މެދުކަނޑާލައިފައި އޮތް މާލެ ސިޓީގެ އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ އަމަލީ މަސައްކަތް މިދިޔަ މަހުގެ ތެރޭގައި އަލުން ފަށައިފައިވާއިރު، މިހާރު ކުރަމުންދަނީ އޭބީސީ ލޭޔަރު ކޮމްޕެކްޓް ކުރުމުގެ މަސައްކަތާއި ދުވާރުގެ މަސައްކަތް ކަމަށް އާރްޑީސީ އިން މިއަދު ބުނެފިއެވެ.
އެގޮތުން، އަމީނީމަގުގައި ކޮނެގެން ކުރަންޖެހޭ މަސައްކަތް މިހާތަނަށް ނިމިފައިވާ ހިސާބުގެ ފަސްގަނޑު ކޮމްޕެކްޓްކޮށް ނިންމާ އެސަރަހައްދުގައި އޭބީސީ ލޭޔަރު އެޅުުމުގެ މަސައްކަތް ފެށީ ރޭގައެވެ.
މި މަޝްރޫޢުގެ ދަށުން، އިއްޔެ ކުރިއަށްދިޔައީ ކާރބް ސްޓޯންޖެހުމާއި ދުވާރުގެ ޕޭވިންގ މަސައްކަތުގެ އިތުރުން މަގުގެ ފަސްގަނޑު އެއްވަރުކޮށް ކޮމްޕެކްޓް ކުރުމުގެ މަސައްކަތެވެ.
ޒަމާނީ ފެންވަރަށް ތަރައްޤީ ކުރަމުން އަންނަ އަމީނީމަގުގެ މަސައްކަތް އެއްކޮށް ނިންމާލެވުމުން، ޒަމާނުއްސުރެ ދިމާވާ ފެންބޮޑުވުމުގެ މައްސަލައަށް ޖުމްލަ ޙައްލެއް ލިބިގެންދާނެއެވެ. އެގޮތުން، މިހާރު ބެހެއްޓިފައި ހުރި ސްޓޯރމް ވޯޓަރ ޕަމްޕްތައް އަޕްގްރޭޑް ކުރެވިގެންދިއުމަކީ އެ މައްސަލައަށް ހައްލު ލިބިގެންދާނެ ކަމެކެވެ.