އުރީދޫ މޯލްޑިވްސްގެ ހެޑް އޮފް ބްރޭންޑް އެންޑް މާކޮމްސްގެ މަގާމަށް ނޫރާ ޒާހިރު ޕްރޮމޯޓްކޮށްފިއެވެ.
މީގެކުރިން، ނޫރާ ހުންނެވީ ބްރޭންޑާއި މާކޮމްސްގެ ސީނިއާ މެނޭޖަރުގެ މަގާމުގައެވެ. ނޫރާ ވަނީ ވޭތުވެދިޔަ އެގާރަ އަހަރު އުރީދޫ މޯލްޑިވްސް އަށް ނުހަނު އަގުހުރި ހިދުމަތްތަކެއް ކުރައްވާފައެވެ.
ވަތަނިޔާ މޯލްޑިވްސްގެ ނަމުގައި 2005 ވަނަ އަހަރުގެ އޯގަސްޓް މަހުގެ 1 ވަނަ ދުވަހުން ފެށިގެން ރާއްޖޭގެ ހުރިހާ ކަންކޮޅުތަކެއްގައި މުވާސަލާތީ ހިދުމަތްދޭން ފެށި ގަތަރަށް ނިސްބަތްވާ މި ކުންފުނިން، އުރީދޫ މޯލްޑިވްސްގެ ނަމަށް ރީބްރޭންޑް ކުރި ކުރުމާ ހަމައަށާއި، އޭރުން ފެށިގެން އަދި އަދަށް ދާންދެން ވެސް އެ ކުންފުނިން ދެމުންއައި ހިދުމަތްތަކަށް ކުޑަކޮށްވެސް ބުރޫ އަރާފައެއް ނުވެއެވެ.
އުރީދޫ މޯލްޑިވްސް އަކީ ރާއްޖޭގައި މިހާރު އެންމެ ހަލުވި ސްޕީޑެއްގައި ކުރިއަރަމުން އަންނަ މުވާސަލާތީ އެއް ކުންފުންޏަށްވާއިރު، ވަރަށް ކުޑަ ދުވަސްކޮޅެއްގެ ތެރޭގައި އެ ކުންފުނިން ވަނީ ދިވެހިންގެ އިތުބާރު ހޯދާފައެވެ.
މިއަދު އެ ކުންފުންޏަކީ ހަމައެކަނި މުވާސަލާތީ ހިދުމަތްތައް ދޭ ކުންފުންޏެއްގެ ގޮތުގައި އޮތް އޮތުން ބަދަލުވެ، ވަކިވަކި ރަށްތަކަށް އުމްރާނީ ގޮތުން އެހީތެރިވުމާއި، އެކި ސިނާއަތުގައި އެހީތެރިވެ، ހާއްސަކޮށް ރާއްޖޭގެ ފަތުރުވެރިކަން ދުނިޔެއަށް އިސްތިހާރުކުރުމުގައި ވެސް މުހިއްމު ބައިވެރިއެއްގެ ގޮތުގައި އެ ކުންފުނިން ދަނީ ހަރަކާތްތެރިވަމުންނެވެ.