ހދ. ހަނިމާދޫ ބަނދަރު ތަރައްޤީކުރުމުގެ މަޝްރޫޢުގެ މަސައްކަތް މި އޭޕްރިލް މަހުގެ 1 ވަނަ ދުވަހު ނިމިފައިވާ ކަމަށް އެމްޓީސީސީ އިން ބުނެފިއެވެ. މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެ ކުންފުންޏާއި ހަވާލުކޮށްގެން ކުރިއަށް ގެންދިޔަ މި މަޝްރޫޢުގެ އަގަކީ 65.15 މިލިއަން ރުފިޔާއެވެ.
2،300 އެއްހާ މީހުން ދިރިއުޅޭ ހދ. ހަނިމާދޫއަކީ އުތުރުގެ އަތޮޅުތަކުގެ ބޮޑު އާބާދީއެއް ވައިގެ ދަތުރުފަތުރު ކުރުމަށް މިހާރުވެސް ބަރޯސާވަމުން އަންނަ ރަށެވެ. ހަނިމާދޫ އެއަރޕޯޓް އިންޓަރނޭޝަނަލް ފެންވަރަށް ތަރައްޤީކުރުމަށް ނިންމާ ސަރުކާރުން މަސައްކަތް ފަށާފައިވަނީވެސް މި ސަބަބަށްޓަކައެވެ. މިއީ އުތުރުގެ ތަރައްޤީއާ ވެސް ގުޅިފައިވާ މުހިންމު ނާރެހަކަށްވާއިރު، އުތުރުގެ ރަށްރަށުން އެކިއެކި ބޭނުމަށް ހަނިމާދޫ އަށް ކޮންމެ ދުވަހަކުހެން ދަތުރުފަތުރުކުރެއެވެ. އެ ރަށުގެ ގިނަ ރައްޔިތުން ވަޒީފާ އަދާކުރާނީ ސަރުކާރުގެ އެކި އެކި މުއައްސަސާތަކުގައާއި ފަތުރުވެރިކަމުގެ ދާއިރާގައެވެ. ނަމަވެސް، ރަށުގައި ކަނޑުމަހުގެ މަސްވެރިކަން ކުރާ 5 އޮޑިފަހަރާއި، އޮޑިފަހަރު ބަނދެ އެހެލުމުގެ މަސައްކަތް ކުރާ 2 ހަރުގެއެއްވެސް ހުރެއެވެ. ހަނިމާދޫ އަކީ ވެސް ލޯކަލް ޓުއަރިޒަމް ކުރިއަރަމުން އަންނަ ރަށަކަށްވުމާއެކު، ރަށުގައި ރަޖިސްޓަރކޮށްގެން ހިންގާ 5 ގެ ސްޓްހައުސްއެއް މިހާރުވެސް އެބަހުއްޓެވެ. އެ ގެސްޓްހައުސްތަކުގެ އެނދުގެ އަދަދު 150 އަށް އަރާނެކަމަށް ކައުންސިލުން ލަފާކުރެއެވެ. ގެސްޓްހައުސް ވިޔަފާރިއާއިއެކު އެ ރަށުގައި ޑައިވިންގ ދޯނިފަހަރު، ލޯންޗް އަދި ޑިންގީތައް ވަނީ ބޮޑުތަނުން އިތުރުވާން ފަށާފައެވެ.
ހަމައެހެންމެ އެ ރަށުގެ ބަނދަރަކީ ކައިރި ރަށްތަކުގެ ގިނަ އޮޑިދޯނި ފަހަރުވެސް އެކި އެކި ބޭނުންތަކަށް ލަފާފުރާ ބަނދަރަކަށްވުމާއެކު، އެ ރަށުގައި އޮތް ބަނދަރު ވަނީ ރަށުގެ ބޭނުންތަކަށް ފުދޭވަރަށްވުރެ ކުޑަވެފައެވެ. އެހެންކަމުން ޖާގަ ތަނަވަސް ޒަމާނީ ބަނދަރަކަށް ކުރީގެ ކުޑަ ބަނދަރު ބަދަލުވެގެން ދިޔުމަކީ މިއަދު ރައްޔިތުންނަށް އެތައް ލުއިފަސޭހައަކާއި، ވަރަށް ބޮޑު އުފަލެއް ލިބޭނެ ކަމެއްކަމުގައި އެ ކުންފުނިން ދެކެއެވެ.
އަދި މި މަޝްރޫޢުގެ ދަށުން ބަނދަރު ތަރައްޤީކޮށް ނިމިފައިވުމާއެކު، ބާރުބޮޑުވެފައިވާ ރަށުގެ ބަނދަރަށް ޖާގައިގެ ތަނަވަސްކަން ލިބި، އިތުރުވަމުންދާ އުޅަނދު ފަހަރަށް ފަސޭހައިން ގާތްކޮށް ލަފާފުރުމުގައި ގިނަ ފަސޭހަތަކެއް މިހާރު ހަނިމާދޫ ރައްޔިތުންނަށާއި ރަށަށް ޒިޔާރަތްކުރާ ފަރާތްތަކަށްވެސް ލިބިގެންދާނެއެވެ.
ވީމާ، ބަނދަރު ތަރައްޤީކުރެވި ފުރިހަމަވެގެންދިޔުމަކީ އިޤްތިސާދީގޮތުން ބެލިކަމުގައި ވިޔަސް މިކަމުގެ ފައިދާ ހަނިމާދޫ އަށާއި އަދި މި ރަށް ކައިރީގައިވާ އެހެނިހެން ރަށްތަކުގެ އަހުލުވެރިންނަށް އިންތިހާއަށް ލިބިގެންދާނެ މުހިއްމު މަޝްރޫޢުއެއް ގޮތުގައި އެ ކުންފުނިން ޤަބޫލުކުރެއެވެ.
މި މަޝްރޫޢުގެ ދަށުން، 19,870 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 6,525 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 310 މީޓަރުގެ ސަރަޙައްދެއްގައި އެއްގަމުތޮށި ލުމާއި، 704 މީޓަރުގެ ސަރަޙައްދެއްގައި ބޭރުތޮށިލުމާއި، 140 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 90 މީޓަރުގެ ސަރަޙައްދެއްގައި ގްރޮއިންސް ޖެހުމާއި، 2,583 އަކަ މީޓަރުގެ ސަރަޙައްދެއްގައި ކޮންކްރީޓް ޕޭވްމަންޓް ހެދުމާއި، ޖެޓީއެއް ހެދުމާއި، ބްރިޖެއް ހެދުމާއި، ރޭމްޕެއް ހެދުމުގެ އިތުރުން ނެރު ބައްތި އާއި ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.
ވޭތުވެދިޔަ 42 އަހަރުތެރޭ އެމްޓީސީސީން ވަނީ ރާއްޖޭގެ އެކި ކަންކޮޅުތަކުގައި ގިނަ މަޝްރޫޢުތަކެއް ނިންމާފައެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްޤީގެ ދަތުރުގެ މުހިއްމު މަރުޙަލާއެއްގައެވެ. އެ ކުންފުނި އުފެދުނީއްސުރެ ރާއްޖޭގެ ޢުމްރާނީ ތަރައްޤީ އާއި އިޖުތިމާޢީ ވަޞީލަތްތައް ބިނާކުރުމުގައި އެމްޓީސީސީން ވަނީ މުހިއްމު ދައުރެއް އަދާކޮށްފައެވެ.