ބަރަވެއްޔަކީ ކަކުނީގެ އާއިލާގެ މެންބަރެކެވެ. އެ އާއިލާގައި ތަފާތު ދިރިއުޅެމެއް އުޅެމުން އަންނަ ބަރަވެއްޔަކީ އެސޮރުގެ ހަޔާތުގައި ބުރަ އަދި ތަކުލީފު ބޮޑު ދުވަސްތަކެއް ގުނަމުންދާ ޖަނަވާރެކެވެ. އެއްގަމާއި ކަނޑުގައި އުޅުމުގެ ގާބިލުކަން ލިބިފައިވާ ބަރަވެލީގެ ހަޔާތުގައި ދަރިމައިވުމާއި، ދުނިޔެއަށް އުފަންވުމާއި އަދި އޭގެފަހުގައި އެސޮރުގެ ހަޔާތް، ހޭދަކުރަމުންދާ ގޮތާއި މެދު ވިސްނާ ފިކުރުކޮށްލުން ކިހިނެއް ވާނެތޯއެވެ؟

ބަރަވެއްޔަކީވެސް އޭގެ ދެ ޖިންސު އެކުލެވޭ އެއްޗެކެވެ. އެގޮތުން އޭގެ ފިރިހެން ބަރަވެލީގެ ދަރިފަނި، އަންހެން ބަރަވަލީގެ ހަށިގަނޑުގައިވާ އާދަޔާހިލާފު ގުނަވަނަކަށް ފޮނުވައިލައެވެ. ގޮނޯޕޮޑް ނަމަކަށް ކިޔާ މި ގުނަވަނުގައި ފިރިހެން ބަރަވެލީގެ ދަރިފަނި ރައްކާ ކުރެވިފައި ހުރެއެވެ. އަދި އަންހެން ބަރަވެލި ދަރިމައިވާ ދުވަސްވަރަށް، ދަރިމައިވުމުގެ ނިޒާމުގެ ތެރެއަށް އެ ދަރިފަނިތައް ދަތުރު ކުރެއެވެ. އެގޮތުން ބަރަވެއްޔަކީ ދަރިމައިވުމާއި އެކު، ބިސް އުފެދޭ ޖަނަވާރެކެވެ. ބަރަވެލީގެ ހަށިގަނޑުގެ ތެރޭގައި ބިސްތައް ތަސައްރަފު ފުދި، ބިސް އަޅަން ވުމުން، މޫދުގެ ވެލިގަނޑު ތެރޭގައި ނުވަތަ ގޮނޑުދޮށު ތެތްފަހުގެ ތެރޭގައި ވަކި ހާއްސަ މަގާމެއް އެސޮރު ހޯދައެވެ. އަދި އެތަނަކަށް އެއްފަހަރާ ހުރިހާ ބިހެއް އަޅައެވެ.

ބަރަވެލި ޖޯޑުވާ އިރުގައްޔާއި ބިސްއަޅާ އިރުގައި އެސޮރުގެ ބޮލިން އެސޮރު ނުކުމެއެވެ. މިގޮތަށް ނުކުމެ ބިސް އަޅާއިރު، ބިސް އެޅުމަށްފަހު، ކުދިކުދި ގާކޮޅުތަކުން ނުވަތަ ފޮތި ވެލިތަކުން އެ ބިސްތައް ހިމާޔަތް ކުރެވޭނޭ ގޮތް އެސޮރު ހަދައެވެ. މިގޮތަށް މި ބިސްތައް އޭގެ މަގާމުގައި ފުނިވަރަކަށް އޮވެ، މަދު ހަފްތާތަކެއްގެ ތެރޭގައި އެ ބިސްތަކުން ބަރަވެލިތައް ނުކުމެއެވެ. ކުދި ސޫފިތަކެއް ގޮތަށް ފުރަތަމަ ސިފަވާ މި ބަރަވެލިތައް އޭގެ އުމުރު ދޮށިވާ ވަރަކަށް އަސްލު ބަރަވެލީގެ ސިފަ ޖެހެން ފަށައެވެ. މިގޮތަށް އުފަންވާ ބަރަވެލިތަކުގައި އެއްވެސް ބޮއްޔެއް ނުހުރެއެވެ. މާނައަކީ ބަރަވެއްޔަކީ އޭގެ ޠަބީއަތުގައި އެސޮރުގެ ހަށިގަނޑުގައި ބޮއްޔެއް ވާ އެއްޗެއް ނޫނެވެ.

