މި ދުވަސްވަރަކީ ރާއްޖެ އަށް އެންމެ ހޫނު ގަދަ ދުވަސްވަރު ކަމަށް ވުމާއެކު ކަރަންޓު އިޤްތިޞާދު ކުރުމަށް ހާއްސަ ސަމާލުކަމެއް ދިނުމަށް ސްޓެލްކޯ އިން އިލްތިމާސްކޮށްފިއެވެ.
އެގޮތުން، ސްޓެލްކޯ އިން މިއަދު ނެރުނު ބަޔާނެއްގައިވަނީ، މިހާރު މި ހިނގާ އޭޕްރީލް މަހާއި، ކުރިއަށް އޮތް މެއި މަހަކީ މި އަހަރު ރާއްޖެ އަށް އެންމެ ހޫނު ގަދަވާނެ ދުވަސްތައް ކަމުގައި ކަމާބެހޭ ފަރާތްތަކުން ލަފާކޮށްފައިވާ ކަމަށެވެ.
އަދި މި ދުވަސްތައް މި އަހަރުގެ ރޯދަ މަހާއި ދިމާވުމުން ކަރަންޓު ބޭނުންކުރާ މިންވަރު ކުރިއަށްވުރެ އިތުރުވެފައިވާ ކަމަށް ވެސް އެ ކުންފުނިން ވަނީ ފާހަގަކޮށްފައެވެ.
މީގެއިތުރުން، އެ ކުންފުނީގެ ތަފާސްހިސާބުތަކުން ދައްކާ ގޮތުން އެހެން ދުވަސްވަރުތަކާ ޚިލާފަށް މި ދުވަސްވަރު ޖައްވު ހޫނުވުމުގެ ސަބަބުން ރޭގަނޑުގެ ވަގުތުތަކުގައި ވެސް ކަރަންޓު އުފައްދަންޖެހޭ މިންވަރު އިތުރުވެފައިވާ ކަމަށް ވެސް އެ ބަޔާނުގައިވެއެވެ.
އެހެންކަމުން ކަރަންޓު ބޭނުންކުރުމުގައި އިތުރަށް ސަމާލުވެ، ކަރަންޓު އިޤްތިޞާދުކުރުމަށް ޚާއްސަ ސަމާލުކަމެއް ދިނުމަށް އެ ކުންފުނިން ވަނީ އިލްތިމާސްކޮށްފައެވެ.
މީގެކުރީން ވެސް ހޫނު މޫސުމާ ދިމާކޮށް ކަރަންޓު ބޭނުންކުރާ މިންވާރު އިތުރުވަމުން އަންނާތީވެ، ސްޓެލްކޯ އިން ވަނީ އާއްމުން ހޭލުންތެރިކުރުމުގެ ގޮތުން ހާއްސަ ކެމްޕޭންތައް ހިންގާފައެވެ.