ.