މި އަހަރުގެ ފުރަތަމަ ކުއާޓަރުގައި ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ޖުމްލަ އާމްދަނީގެ ގޮތުގައި 4.4 ބިލިއަން ރުފިޔާ ލިބިއްޖެ އެވެ.
މިއީ މިދިޔަ އަހަރުގެ ފުރަތަމަ ކުއާޓަރުގައި އެސްޓީއޯ އަށް ލިބުނު އާމްދަނީއާ އަޅާބަލާއިރު 9 އިންސައްތައިގެ އިތުރުވުމެކެވެ. އެގޮތުން، 2022 ވަނަ އަހަރުގެ ފުރަތަމަ ކުއާޓަރުގައި އެސްޓީއޯ އަށް އާމްދަނީގެ ގޮތުގައި ލިބިފައިވަނީ 4.04 ބިލިއަން ރުފިޔާ އެވެ.
ފުރަތަމަ ކުއާޓަރުގައި އެސްޓީއޯގެ އާމްދަނީ އިތުރުވެފައިވާއިރު، އެ ކުންފުންޏަށް ލިބުނު ޖުމްލަ ފައިދާ ވެސް ވަނީ މިދިޔަ އަހަރުގެ ފުރަތަމަ ކުއާޓަރަށް ވުރެ އިތުރުވެފައެވެ. މި އަހަރުގެ ފުރަތަމަ ކުއާޓަރުގައި ޖުމްލަ ފައިދާގެ ގޮތުގައި 809 މިލިއަން ރުފިޔާ ލިބިފައިވާއިރު، މިދިޔަ އަހަރުގެ އެ މުއްދަތުގައި ޖުމްލަ ފައިދާގެ ގޮތުގައި ލިބުނީ 469 މިލިއަން ރުފިޔާ އެވެ.
އެ ކުންފުނީގެ ވެބްސައިޓްގައި ޢާއްމުކޮށްފައިވާ މާލީ ހިސާބުތަކުން ދައްކާގޮތުން، މިދިޔަ އަހަރުގެ ފުރަތަމަ ކުއާޓަރުގައި އޮޕަރޭޓިން ޕްރޮފިޓްގެ ގޮތުގައި 503 މިލިއަން ރުފިޔާ ލިބިފައިވެއެވެ. މީއީ 2022 ވަނަ އަހަރުގެ ފުރަތަމަ ކުއާޓަރާ އަޅާބަލާއިރު 59 އިންސައްތައިގެ އިތުރުވުމެކެވެ.
ޓެކުހަށް ކެނޑުމުގެ ކުރިން، އެސްޓީއޯ އަށް މިދިޔަ ކުއާޓަރުގައި 436 މިލިއަން ރުފިޔާ ލިބިފައިވާއިރު، މިއީ އޭގެ ކުރީ ކުއާޓާ އަށް ވުރެ 29 އިންސައްތައިގެ ކުރިއެރުމެކެވެ. އަދި ޓެކުހަށް ކެނޑުމަށްފަހު މި ކުއާޓާރުގެ ސާފު ފައިދާއަކީ 368 މިލިއަން ރުފިޔާ އެވެ. މިއީ އޭގެ ކުރީ ކުއާޓަރާ އަޅާބަަލާއިރު 27 އިންސައްތައިގެ އިތުރުވުމެކެވެ.