ރީނދުލަކީ ވަރަށް ކުރީ ޒަމާނުއްސުރެ ޒީނަތްތެރިވުމުގައި ބޭނުންކުރާ ބާވަތެކެވެ. އާންމުކޮށް ބޭނުންކުރެވެނީ ހަމުގެ ކުލަ އަލިކޮށް ސާފުކުރުމަށެވެ. ދިވެހިންގެ ސަގާފަތާއި ބީރައްޓެހި ނަމަވެސް އޭޝިޔާގެ ވަރަށް ގިނަ ގައުމުތަކުގައި ބޮޑު ހަފްލާއަކަށް ތައްޔާރުވާ ނަމަ ރީނދޫބޭނުން ކުރެއެވެ. ރީނދުލަކީ އޭގައި ވަރަށް ގިނައިން އެންޓިއޮކްސިޑެންޓް ހިމެނޭ އެއްޗެކެވެ. މީގެ ސަބަބުން ހަމުގެ ސެލްތައް މަރުވާލެއް ލަސްކޮށްލައެވެ. ނަތީޖާއަކީ ހަމުގެ ޒުވާންކަން ގިނަ ދުވަހަށް ފެންނަން ހުރުމެވެ. މިއީ ހަމުގައި މަރުވެފައި ހުންނަ ސެލްތައް ނައްތާލުމަށްވެސް ބޭނުން ކުރެވޭ އެއްޗެކެވެ. ހަމުގައި ލަށްޖެހުން އަދި ބިހިނެގުމުން ރައްކާތެރިކުރުމަށް ރީނދޫ އެހީތެރިވެދެއެވެ. ހަމުގެ އެކި ހިސާބުގެ ކުލަ ތަފާތުވެފައި ހުންނަ ނަމަ އެކަމަށް ވެސް ރީނދުލުގެ ސަބަބުން ޙައްލު ލިބެއެވެ. އެންމެ ފާހަގަކޮށްލެވޭ ކަމަކަށް، ހަމުގައި ހުންނަ ރޫފިލުވާލުމަށް ރީނދޫ ވަރަށް ބޮޑު ދައުރެއް އަދާ ކުރެއެވެ.
އެހެންކަމުން މިއަދު މިބަލާލަނީ ރީނދޫބޭނުންކޮށްގެން ފަސޭހައިން ތައްޔާރުކޮށްލެވޭނެ ފޭސް މާސްކް ތަކަކަށެވެ.
-
2 ސަމުސާ ފުށުގެ ( ގޮދަން، ހަނޑޫ ނުވަތަ އޯޓްމީލް) ތެރެއަށް 1 ސަމުސާ ރީނދުލާއި 2 ސަމުސާ ކިރު ނުވަތަ ޔޯގަޓް އަދި 2/1 ސަމުސާ މާމުއި އެޅުމަށްފަހު ރީތިކޮށް ގަށާލާށެވެ. ތުނިކޮށް މުޅި މޫނާއި ކަރުގައި އުނގުޅާފައި 20 މިނިޓް ބަހައްޓާށެވެ. ފިނިފެނުން ދޮވެލުމަށްފަހު މޮއިސްޗަރައިޒަރ އެއް ބޭނުން ކުރާށެވެ. މިއީ ހަންގަނޑު އޮމާންކުރުމަށް އެހީތެރިވެދޭނެ މާސްކެކެވެ.
-
ބޯތައްޓެއްގެ ތެރޭގައި 1 ސަމުސާ ލުނބޯހުތް، 2 ސަމުސާ ކިރު އަދި ސަމުސަލެއްގެ ހަތަރުބައިކުޅަ އެއްބައި އެއްކުރާށެވެ. ރީތިކޮށް ހުރިހާ ހިސާބެއްގައި އެއްވަރަށް އުނގުޅުމަށްފަހު 20 މިނިޓް ވަންދެން ބަހައްޓާށެވެ. ދެން ފިނިފެނުން ދޮވެލާށެވެ. މިއީ ނާޒުކު ހަން ހުންނަ މީހުންގެ ހަމުގެ ތެތްކަން ދެމެހެއްޓުމަށް ރަގަޅު މާސްކެކެވެ.
-
3 ސަމުސާ އާމަންޑް މިލްކް، 2/1 ސަމުސާ ރީނދޫ އަދި 3 ސަމުސާ ބޭކިންގ ސޮޑާ ކުޑަ ބޯތައްޓެއްގައި އެއްކުރާށެވެ. މޫނު ދޮވެލުމަށްފަހު ނުހިއްކާ ބަހައްޓާފައި އަތުގެ އިނގިލިތަކުގެ ކުރިން، ތައްޔާރުކުރި ބަނދެލި މޫނުގައި އުނގުޅާށެވެ. އުނގުޅާނީ ދަތްދޮޅިން ފެށިގެން މޫނުގެ މެދަށް އަންނަ ގޮތަށް ކުދި ވައްބުރަށްވާ ގޮތަށެވެ. 20 މިނިޓް ވަންދެން މިހެން މަސާޖް ކުރުމަށްފަހު އާދައިގެ ފެނުން ދޮވެލާށެވެ. މިގޮތަށް ސްކްރަބް ކުރުމުން ހަންގަނޑުގެ ތެތްކަން ހުންނާނީ ކުޑަވެފައެވެ. އެހެންކަމުން އަވަހަށް މޮއިސްޗަރައިޒަރއެއް ބޭނުން ކުރަންވާނެއެވެ. މިއީ މަރުވެފައި ހުންނަ ހަން ނައްތާލުމަށްފަހު އެކްނޭ އިން ހަންގަނޑު ސަލާމަތްކޮށްދޭނެ މާސްކެކެވެ.
-
2/1 1 ސަމުސާ ރީނދޫ، 1 ސަމުސާ މާމުއި އަދި އެއް ސަމުސާ ކާށިކިރު (އޮލަކޮށް ނަގާފައި) ތައްޓެއްގައި އެއްކުރާށެވެ. ރީތިކޮށް މޫނު ދޮވެ މޭކަޕް ފިލުވާލުމަށްފަހު މޫނުގައި އުނގުޅާށެވެ. 20 މިނިޓް ވުމުން ދޮވެލާށެވެ. މިއީ ބިހި ކޮށްޓުން ކަހަލަ ކަމަކުން ހަންގަނޑު ދުޅަވެއްޖެނަމަ ބޭނުންކޮށްލަން ވަރަށް ރަގަޅު މާސްކެކެވެ.
-
2 ސަމުސާ މުގުރި ސަނާމުގު، ބައި ސަމުސާ ކާށިކިރު ( އޮލަކޮށް ނަގާފައި)، 1 ސަމުސާ ކިއުކަމްބާ ދިޔަ އަދި 3/1 ސަމުސާ ރީނދޫ އެއްކޮށްލާށެވެ. މޫނުގެ ހުރިހާ ހިސާބެއްގައި ރީތިކޮށް އުނގުޅާލާށެވެ. 15 ވަންދެން ބަހައްޓާށެވެ. ހިކުމުގެ ކުރިން، ތާފަނާ ފެނުން މޫނު ދޮވެލުމަށްފަހުން އަލުން އުނގުޅާފައި މިގޮތަށް ތަކުރާރު ކުރާށެވެ. ދެވަނަ ފަހަރު މޫނު ދޮވެލުމަށްފަހު މޮއިސްޗަރައިޒަރ އެއް ބޭނުން ކުރަންވާނެއެވެ. މިއީ ހަންގަނޑު ތާޒާކޮށް ބެހެއްޓުމަށް ބޭނުންކުރަން ރަގަޅު މާސްކެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން