މައިގްރޭން އަކީ ގިނަ ބަޔަކު ތަހައްމަލު ކުރަމުން އަންނަ ކަމެކެވެ. މިއީ ބޮލުގައި ރިހޭ ރިހުމެކެވެ. އާދައިގެ ރިހުންތަކާ، މައިގްރޭންގެ ރިހުމާ ވަރަށް ތަފާތުވާނެއެވެ. އެހެނީ މިއީ ވޭނީ، ބަރު އަދި ގަދަ ރިހުމެކެވެ. ބަރުދާސްތުކުރަން، ކެކުޅުން ބޮޑު ރިހުމެކެވެ. ރިހުމުގެ ގޮތުން، އާއްމު ދިރިއުޅުމަށް ބުރޫއަރާފަދަ ރިހުމެކެވެ. ބޮލުގައި ރިހޭ ރިހުމާއި އެކު މޭނުބައި ކުރުމާއި އެކު ހޮޑުލެވުމަކީވެސް އެކަށީގެންވާ ަކަމެކެވެ. އަދި ބައެއްފަހަރު މިއީ އައްޔާއި ބާރުގަދަ އަޑުތަކަށް އެ މީހަކު ނާޒުކު ކުރުވާ ރިހުމެކެވެ. ބައެއް މީހުންނަށް މައިގްރޭންގެ ރިހުން މަޑުމަޑުން އިހުސާސް ކުރެވެމުން ގޮސް، އެ ރިހުން ބޮޑުވެ ގަދަވެގެން ދެއެވެ. އެއްބައިމީހުންނަށް މިއީ މަދު ގަޑިއިރެއްގެ ކަމަކަށް ވިޔަސް އަނެއްބަޔަކު އެ ރިހުމުގައި ދުވަސްތަކެއްވެސް ހޭދަ ކުރަންޖެހެއެވެ. އެއްބަޔަކު ބޭހެއް ބޭނުން ނުކޮށް ރަނގަޅުވިއެއްކަމަކު، އަނެއްބައިމީހުންނަށް މައިގްރޭން ގެ ރިހުންތަކުގައި ބޭސް ނުކައި ފަރުޖެހޭނެ ގޮތެއް ނޯވެއެވެ.
ނިއުރޮލޮޖިކަލް ޑިސްއޯޑާރ އެއްގެ ގޮތުގައި ފާހަގަކޮށްފައިވާ މައިގްރޭންގެ ރިހުން އިހުސާސް ކުރަންޖެހޭ ސީދާ އަސްލު ސަބަބެއް އަދިވެސް މުޅިއަކުން ސާފެއް ނޫނެވެ. ނަމަވެސް ދިރާސާވެރިން ދަނީ ތަފާތު ހޯދުންތަކާއި ބާރުދޭ ކަންތައްތައް ހޯދަމުންނެވެ. އެގޮތުން ސިކުނޑިއާއި މައިބަދައިގެ ނާރުތަކުގެ ސިގުނަލްތަކެއްގެ ސަބަބުން މި ރިހުން އުފެދިދާނެ ކަމަށްވެސް ބައެއް ދިރާސާވެރިން ދެކިލައްވައެވެ. އަދި އަނެއްބަޔަކު، ސިކުނޑީގެ ކެމިކަލްތަކުގެ ނަހަމަކަމަކުންވެސް މައިގްރޭން ގެ ރިހުން އުފެދިދާނެ ކަމަށް ދެކިލައްވައެވެ.
މައިގްރޭންގެ ރިހުން އުފެދުމަށް މެދުވެރިވެދާނެ، ނުވަތަ ބާރުދީފާނެ އެހެން ސަބަބުތަކެއް ހުރެއެވެ. އޭގެތެރޭގައި މީހާގެހަށިގަނޑުގައި ހުންނަ ހޯމޯންތަކުގެ ނަހަމަކަން ބޮޑު ދައުރެއް އަދާކުރެއެވެ. އެކިކަހަލަ ހޯމޯންތަކާއި ގުޅުން ހުންނަ ބަލިތައް ތަހައްމަލު ކުރާމީހުންނަށް މައިގްރޭންގެ ރިހުން ގިނައިން އުފެދިދާނެއެވެ. އޭގެތެރޭގައި ތައިރޯޑް ހޯމޯންތަކުގެ މައްސަލަ ހުންނަ މީހުންނާއި ހަކުރު ކިޔަމަންކުރާ ހޯމޯނުގެ މައްސަލަ ހުންނަ މީހުންނާއި، ބިސްރަވައިގައި ފެންކޮތަޅު އުފައްދާ ބަލި ހުންނަ މީހުންނާއި އަދި ދޭތެރެދުރުކުރާ ބޭސް ބޭނުން ކުރާ މީހުން ފަދަ މީހުން ހިމެނެއެވެ.
