ލަގްޒަރީ އެއާލައިން ބިއޮންޑް އަށް ކެބިން ކްރޫ އިން ނެގުމަށް އޯޕަން ޑޭ އަށް މިއަދު ކުރިއަށްދާނެ އެވެ.
އެގޮތުން، އެ އެއާލައިންގައި މަސައްކަތްކުރުމަށް ޝައުގުވެރިވާ ފަރާތްތަކަށް ހާއްސަކޮށް ކުރިއަށްގެންދިއުމަށް ހަމަޖެހިފައިވާ ކެބިން ކްރޫ އޯޕަން ޑޭ އޮންނާނީ މިއަދު (26 އޭޕްރީލް 2023) ގެ ހެނދުނު 9:00 އިން މެންދުރު ފަހު 3:00 އާ ހަމައަށް، އެސްޓީއޯ ޓްރޭޑް ސެންޓަރުގެ ހަތަރު ވަނަ ފަންގިފިލާގައެވެ.
އިންޓަވިއު އަށް ހާޟިރުވާއިރު ސީވީ، ތަޢުލީމާއި ތަޖުރިބާ ލިބިފައިވާކަން އަންގައިދޭ ސެޓްފިކެޓްތަކާއި ލިޔުމުގެ އިތުރުން ފަހުގެ ޕާސްޕޯޓް ސައިޒްގެ ފޮޓޯއެއް ގެނައުމަށް އެދިފައިވެއެވެ.
ބިއޮންޑް އެއާލައިނުން ބުނީ އަމާޒަކީ ޒިޔާރަތްކުރާ މެހެމާނުންނަށް އެންމެ ރަނގަޅު ފެންވަރުގެ ހިދުމަތެއް ފޯރުކޮށްދިނުން ކަމަށާއި، އަދި މި ވަޒީފާ އަށް ހޯދަނީ ވެސް ކަސްޓަމަރުންނަށް ފެންވަރު ރަނގަޅު ހިދުމަތެއް ފޯރުކޮށްދެވޭނެ ޒުވާން މުވައްޒަފުން ކަމަށެވެ.
އެ އެއާލައިންގެ ދަތުރުތައް މި އަހަރު ފެށުމަށް ހަމަޖެހިފައިވާއިރު، ފުރަތަމަ އަހަރުގައި އެކަނިވެސް މުޅި ރާއްޖޭގައި 200 އަށް ވުރެ ގިނަ ވަޒީފާގެ ފުރުޞަތު ތަނަވަސްވެގެންދާނެ ކަމަށް މީގެކުރީން ސީއީއޯ ޓީރޯ ޓަސްކިލާ ވަނީ ފާހަގަކުރައްވާފައެވެ.
ޔޫއޭއީގެ އަރަބޭސްކްއާ ގުޅިގެން ސިމްޑީ ގްރޫޕުން ފަށާ ބިއޮންޑް އެއާލައިން އުފެއްދުމުގެ މައިގަނޑު މަގްޞަދަކީ ލަގްޒަރީ ޓޫރިޒަމް ދާއިރާއަށް އެންމެ މަތީ ފަންތީގެ ވައިގެ ދަތުރުފަތުރުގެ ހިދުމަތް ފޯރުކޮށްދިނުމެވެ. މި އެއާލައިންގެ އަމާޒަކީ ރާއްޖެ އިން ޔޫރަޕާއި، އޭޝިއާ އަދި މެދު އިރުމަތީގެ 60 އަށް ވުރެ ގިނަ މަންޒިލަށް އޮޕަރޭޓްކުރުން ކަމަށް ވަނީ ބުނެފައެވެ.