އިސްލާމްދީނަށް ބަދުބަސް ބުނުމަކީ އެއްވެސް ހިންސާނަކަށް އޮތް ހައްގެއް ނޫނެވެ. އަދި އެއީ އެއްވެސް މީހަކަށް އޮތް މިނިވަންކަމެއްވެސް ނޫނެވެ. އިސްލާމްދީނަށް ބަދުބަސް ބުނުމަކީ އޭގެ އުޤޫބާތް މި ދުނިޔެމަތީގައިވެސް ލިބިދާނޭ ކަމެކެވެ. މިފަދަ އަލިގަދަ ހެތްކެއް މިފަހުން މިވަނީ ފެނިގެން ގޮސްފައެވެ. އެއީ ޠާރިޤް ފައްތާޙް ނަމަކަށް ކިޔާ މީހެއްގެ މަރުގެ ހާދިސާއެވެ. މިއިން ކޮންމެ ހާދިސާ އަކީ މުސްލިމުންނަށް ދިރިހުރި އިބުރަތްތަކެކެވެ.

ޕާކިސްތާނުގެ ކަރާޗީއަށް އުފަން ޠާރިޤް ފައްތާޙަކީ އިންސާނީ ހައްޤުތަކުގެ ވާހަކަ ދައްކާ ބަސްކިޔާ އުޅުނު ނޫސްވެރިއެކެވެ. ޕާކިސްތާނަށް އުފަންވި ނަމަވެސް، ކެނެޑާގައި ވަޒަންވެރިވެ، ކެނެޑާގެ ރަށްވެހިކަން ހޯދާ، ކެނެޑާގައި އުޅެމުން އައި ފައްތާޙަކީ މުސްލިމު އާއިލާއަކަށް އުފަންވި މީހެއް ނަމަވެސް އޭނާ ވަނީ އިސްލާމްދީން ދޫކޮށްލާފައެވެ.

ނޫސްވެރިކަމުގެ ދާއިރާގައި ފައްތާޙް، ކެނެޑާގައި މަސައްކަތް ކުރަމުންދިޔައީ ދީނީ މިނިވަންކަމަށް ގޮވާލަމުންނެވެ. އަދި އެއްޖިންސުން ގުޅުންހިންގުމުގެ ހައްޤަކީވެސް އޮންނަން ޖެހޭނޭ ހައްޤެެއް ކަމަށް އޭނާ އައީ ހަބަރާއި ނޫހުގެ ވަސީލަތްތައް މެދުވެރިކޮށް ހާމަކުރަމުންނެވެ. އެގޮތުން އޭނާ ލިޔުނު ލިޔުމެއްގައި އިސްލާމްދީނަށް ވަނީ ވަރަށް ބޮޑަށް ފާޑުކިޔާފައެވެ. އަދި އިސްލާމް ދީނަކީ "ކެންސަރެއް" ކަމަށްވެސް އޭނާ ވަނީ ސިފަކޮށްފައެވެ.

އިސްލާމް ދީނަށް މިހާބޮޑަށް ފާޑުކިޔާ، ހަބަރާ ނޫސްލިޔަމުން އައި ޠާރިޤް ފައްތާޙުގެ މަރު، ދިރިތިބީންނަށް ޢިބުރަތަކަށް ނުވޭހެއްޔެވެ؟ މިހިނގާ އޭޕްރީލް 24 ވަނަ ވީދުވަހު، ފައްތާޙް މަރުވެފައިވަނީ ކެނެޑާގެ ޓޮރޮންޓޯގެ ހޮސްޕިޓަލެއްގައި ފަރުވާދެމުން ދަނިކޮށެވެ. ނޫސްވެރިކަމުގެ ދާއިރާގައި އުޅުނު ފައްތާޙް ގެ ހާލު ދެރަވެގެން ދިޔައިރުވެސް، އޭނާގެ ބަލީގެ ހަގީގަތެއް ނޫސްތަކަށް ތިލަވެފައެއް ނެތެވެ. ފަހަރުގައި ދުނިޔޭގެ ލަދަށް، އެވާހަކަތައް އޭރު، ހާމަނުކުރީ ކަންނޭނގެއެވެ. ނަމަވެސް އޭނާ މަރުވުމާއި އެކު، އޭނާގެ ދަރިންނާ ހަވާލާދީ މީޑިއާ ހަބަރުތައް ބުނާގޮތުން ޠާރިޤް ފައްތާޙް މަރުވެފައި ވަނީ ދިގުމުއްދަތަކަށް ކެންސަރަށް ފަރުވާކުރަމުން ދަނިކޮށް، ކެންސަރު ބަލީގައެވެ.

އިސްލާމްދީނަކީ "ކެންސަރެއް" ކަމަށް ސިފަކުރި ނިކަމެތި އިންސާނާ، މިދުނިޔެ ދޫކުރަން އެ ޖެހުނީ ކެންސަރު ބަލީގައެވެ. އިސްލާމީ ބައެއް ނޫސްމަޖައްލާތަކުގައިވެސް މި ވާހަކަ މިގޮތަށް ގެނެސްފައި ވެއެވެ.

އޭ މުސްލިމުންނޭވެ! މިފަދަ މަރުތަކާ ހާދިސާތަކުން ޢިބުރަތެއް ހާސިލް ކުރާކަށް ނުވޭ ހެެއްޔެވެ؟ އިސްލާމް ދީނަށާއި މާތް ﷲ އާއި އެކަލާންގެ ރަސޫލުންނަށް ފުރާސަރަކޮށް މަލާމާތް ކުރުމަކީ އާދައިގެ ކަމެއް ނޫނެވެ. އެއީ އެކަމުގެ ނިމުން ހިތި ކަމެކެވެ. އޭގެ ވޭން ބޮޑު ކަމެކެވެ. މާތް އަޅަމެން ދިވެހިންނާއި އެންމެހާ މުސްލިމުންނީ، މިފަދަ މަގަކުން ނުދާނޭ ބަޔަކު ކަމުގައި ލައްވާށިއެވެ.