ބައެއް މީހުން ބޮލުގައި ރިހޭނަމަ، ކޮފީ ބޮއެ ހަދައެވެ. ނަމަވެސް ހަގީގަތަކީ ކެފެއިންގެ މާއްދާ ހަށިގަނޑުގައި ގިނަ ވުމަކީ މައިގްރޭން އެޓޭކްތަކަށް މަގުފަހިކުރުވާ ކަމެއްކަމެވެ. މީގެ އިތުރުން ހާސްކަމާއި ނުތަނަވަސްކަމާއި ކަންބޮޑުވުމުގެ ތެރޭގައި އަބަދު އިންސާނާ އުޅޭނަމަވެސް މައިގްރޭންގެ ރިހުންތަކަށް އެ ހުޅުވާލެވެނީ ފަހި ދޮރެކެވެ.
ނިންޖަކީވެސް މައިގްރޭންގެ ރިހުމަށް މަގުފަހި ކުރުވާ ކަމެކެވެ. އެވްރެޖް އިންސާނެއްގެ ނިދި، ގާތްގަނޑަކަށް 5 ގަޑިއިރާއި 8 ގަޑިއިރާ ދެމެދުގެ މިންގަނޑެއްގައި ގެންގުޅެން ޖެހޭއިރު، ނިދި މަދުވުމާއި އަދި މާ ގިނައިން ނިދުމަކީ މައިގްރޭންގެ ރިހުން އުފެދުމަށް މެދުވެރިވެދާނެ ކަމެކެވެ. މީގެ އިތުރުން ކެއުމަކީވެސް މިފަދަ ކަމެކެވެ. ކެއުމުގައި ލޮނުގެ މާއްދާ މާ ގިނަނަމަ، މައިގްރޭންގެ ރިހުންތަކަށް މަގުފަހިވެއެވެ. އަދި ގަވައިދުން ނުކެއުމާއި، އެއްފަހަރާ މާ ގިނައިން ކެއުމާއި، ނިދަން ކައިރިކޮށްފާ ގިނައިން ކެއުންފަދަ ކަންކަމަކީވެސް މައިގްރޭންގެ ރިހުންތަކަށް މަގުފަހިކުރުވާ ކަންކަމެވެ.
މޫސުމަށް އަންނަ ބަދަލުތަކާއި ފިނިހޫނުމިނަށް އަންނަ ބަދަލުތަކާއި މާހައުލުގެ ބަޔޯމެޓްރިކް ޕްރެޝަރަށް އަންނަ ބަދަލުތަކުގެ ސަބަބުން އެ މާހައުލުތަކުގައި އުޅޭ މީހުންނަށް މައިގްރޭންގެ ރިހުން އުފެދުމުގެ ފުރުސަތު ބޮޑުވާކަމަށް ދިރާސާތަކުން ދައްކައެވެ. އަދި ހެލިފެލިވެ އުޅޭ އުޅުމުގައި އެެއްކަމެއް ތަކުރާރުކޮށް މާގިނައިން، ވަރުބަލިވަންދެން ކުރާނަމަވެސް އެއީ މައިގްރޭންގެ ރިހުން އުފެދިދާނެ ކަމެއް ކަމަށްވެސް ދިރާސާތަކުން ދައްކައެވެ.
އަދި އިންސާނާގެ މިޒާޖުގައި އުފެދޭ ސެންސަރީ ސްޓިމުލަސް ތަކެއްގެ ސަބަބުން ވެސް މި ރިހުން އުފެދިދާނެއެވެ. އެއީ ގަދަ އަލީގެ ސަބަބުން ނުވަތަ ބާރުގަދަ އަޑެއްގެ ސަބަބުން އުފެދިދާ ސްޓިމުލަސްތަކެކެވެ. މިއީވެސް މައިގްރޭންގެ ރިހުން އުފެދިދާނެ ސަބަބުތަކެއް ކަމަށް ދިރާސާތަކުން ދައްކައެވެ.
މި ބަލާލެވުނީ ބައެއް ކަންތައްތަކަށެވެ. މިއީ މައިގްރޭން އެޓޭކެއް ޖެހުމަށް މެދުވެރި ކުރުވަފާނެ ސީދާ ސަބަބުތަކެއް ނޫނެވެ. ނަމަވެސް މިއީ ނުސީދާކޮށް އެ ރިހުން އުފެދިދާނޭ ސަބަބުތަކެވެ. އެހެންކަމުން އާދަވެ މައިގްރޭންގެ ރިހުން އުފެދޭ މީހެއްނަމަ، މި ކަންކަމަށް ސަމާލުކަންދީ މިކަންކަމަށް ފަރުވާތެރިވާށެވެ.