އަހަރެމެން އިންސާނުންނީ އަބަދުވެސް ރުޅީގެ މައްޗަށް ގަދަވެގަންނަން އުނދަގޫ ބައެކެވެ. ނަމަވެސް އަހަރެމެން އެންމެންވެސް ގަބޫލުކުރާ ހަމައަކީ، އެއްމެ މޮޅުއިތުރު ގޮތީ ރުޅީގެ މައްޗަށް ނަފްސު ގަދަވެގަތުމެވެ. ބައެއްފަހަރު، އަންނަ ރުޅީގައި އެކި މީހުން އެކިކަންކަން ކުރާ އިރު، އެއްބަޔަކު އެމީހުންގެ އަތްފައިން ގޯސް ހަދައެވެ. އަނެއްބަޔަކު އެމީހުންގެ ދޫތަކުން ނުބައި ހަދައެވެ. އެއްމެ އާއްމު އެއް ކަމަކީ ދޫތަކުން ނުބައި ހެދުމެވެ. ބައެއް ހާލަތްތަކުގައި ދުލުން ހެދޭ މި ނުބައިތަކުން ދުރުވުމަށް ދޫ ބަންދު ކުރަން އެބަ ޖެހެއެވެ. ބަސް މަދުކޮށް ހަނުހުންނަން އެބަ ޖެހެއެވެ.

އަންނަ ރުޅީގައި އަނެކާ އާއި ދިމާލަށް ބަސްބުނެ، އަނެކާ ބަދުނާމު ކުރަން ނުހަދާށެވެ. މިފަދަ ނަޒަރަކުން އަނެކާ އާއި ދިމާލަށް އަނެކާގެ ކުށުގެ ވާހަކަ ދައްކަން ތިބާގެ އަނގަ ހުޅުވާއިރު، އެކަމުގައި ފުދޭވަރުގެ ހެކި ތިބާގެ ދުލާއި އަތުގައި ހުންނަން ވާނެއެވެ. ނޫންނަމަ އެހާލަތުގައި ތިބާ ހަނު ހުންނާށެވެ. އެހެނީ އެވަގުތު ތިބާއަށް އެއްމެ ހެޔޮކަންބޮޑީ ހަނުހުރުން ކަމުގައި ވާތީއެވެ. ފަހަރުގައިވެސް އެ ހަނުހުންނަ ހުރުމަކީ ތިބާގެ ނިކަމެތިކަން ހާމަވާ ކަމެއް ނޫނެވެ.

ރުޅި އަކީ އޭގެ ރައްދުވެސް ހޫނު އެއްޗެކެވެ. ނަމަވެސް ރުޅީގައި ރައްދުދޭ އިރު، މަޑުމައިތިރިކަން އިސްކޮށްފި މީހާ އެއީ އެ ރުޅީގެ މައްޗަށް ގަދަވެގަނެއްޖެ މީހެކެވެ. އެހެންކަމުން ރުޅީގެ ރައްދަކަށް ތިބާ ބުނަން ބޭނުންވާ ޖުމުލަ، ބާރަށް، ހަޅޭލަވާ ރާގަށް ބުނެވޭނެ ނަމަ، އިހަށް ހަނު ހުންނާށެވެ. ތިބާގެ ނަފްސަށް ވަގުތުދީ، ނަފްސު ހަމަ ޖައްސާށެވެ. އަދި އޭގެ ފަހުގައި މަޑުމައިތިރި ކަމާއި އެކު އެ ރުޅީގެ ރައްދު، ތިބާ އެމީހަކަށް ދޭށެވެ. މިގޮތަށް ރުޅީގެ ރައްދު ލަސްކުރާ ކުރުމަކީ ތިބާގެ ހައިބަތު ކުދަވެދާ ކަމެއް ނޫނެވެ.

ދުލުގައި ހަޑިހުތުރު ބަސްތަކެއް ވާނަމަވެސް، ތިބާ ހަނުހުއްނާށެވެ. އަހަރެމެންގެ ގިނަ ބަޔަކަށް ހީވެފައި އޮންނަނީ ރުޅި އަންނަ އިރު، ބާރަށް، ހަޑިހުތުރު ބަސްބުނާ މީހާއީ އެތަނުގައި މޮޅުވެއްޖެ މީހެކެވެ. ނަމަވެސް އެއީ ބޮޑު ކުށްހީއެކެވެ. އެތަނުގައި މޮޅުވަނީ ހަޑިހުތުރު ބަސްބުނުމުން މަނާވެގަންނަ މީހާއެވެ. އެއީ އެ ބަސްތައް ބުނުމުގައި އޭނާ ހަނުހުރީތީއެވެ.

އަދިވެސް އަދިވެސް އިންސާނާ ހަނުހުރުން ބުއްދިވެރި ކިތައްމެ ހާލަތެއް އަތުވެދާނެއެވެ. ބޭކާރު ގޮތުގައި ތިބާގެ ދޫ އެފުށް މިފުށަށް ޖަހާ، ތިބާގެ އަޑުފޮށި އެގޮތް މިގޮތަށް ތަޅުވާ ހެދުމުގެ ބޭނުމެއް ކޮބާހެއްޔެވެ؟ އެއަށްވުރެ ތިބާ ހޭދަކޮށްލާ ހިމޭނުގެ ވަގުތުކޮޅު އެއީ ތިބާއަށް އަދާ މާދަމާވެސް ފައިދާކުރާނެ ކަމެކެވެ. މާނައެއް ނެތް، އޭގެ ސަބަބުން އިތުރު ގަޑުބަޑެއް އުފެދިދާނެ އަޑުތަކެއް ލެއްވުމަށްވުރެ، އަމާން ކަމާއި އޮމާން ކަމާއި ހިމޭންކަންމަތީ ތިބާ ހަނުހުންނަ ހުރުން ތިބާއަށް މާ ފައިދާ ބޮޑެވެ!