ކުރަތްޕަކީ އެ ސުއިއްޕެއް ދެކެ ގިނަ ބަޔަކު ބިރުގަންނަ ސުއިއްޕެކެވެ. ހާއްސަކޮށް ކުރަފީގެ ތެރެއިން އުދުހޭ ކުރަފިދެކި ބިރުގަންނަ މީހުން ވަރަށްވެސް ގުނައެވެ. އާއްމުގޮތެއްގައި ބައެއް މީހުންނީ ކުރަތްޕެއް ފުނުމުން އަޑުން އަޑުނަގާ ފިލަން ދުވާ މީހުންނެވެ. ފާހާނާތެރެއިން ފެނިއްޖެނަމަ، ފާހާނާވެސް ނުކޮށް ތިބޭ މީހުންނެވެ. ބިރުން ފާހާނާއަށް ވަންނަން ނުކެރޭތީއެވެ. ފާހާނާތެރެއަކީ އާއްމުގޮތެއްގައި ކުރަފި ގިނައިން ފެންނަ އެއް ތަނެވެ. ވީއިރު އެކަމާ ހައިރާނެއް ނުވޭ ހެއްޔެވެ؟ ފާހާނާ ތެރެއިން އެހާގިނައިން ކުރަފި ފެންނަ ސަބަބީ ކޮބާ ހެއްޔެވެ؟ މި ލިޔުމުގައި މި ބަލާލަނީ މިކަމުގެ ސަބަބުތަކަށެވެ.

ކުރަތްޕަކީ ތެތް އަދި އަނދިރި މާހައުލުތަކަށް ލޯބި ކުރާ ސުއިއްޕެކެވެ. އެގޮތުން ފާހާނާތަކުގެ މާހައުލަކީ މިގޮތަށް މި ކުރަފިރަކަށް ވަރަށްވެސް ކަމުދާ މާހައުލެކެވެ. ފާހާނާގެ ތެރޭގައި ފެން ބޭނުން ކުރެވޭ ކުރުމުގެ ނަތީޖާއަކީ އެތަނުގައި ތެތްކަން ހުރުމެވެ. އަދި ބައެއް ފާހާނާތައް ހެދިފައި ހުންނަ ގޮތުން އެތަންތަނުން ފެން ހިކޭ މިންވަރު މަދުވެއެވެ. ނަތީޖާއަކީ ތެތްކަން ގިނަ ވަގުތު ހުރުމެވެ. ދެން އޮތް ކަމަކީ އަނދިރި ކަމެވެ. ޖުމުލަކޮށް ގިނަ ފާހާނާތަކަކީ ދުވާލުގެ ވަގުތުގައިވެސް އަނދިރި ތަންތަނެވެ. އަދި އެއީ އަބަދުމެ ބޭނުން ކުރާ ތަނަކަށް ނުވުމުން، ގިނަ ފަހަރަށް ފާހާނާގެ ބޮކި ހުންނާނީ ނިއްވާލާފައެވެ. މިކަމުގެ ސަބަބުން އަނދިރިކަން ގިނަ ވަގުތު އެ ފާހާނާގެ ތެރޭގައި ހުރެއެވެ. ނަތީޖާއަކީ ތެތްކަމާއި އެކު އެވާ އަނދިރިކަމަށް ލޯބިކުރާ ކުރަފިތަކަށް އެ މާހައުލު ކަމުގޮސް، އެތަންތަނަށް އައުމުގެ ޝައުގުވެރިކަން އެސޮރުމެންގެ އުފެދުމެވެ.

ބައެއްކަހަލަ "އޯގަނިކް" ތަކެއްޗަށް ޝައުގުވެރިކަން ހުންނަ ކުރަތްޕަކީ ދިރޭތަކެތީގެ ނަޖިހަށްވެސް ޝައުގުވެރިކަން ހުންނަ ސުއިއްޕެކެވެ. އެހެންކަމުން ފާހާނާތަކުގައި އިންސާނުންގެ ނަޖިހުގެ އަސަރު ހުންނާނެއެވެ. އެއީ ފާހާނާތަކުން ކުރަފި ގިނައިން ފެންނަ އެއް ސަބަބެވެ. މަތި ޖަހާ ބަންދުކޮށްފައި ހުންނަ ބޮޑުކަމުދާ ތަކެތި އެޅޭ ނަޖިސްވަޅުގަނޑުތަކަކީ ކުރަފި އިންތިހާއަށް އުޅޭ އަދި އާލާވާ ތަންތަނެވެ. އެތަންތަނުގައި ތެތްކަމާއި އަނދިރި ކަމާއި އިންސާނުންގެ ނަޖިސް ހުންނާތީއެވެ. މިފަދަ ފެންހިންދާތަކާއި ނަޖިސްވަޅުތައް ހުންނާނީ ފާހާނާތަކާއި ގުޅިފައެވެ. އެހެންކަމުން ކުރަފިތަކުގެ މި އައްޑާތައް މި ހުންނަނީ ސީދާ ފާހާނާތަކަށް ހުޅުވިފައެވެ. ނަތީޖާއަކަށް ވަނީ އެތަންތަނުން އަންނަ ކުރަފިތައްވެސް ފާހާނާ ތެރެއަށް އައުމެވެ.

މި ބަލާލެވުނީ ފާހާނާ ތެރެއިން ގިނައިން ކުރަފި ފެންނަ ބައެއް އާއްމު ސަބަބުތަކަށެވެ. ވީއިރު، ފާހާނާއިން ފެންނަ ކުރަފި މަދު ކުރުމަށް ފާހާނާތައް ހަދާއިރު، ބޮޑަށް ފެންފަހިވާނޭ ގޮތަކަށް ތަޅުން އަޅާ، ތަޅުމުގައި ހަރުލާފައި ހުންނަ ފެން އަވަހަށް ހިކޭނޭ ގޮތަކަށް ހެދުން މުހިއްމެވެ. އަދި ފާހާނާ ތެރެއަށް އަލިވަންނާނޭ ގޮތެއްވެސް ހެދުން ބުއްދިވެރިއެވެ. އަދި ހަމަ އެއާއި އެކު ފާހާނާގެ ވައި ބަންދުވެފައި ނުބެހެއްޓުމަށް ވައި ބޭރުކުރާ ނިޒާމެއް ގާއުމު ކުރެވިދާނެއެވެ. އަދި އެއްމެ މުހިއްމު އެއް ކަމަކީ ގަވައިދުން، ރީތިކޮށް ފާހާނާތެރެ ދޮވެ ސާފުކޮށް ބެހެއްޓުމެވެ.