އއ. މާޅޮސް ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތަށް ބޭނުންވާ ބޮޑުހިލައިގެ ފަސްވަނަ ޝިޕްމަންޓް މިހާރު ޕްރޮޖެކްޓް ސައިޓަށް ގެންދެވިފައިވާ ކަމަށް އެމްޓީސީސީ އިން ބުނެފިއެވެ.
އެމްޓީސީސީން ބުނީ މި މަޝްރޫޢުގެ ދަށުން ސައިޓުގައި މިހާރު ކުރިއަށްދަނީ ޖެޓީގެ ބީމް ޝަޓަރިންގ މަސައްކަތެވެ.
މި މަޝްރޫޢުގެ ދަށުން، 24،335 ކިއުބިކް މީޓަރުގެ ބިން ހިއްކުމާއި ކޮނުމުގެ އޮޕަރޭޝަންތަކާއި، 394 މީޓަރުގެ ކުއީ ފާރެއް ހެދުމާއި، 407 މީޓަރުގެ ބްރޭކްވޯޓަރެއް ހެދުމުގެ އިތުރުން 100 މީޓަރުގެ ރިވެޓްމަންޓެއް ހެދުމާއި، 56 މީޓަރުގެ ގްރޮއިންއެއް ހެދުމުގެ މަސައްކަތް ކުރުމަށް ވަނީ ހަމަޖެހިފައެވެ. އަދި މި މަޝްރޫޢުގެ ދަށުން ކުރުމަށް ހަމަޖެހިފައިވާ އެހެނިހެން މަސައްކަތްތަކުގެ ތެރޭގައި 1970 އަކަމީޓަރުގެ ބަނދަރު ޕޭވްމަންޓް ހެދުމާއި، ރެމްޕެއް ހެދުމާއި، ބަނދަރު ލައިޓްތައް ބެހެއްޓުން ހިމެނެއެވެ.
މިއީ 56.9 މިލިއަން ރުފިޔާގެ މަޝްރޫޢެކެވެ.