މިއަދު މާލެ އަށް ކުރަމުންދާ ވިއްސާރަ އާ ގުޅިގެން ކަރަންޓް ބޭނުންކުރި މިންވަރު ދަށަށް ގޮސްފައިވާ ކަމަށް ސްޓެލްކޯ އިން ބުނެފިއެވެ.
މާލޭ ސަރަހައްދުގެ އެވްރެޖް ޕަވަރ ޔޫސޭޖް ނުވަތަ އެވްރެޖް އެނާރޖީ ކޮންސަމްޕްޝަން މިއަދު ދަށަށް ގޮސްފައިމިވަނީ، ވޭތުވެދިޔަ ދުވަސްތަކުގައި ހޫނު ގަދަވެ، އިންތިހާ އަށް ކަރަންޓް ބޭނުންކުރަމުންދިއުމުގެ ސަބަބުން ސްޓެލްކޯ އިން ކަރަންޓް އިގްތިޞާދު ކުރުމަށް އެކި ފަހަރުމަތީން އިލްތިމާސްކޮށްފައިވަނިކޮށެވެ.
މީގެކުރީން، މިދިޔަ އޭޕްރީލް މަހުގެ 24 ވީ ހޯމަ ދުވަހުގެ މެންދުރު 14:10 ގައި މާލެ އާއި ހުޅުމާލެ ހިމެނޭ ސަރަހައްދުގެ ޕީކްލޯޑް 102 މެގަވޮޓަށްވުރެ މައްޗަށް ގޮސްފައިވާކަމަށް ސްޓެލްކޯ އިން ވަނީ ހާމަކޮށްފައެވެ.
އެއީ މި އަހަރުގައި މިހާތަނަށް އެންމެ ގިނައިން ކަރަންޓް ބޭނުންކުރި ދުވަސްކަމަށް ސްޓެލްކޯ އިން ވަނީ ފާހަގަކޮށްފައެވެ. އަދި އޭރު ސްޓެލްކޯ އިން ބުނަމުންދިޔައީ، އެ ކުންފުނީގެ ތަފާސްހިސާބުތަކުން ދައްކާ ގޮތުން އެހެން ދުވަސްވަރުތަކާ ޚިލާފަށް މިދިޔަ ދުވަސްތަކުގައި ޖައްވު ހޫނުވުމުގެ ސަބަބުން ރޭގަނޑުގެ ވަގުތުތަކުގައި ކަރަންޓު އުފައްދަންޖެހޭ މިންވަރު އިތުރުވެފައިވާ ކަމަށެވެ.
މާލޭގެ ކަރަންޓް ލޯޑު މިއަދު ދަށަށް ދިޔަކަން ފާހަގަކުރައްވައި ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް އާދަމް ކުރެއްވި ޓުވީޓެއްގައިވާގޮތުން އިއްޔެ އަކީ ވެސް މާލެ އަށް ހޫނު ދުވަހެއް ކަމުން މާލޭ ސަރަހައްދުގައި ނިސްބަތުން ގިނައިން ކަރަންޓް ބޭނުންކޮށްފައިވެއެވެ.
އެގޮތުން، އިއްޔެ 15:00 ގައި މާލޭގައި ލޯޑް ހުރީ 66 މެގަވޮޓްގައި، ހުޅުމާލޭގެ ލޯޑް 23.5 މެގަވޮޓްގައި ހުރިއިރު މި ސަރަހައްދުގެ ޖުމްލަ ލޯޑް ހުރީ 93 މެގަވޮޓްގައެވެ. އެކަމަކު، މިއަދު މާލެ އާއި ހުޅުމާލެ އަށް ކުރި ވިއްސާރައިގެ ސަބަބުން 15:00 ގައި ލޯޑް ވަނީ ދަށަށް ގޮސްފައެވެ. މާލޭގެ ލޯޑް 53 މެގަވޮޓްގައި ހުރިއިރު، ހުޅުމާލޭގެ ލޯޑް ވަނީ 18.8 މެގަވޮޓަށް ވެއްޓިފައެވެ. މިއާއެކު، މިއަދު 15:00 ގައި މާލޭ ސަރަހައްދުގެ ޖުމްލަ ލޯޑް ހުރީ 74.7 މެގަވޮޓްގައެވެ.
އެހެންކަމުން، އިއްޔެ އާއި މިއަދު މާލޭ ސަރަހައްދުގައި ކަރަންޓު ބޭނުންކުރި މިންވަރުގެ ތަފާތަށް ބަލާލާ ކަމަށްވާ ނަމަ، ވިއްސާރައިގެ ސަބަބުން މިއަދު ކަރަންޓް ބޭނުންކުރި މިންވަރު ވަނީ 18.3 މެގަވޮޓް ދަށަށް ގޮސްފައެވެ. މިއީ ގާތްގަނޑަކަށް 20 އިންސައްތައިގެ ވެއްޓުމެކެވެ.