މާލޭ ސަރަހައްދުގެ އެވްރެޖް ޕަވަރ ޔޫސޭޖް ނުވަތަ އެވްރެޖް އެނާރޖީ ކޮންސަމްޕްޝަން މިއަދު ރެކޯޑް މިންވަރަކަށް އިތުރުވެފައިވާ ކަމަށް ސްޓެލްކޯ އިން ބުނެފިއެވެ.
ސްޓެލްކޯ އިން މިއަދު ނެރުނު ނޫސް ބަޔާނެއްގައިވަނީ، 2023 ވަނަ އަހަރުގެ އޭޕްރީލް މަހުގެ 24 ވީ ދުވަހުގެ މެންދުރު 14:10 ގައި މާލެ އާއި ހުޅުމާލެ ހިމެނޭ ސަރަހައްދުގެ ޕީކްލޯޑް 102 މެގަވޮޓަށްވުރެ މައްޗަށް ގޮސްފައިވާކަމަށެވެ.
މިއާއެކު ހުރިހާ ފަރާތްތަކުން ވެސް ކަރަންޓު އިގްތިޞާދު ކުރުމަށް ހާއްސަ ސަމާލުކަމެއް ދިނުމަށް އިލްތިމާސްކޮށްފައިވެއެވެ.
"އެގޮތުން އާންމު ގޭބިސީ ތަކާއި، ދައުލަތުގެ އިދާރާތަކާއި، ސަރުކާރުގެ ވުޒާރާތަކާއި، އޮފީސްތަކާއި، ސްކޫލްތަކުގެ އިތުރުން ބޮޑެތި އަދި ކުދި ވިޔަފާރިތަކުން ވެސް ކޮންމެހެން ބޭނުންވާ މިންވަރަށް ކަރަންޓު ބޭނުންކުރުމަށް އިލްތިމާސް ކުރަމެވެ." ސްޓެލްކޯގެ ނޫސް ބަޔާނުގައިވެއެވެ.
"ދިރާސާތަކުން ދައްކާގޮތުން، އާންމު ގޭބިސީތަކުގެ ކަރަންޓު ބިލްގެ 40 އިންސައްތަ ހިއްސާ ކުރަނީ ފިނިކުރުމަށް ގެންގުޅޭ އެއަރކޮންޑިޝަން ފަދަ އާލާތްތަކުން ކަމަށްވާތީ، ހުރިހާ ފަރާތްތަކުން ވެސް 25 ޑިގްރީ ސެލްސިއަށް ވުރެ ދަށް ނުވާނެހެން އެއަރކޮންޑިޝަން ބެހެއްޓުމަށް ސަމާލުކަން ދިނުން އެދެމެވެ." ބަޔާނުގައިވެއެވެ.
އަދި ކޮންމެހެން ދިއްލަންޖެހޭ ދިއްލުންތަކާއި، ބޭނުން ކުރަންޖެހޭ ކަރަންޓު އާލާތްތައް ފިޔަވާ އިތުރު އާލާތްތައް މިދުވަސްވަރު ބޭނުން ނުކުރުމަށް އިލްތިމާސްކޮށްފައިވެއެވެ.
މީގެއިތުރުން، މި ދުވަސްވަރު ޕީކް ހޭންޑްލް ކުރުމަށްޓަކައި، ހުރިހާ ފަރާތްތަކެއްގެވެސް އެއްބާރުލުމާއި، އެހީތެރިކަން އެ ކުންފުންޏަށް ބޭނުންވާކަމަށް ވެސް އެދިފައިވެއެވެ.