މަސްވެރިކަމަކީ ދިވެހިންގެ ލޭނާރެވެ. އެހެނީ މިއީ ދިވެހިން ދިވެހިންނަށް ހަދައިދިން މަސައްކަތެވެ. ބުނެވޭގޮތުގައި މި ރާއްޖޭގައި މީހުން ވަޒަންވެރިވީއްސުރެ މަސްވެރިކަމަކީ ކުރަމުން އަންނަ ކަމެކެވެ. މަސްވެރިކަމުގެ ތެރޭގައި ކުދިބޮޑު އެންމެންގެ ބައިވެރިވުން އޮންނައިރު، މިއީ އަންހެނުންގެ ބައިވެރިވުންވެސް އޮންނަ ކަމެކެވެ. ހަމައެކަނި މަސް ކެއްކުމަކު ނޫނެވެ. މަހަށް ދިއުމުގައިވެސް މެއެވެ. އެގޮތުން ދިވެހި މުޖުތަމައުތަކުގައި އޮންނަ ރީތި އެއް ވައްޓަފާޅިއަކީ އާއިލީ މަސްދަތުރުތަކެވެ.
އާއިލީ މަސްދަތުރުތަކަކީ އެޒަމާނަށްވުރެ، މިފަހުގެ ތާރީޚުތަކުގައި ދިވެހިންގެ ތެރޭގައި އާއްމުވެގެން އުޅޭ ކަމެކެވެ. މިއީ ވަރަށްވެސް އުފާވެރިކަމެކެވެ. ކުދިކުދި އާއިލާތަކުން ފެށިގެން ބޮޑެތި އާއިލާތަކުންވެސް މިފަދަ އާއިލީ މަސްދަތުރުތައް ރާވާ އިންތިޒާމު ކުރެއެވެ. އާއްމުވެ އާއިލީ މަސްދަތުރު ދާ މީހުން ބުނާގޮތުގައި ފަޅު ރަށަކަށް ދަތުރު ގޮސް އެ ހޭދަކުރާ ވަގުތުތަކަށްވުރެ، އާއިލާއާއި އެކު މަސްވެރިކަމަށް ނުކުމެލުމުން ލިބޭ ހިތްހަމަޖެހުމާއި އުފާވެރިކަން ބޮޑެވެ.
ކުދިކުދި އާއިލާތަކުން ދާ މިފަދަ މަސްދަތުރުތައް އާއްމު ގޮތެއްގައި ދަނީ މެންދުރުފަހެވެ. ނުވަތަ ހަވީރެވެ. މިހެން ކުދި އާއިލާތަކުން މަސްދަތުރުގޮސް، ދަޅަ ކަނޑާލާ ހަނދުވަރުގެ އަލިކަމުން އުފާވެރިކަން ހޯދައެވެ. މިފަދަ މަސްދަތުރު ތަކުގައި އެ ކުދި އާއިލާތަކުގެ ހަމަ ހުރިހާ އެއްމެންހެ ބައިވެރި ވެއެވެ. ކުދިކުދި ކުދިންވެސް އަންހެނުންވެސް މަސްބޭނުމުގައި އުޅެއެވެ.
ބޮޑެތި އާއިލާތަކުން މަސްދަތުރުތައް ދަނީ ބޮޑެތި ދޯނިފަހަރުގައެވެ. އެ ދޯނިފަހަރުގައި ކައްކައިގެން ކާ ގޮތަށެވެ. މިގޮތަށް ދާ ބޮޑެތި އާއިލާ ތަކުގައި މާމައިންނާ ކާފައިންވެސް ބައިވެރިވެއެވެ. އެމީހުންގެ ދަރިންނާއި ދަރީންގެ ދަރީންވެސް މެއެވެ. އެއްމެން އެއްކޮށްހެން މިފަދަ އާއިލީ މަސްދަތުރުތަކުގައި މަސްބޭނުމުގައި އުޅޭ އިރު، މަސްވެރިކަމުގެ ވާދަވެރިކަން އުފެދި، ދަތުރުގެ ފޯރިވެސް ގަދަވެގެން ދެއެވެ. ސަމާސާ ކުރުމާއި ސަކަރާތް ޖެހުންވެސް އިންތިހާއަށް އޮވެއެވެ. މަސްބޭނުމުގެ ސަކަރާތުގައި ތުއްތު ކުދިންނާއި ބޮޑެތިމީހުން އެ އުޅޭ އުޅުމުގައި ފެންނަނީ އުފާވެރިކަމެވެ.
މަސްބޭނުމަކުން އަދި މިފަދަ މަސްދަތުރުތަކެއް ނުނިމެއެވެ. މަސްބޭނުމަށްފަހު، ރަށަށް އައިސް، އެ މަސްތައް ފިހުމާއި ކެއުން އެއީ އަދި މި ދަތުރުތަކުގައި މާ ފޯރިގަދަ ބައެކެވެ. އެއްމެން އެއްކޮށް އެ މަސްތައް ފިހުމާއި އަދި ކެއުމުގައި އެ އުޅޭ އުޅުމަކީވެސް އެހާމެ އުފާވެރި މަންޒަރެކެވެ. ހާލަތު ނިޔާކުރި ގޮތަކުން މަހަށް ނުދެވުނު އެ އާއިލާގެ މެންބަރެއް ރަށުގައި ހުރިނަމަ އެ މަސްފިހުމުގައި ބައިވެރިވާނެއެވެ. އަދި މަހަށް ނުދިޔަ ކަމަށްޓަކައި ހަވާދު ފުނޑުމުގެ ޒިންމާ، ގިނަފަހަރަށް އަޅުވާނީ ރަށުގައި ހުންނަ މީހެއްގެ ބޮލުގައެވެ.
އާދޭހެވެ! އާއިލާތަކުގެ ގުޅުންތައް ބަދަހިކޮށް އާއިލާތަކަށް އުފާވެރިކަން ގެނެސްދިނުމަކީ ކޮންމެ އާއިލާއެއްގެ ހަމަ ކޮންމެ މެންބަރެއްގެވެސް ޒިންމާއެކެވެ. އެހެންކަމުން މިފަދަ އާއިލީ މަސްދަތުރުތަކަކީ އާއިލީ ގުޅުންތައް ބަދަހިކޮށްލުމަށް ރާވާ އިންތިޒާމު ކޮށްލެވޭނެ ރަނގަޅު ކަމެކެވެ. އަދި މިއީ ބައެއް ރަށްރަށުގައި އާދަވެ ކުރަމުން އަންނަ ކަމެއްވެސް މެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން