ލުނބޯ ފަންޏަކީ އަހަރެމެންގެ މުޖުތަމައުގައި އާއްމު ބުއިމެކެވެ. އެކި މީހުން އެކި ގޮތަށް ތައްޔާރު ކުރިނަމަވެސް ޖުމުލަގޮތެެއްގައި ލުނބޯ ފަނި އެންމެންހެން ގިރަނީ ދާދި އެއްގޮތަކަށެވެ. ލުނބޯ ހުތްފެލައިގެން ފެނަށް އަޅައިގެން ކުޑަ ހަކުރުކޮޅެއް ލައިގެން ގިރާ ލުނބޯ ފަންޏަކީ ޒަމާނުއްސުރެ ދިވެހިން ބޮމުން އައި މީރު ފަންޏެކެވެ. އެޒަމާނުގައި ލުނބޯ ހިސާބަކަށް ތަދު ނަމަވެސް، ލުނބޯ ފަންޏަކީ މަސައްކަތުގެ މާހައުލުތަކުގައި ބޮމުން އައި މީރު ފަންޏެކެވެ.
ލުނބޯ ފަންޏަކީ އިންސާނާގެ ސިއްހަތަށް ގިނަގުނަ ފައިދާތަކެއް ކުރުވާ ފަންޏެކެވެ. އެގޮތުން ލުނބޯ އަކީ ގިނަ އަދަދަކަށް ވިޓަމިން ސީ އެކުލެވޭ މޭވާއެއް ކަމުން ލުނބޯ ފަންޏަކީ ދިފާއީ ނިޒާމު ހަރުދަނާކުރުމަށް އެހީތެރިވެދޭ ބުއިމެކެވެ. އަދި ލޭގެތެރޭގައި ދައުރުވާ ފެނުގެ މިންވަރު ދަށްވިޔަ ނުދީ ހިފަހައްޓައިދިނުމަށްވެސް ލުނބޯ ފަންޏަކީ މޮޅު ބުއިމެކެވެ. ހުން އައުމާ ހޮޑުލެވުމާ ބޭރަށްހިންގުންފަދަ ކަންކަމަށްވެސް ލުނބޯ ފަނި ވަރެއް ނޯންނާނެއެވެ.
މައިދާގެ ތެރޭގައި ހުންނަ ހަޖަމުކުރުވާ އެސިޑުގެ ބަލިކަށިކަމާ މަދުކަމަށް ޤުދުރަތީގޮތުން އަވަސް ހައްލެއް ލިބިދޭ ލުނބޯ ފަންޏަކީ ހަޖަމުގެ މައްސަލަތަކަށް މޮޅު ބުއިމެކެވެ. ބަނޑު ފުއްޕުމާއި ހަޖަމު ނުވުމުގައި މި އެސިޑުގެ މިންވަރު މަދު ނަމަ، ލުނބޯފަނިން އެ އެސިޑުގެ މިންވަރު އިތުރުކޮށްދީ ހަޖަމަށް ލުއިކޮށްދެއެވެ.
ހަންގަނޑު ކުރަކިވެ، ރޫޖެހުން ފަދަ ކަންކަމުން ދުރުކޮށްދޭ އެންޓުއޮކްސިޑަންޓަސް އަކީ ލުނބޯފަނިން ލިބިދޭނެ އެންޓިއޮކްސޮޑަންޓްސް ތަކެކެވެ. އަދި ހަމުގައި އުފައްދާ "ކޮލާޖެން" ނަމަކަށް ކިޔާ މާއްދާ އުފެއްދުން އިތުރުކޮށްދިނުމަށް ލުނބޯފަނީގައި ހުންނަ ވިޓަމިންތައް އެހީވެދެެެވެ. ނަތީޖާއަކީ ހަންގަނޑަށް އޮމާންކަން ގެނެސްދިނުމެވެ. ލުނބޯފަނީގައި ހުންނަ ހުތުގެ ތާސީރަކީ ޤުދުރަތީ ސިޓްރިކް އެސިޑެކެވެ. މިއީ ގުރުދާގައި ހިލައުފެދުން ދުރުކޮށްދިނުމަށް އެހީތެރިވެދޭ މާއްދާއެކެވެ. އަދި ގުރުދާ ސާފުކޮށްދިނުމަށްވެސް މި މާއްދާ އެހީތެރިވެދެއެވެ.
ގިރާލަން ފަސޭހަ، އަނގައަށް މީރު، ހަށިގަނޑަށް ފިނިކަން ގެނެސްދޭ ލުނބޯ ފަންޏަކީ ނުބޮއެ ދޫކޮށްލެވޭ ވަރުގެ ފަންޏެއް ނޫނެވެ. ހާއްސަކޮށް އިސްވެ ފާހަގަ ކުރެވުނު ތަފާތު ބަލިތަކުގައި ލުނބޯ ފަންޏަކީ ބޭނުން ކޮށްލަން ވަރަށް ކަމުދާނެ ފަންޏެކެވެ.