މިއީ ހޫނު ގަދަ ދުވަސްވަރަކަށް ވާތީވެ ކޮންމެހެން ބޭނުންވާ މިންވަރަށް ވުރެ އިތުރަށް ކަރަންޓު ބޭނުންނުކުރުމަށާއި ކަރަންޓު އިގްތިޞާދުކުރުމަށް އަނެއްކާވެސް ސްޓެލްކޯ އިން އިލްތިމާސްކޮށްފިއެވެ.

 

މީގެކުރީން، މިދިޔަ ބުދަ ދުވަހު ސްޓެލްކޯ އިން ނެރުނު ބަޔާނެއްގައިވަނީ، މިހާރު މި ހިނގާ އޭޕްރީލް މަހާއި، ކުރިއަށް އޮތް މެއި މަހަކީ މި އަހަރު ރާއްޖެ އަށް އެންމެ ހޫނު ގަދަވާނެ ދުވަސްތައް ކަމުގައި ކަމާބެހޭ ފަރާތްތަކުން ލަފާކޮށްފައިވާ ކަމަށާއި، އަދި އެ ކުންފުނީގެ ތަފާސްހިސާބުތަކުން ދައްކާ ގޮތުން އެހެން ދުވަސްވަރުތަކާ ޚިލާފަށް މި ދުވަސްވަރު ޖައްވު ހޫނުވުމުގެ ސަބަބުން ރޭގަނޑުގެ ވަގުތުތަކުގައި ވެސް ކަރަންޓު އުފައްދަންޖެހޭ މިންވަރު އިތުރުވެފައިވާ ކަމަށެވެ.

"ކަސްޓަމަރުންގެ ސަމާލުކަމަށް: މޫސުމާބެހޭ އިދާރާއިން ލަފާކޮށްފައިވާގޮތަށް މި ދުވަސްވަރަކީ ހޫނު ގަދަ ދުވަސްވަރަކަށް ވުމުން، ކޮންމެހެން ބޭނުންވާ މިންވަރަށް ކަރަންޓު ބޭނުން ކުރުމަށާއި، ކަރަންޓު އިގްތިސާދު ކުރުމަށް ހާއްސަ ސަމާލުކަމެއް ދިނުމަށް އިލްތިމާސް ކުރަން." ސްޓެލްކޯގެ ޓުވީޓެއްގައިވެއެވެ.

އެގޮތުން، ފިނި ކުރުމަށް ގެންގުޅޭ އޭސީ ފަދަ އާލާތްތައް ބޭނުންކުރުމުގައި އިތުރަށް ސަމާލުވެ، 25 ޑިގްރީއަށްވުރެ ދަށް ނުވާނެހެން ފިނިހޫނުމިން ބެހެއްޓުމަށާއި، ކަރަންޓު އާލާތްތައް ގަންނައިރު އިންވާޓާރ އަށް އިސްކަންދިނުމަށް ވެސް ސްޓެލްކޯ އިން ވަނީ އިލްތިމާސްކޮށްފައެވެ.
މީގެއިތުރުން، ސްޓެލްކޯގެ މެނޭޖިންގ ޑިރެކްޓަރު އަހުމަދު ޝަރީފު އާދަމް މިރޭ ކުރި ޓުވީޓެއްގައިވަނީ، މާލޭ އޭރިއާގައި މިހާތަނަށް އެންމެ ގިނައިން ކަރަންޓު ބޭނުންކޮށްފައިވަނީ މި މަހުގެ 11 ވީ އަންގާރަ ދުވަހުގައި ކަމަށާއި، އެ ދުވަހު 92.5 މެގަވޯޓަށް ވުރެ އިތުރަށް ކަރަންޓު ބޭނުންކުރެވުނު ކަމަށެވެ. އަދި ކުރިއަށް އޮތް ދުވަސްތަކުގައި ކަރަންޓު ބޭނުންކުރާ މިންވަރު އިތުރުވުމުގެ ފުރުޞަތު ބޮޑުކަމަށް ވެސް ބުނެފައިވެއެވެ.

"ސްޓެލްކޯގައި 120 މެގަވޯޓްގެ ކަރަންޓު އުފެއްދުމުގެ ގާބިލްކަން ހުރި ނަމަވެސް ކަރަންޓު އިގްތިޞާދު ކުރައްވާ." ސްޓެލްކޯގެ އެމްޑީ ޝަރީފު ކުރެއްވި ޓުވީޓުގައިވެއެވެ.