ފިރުކި ހިނގެން ފެށޭ ހިސާބުން ބަރަވެލި އެސޮރުގެ ހަށިގަނޑަށް ހެޔޮވަރު "ހިމާޔަތެއް" ހޯދައެވެ. ގިނަފަހަރަށް މިގޮތަށް ބަރަވެލި އިހްތިޔާރު ކުރަނީ ބޮއްޔެވެ. އޭގެ މަސްގަނޑު މަރުވެފައިވާ ބޮލި ބޮއްޔެވެ. ބައެއްފަހަރަށް ބައެއް ބޮލިތަކަށް ހަމަލާ ދިނުމަށްފަހު، އެ ބޮލިތެރޭގައިވާ މަސްގަނޑު ދަމާ ނެރުމަށްފަހުވެސް ބަރަވެލި، ބޮލީގެ ތެރެއަށް ވަދެއެވެ. މިއީ އެހެން ޝިކާރަ ތަކާއި ފިނިހޫނުމިނަށް އަންނަ ބަދަލުތަކުން އެސޮރުގެ ހަށިގަނޑު ހިމާޔަތްކުރުމަށް އެސޮރު ކުރާ ކަމެކެވެ. ބޮއްޔަކީ ބަރަވެލީގެ ހަށިގަނޑިގެ ބައެއް ނޫން ނަމަވެސް އެއީ އެސޮރުގެ ދިރިއުޅުމުގެ އެއް ބައެވެ.

އުމުރުން ދޮށިވުމާއި އެކު ބަރަވެލީގެ ހަށިގަނޑު ބޮޑުވަމުން ދެއެވެ. މިގޮތަށް ބޮޑުވަމުންދާ ވަރަކަށް އެސޮރު ބޭނުން ކުރަމުންދާ ބޮލި ދޫކޮށް ބޮޑު ބޮއްޔަކަށް ވަންނަން ޖެހެއެވެ. އެގޮތުން އެސޮރު ފުރަތަމަ ކުރާ ކަމަކީ ހެޔޮވަރު ބޮއްޔެއް ހޯދުމެވެ. ގިނަފަހަރަށް މިގޮތަށް ހޯދާ ބޮއްޔަކީ ކޮންމެވެސް އެހެން ބަރަވެއްޔެއް ދޫކޮށްލާފައި އޮންނަ ބޮއްޔެކެވެ. މިގޮތަށް އެސޮރަށް ހެޔޮވަރު ބޮއްޔެއް ނުފެނިއްޖެނަމަ، ކޮންމެވެސް ގާކޮޅެއް ނުވަތަ ލަކިޑިގަނޑެއް ނުވަތަ އެނޫންވެސް ކުނީގެ ގޮތުގައި ލައްގާފައިވާ ކޮންމެވެސް އެއްޗެއް އެސޮރު އިހްތިޔާރު ކުރެެއެވެ. އެގޮތުން މިހާރަކަށް އައޮސް ޕްލާސްޓިކު ފުޅި ފުޅި އާއި އެސްލޯނު ހޮޅިބުރި ފަތަ ތަކެތީގެ ތެރެއަށް ބަރަވެލި ވަދެ އުޅެއެވެ.

ގަސްގަހާގެހީގެ ބާވަތްތަކާއި މަސްމަހާމެހީގެ ބާވަތްތަކުން ބަނޑުފުރާ އުޅޭ ބަރަވެއްޔަކީ އަނިޔާތަކާއި ގެއްލުންތަކުން ވަރަށް ބޮޑަށް ހިމާޔަތް ވެފައިވާ އެއްޗެކެވެ. އޭގެ ހަށިގަނޑު ހިމާޔަތް ހޯދަނީ އެސޮރު ވަދެ އިންނަ ބޮލީގެ ހަރު ތޮށިގަނޑުންނެވެ. ބައެއް ބޮލި ބޮއްޔަކީ އޭގެ ޒާތުގައި ބަރުކަމެއް ހުންނަ އެއްޗެއްސެވެ. ނަމަވެސް އެ ބަރުކަމުގައި ބަރަވެލި އޭގެ ބުރަކަށި މަތީ، އެ ބޮލިތައް އުފުލަނީ މާ ބޮޑު ތަކުލީފެއް ނެތިއެވެ. މާ ބާރަށް ދުވެފައި ދިއުމުގެ ގާބިލުކަން ބޮއްޔަށް ލިބިފައި ނެތަސް، އެސޮރުގެ ދިރިއުޅުމުގައި އެއީވެސް އެއްވެސް މައްސަލައެއް ނޫނެވެ. ބަރަވެލީގެ ހަޔާތުގައި މި ފެންނަނީ އަޖައިބެއްކަހަލަ ކަންކަމެވެ. މާތް ﷲ ގެ އުފެއްދެވުމުގެ ފުރިހަމަ ކަމެވެ.