އެސްޓީއޯ އިން ވިއްކާ ތެލުގެ އަގު ހެޔޮ ކޮށްފިއެވެ.

ރާއްޖެ އަށް އެންމެ ގިނަ އިން ތެޔޮ އެތެރެކޮށް ވިއްކާ އެސްޓީއޯ އިން ވަނީ އެ ކުންފުނީގެ ސަބްސިޑިއަރީ ކުންފުނި ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން ޕެޓްރޯލް ލީޓަރެއް ވިއްކާނީ 15.14ރ. އަދި ޑީސަލް ލީޓަރެއް 15.70ރ. އަށެވެ.

 

މިއީ ރަޝިއާ-ޔޫކްރޭން ހަނގުރާމަ ފެށުނު ފަހުން ވޭތުވެދިޔަ 14 މަސްދުވަހުގެ ތެރޭގައި ރާއްޖެއިން ތެލުގެ އަގު ހެޔޮ ކުރި ދެވަނަ ފަހަރެވެ.

އެސްޓީއޯ އިން މިދިޔަ އަހަރުގެ ޖޫން މަހުގައި ތެލުގެ އަގުބޮޑުކުރިއިރު އޭރު ޕެޓްރޯލް ލީޓަރެއް 16.55ރ. ވިއްކަމުންދިޔައިރު، ޑީސަލް ލިޓަރެއް ވިއްކީ 16.77ރ. އަށެވެ. އޭގެފަހުން، މިދިޔަ އޯގަސްޓް މަހުގައި ތެލުގެ އަގު ހެޔޮކުރިއިރު، ޕެޓްރޯލް ލީޓަރެއް ވިއްކަމުންދިޔައީ 15.97ރ. އަދި ޑީސަލް ލީޓަރެއް 16.32ރ. އަށެވެ.

އެހެންކަމުން މި ފަހަރު އެސްޓީއޯ އިން ތެލުގެ އަގަށް ގެނައި ބަދަލުގެ ސަބަބުން ރާއްޖޭގެ ބާޒާރުގައި ޕެޓްރޯލް ލީޓަރަކުން 83 ލާރި އަދި ޑީސަލް ލީޓަރަކުން 62 ލާރި ކުޑަވެގެންދާނެ އެވެ. 

އެސްޓީއޯ އިން މިދިޔަ އަހަރު ފެށުނުއިރު ޕެޓްރޯލް ލީޓަރެއް ވިއްކަމުން ދިޔައީ 11.16ރ. އަށެވެ. އަދި ޑީސަލް ލީޓަރެއް ހުރީ 11.84ރ. ގައެވެ.

މިހާތަނަށްއައިއިރު ދުނިޔޭގެ ބާޒާރުގައި ތެލުގެ އަގު އިންތިހާ އަށް ބޮޑުވަމުންއައިއިރު ރާއްޖޭގައި އެ ނިސްބަތުން ތެލުގެ އަގު އިތުރުކޮށްފައެއްނުވެއެވެ.