އެސްޓީއޯ ޕީޕަލްސް ޗޮއިސް އިން ވިޔަފާރިކުރާ ފަރާތްތަކަށް އުރީދޫގެ "އެމް-ފައިސާ" މެދުވެރިކޮށް ފައިސާ ދެއްކުމުގެ ހިދުމަތް މިއަދު ތަޢާރަފްކޮށްފިއެވެ.
އެސްޓީއޯ ޕީޕަލްސް ޗޮއިސްގައި މިއަދު ބޭއްވި ހާއްސަ ރަސްމިއްޔާތެއްގައި އެ ހިދުމަތް ރަސްމީކޮށް އިފްތިތާހުކޮށްދެއްވީ އެސްޓީއޯގެ މެނޭޖިންގެ ޑިރެކްޓަރު އަބްދުﷲ ސައީދު އަދި އުރީދޫ މޯލްޑިވްސްގެ ސީއީއޯ ޚާލިދު އަލް ހަމާދީ އެވެ.
އުރީދޫ އިން ބުނީ، އެސްޓީއޯ އާއެކު ހަދާފައިވާ މި ޕާޓްނާޝިޕްގެ ސަބަބުން ވިޔަފާރިކުރާ ފަރާތްތަކަށް "އެމް-ފައިސާ" މެދުވެރިކޮށް ފަސޭހަކަމާއެކު، އަވަސް އަދި ރައްކާތެރި ޕޭމަންޓް ދެއްކޭނެ ޒަމާނީ ހައްލެއް ހޯދައިދެވިފައިވުމަކީ ލިބުނު ވަރަށް ބޮޑު އުފަލެއް ކަމަށެވެ.
"އެމް-ފައިސާ" އަކީ އުރީދޫ މޯލްޑިވްސްގެ އެޕްލިކޭޝަން މެދުވެރިކޮށް ފައިސާ ޖަމާކުރުމަށާއި، ނެގުމަށާއި ޓްރާންސްފާ ކުރުމަށް އަދި ވިޔަފާރިކުރުމުގައި ފައިސާ ދެއްކުމަށް ކޮންމެ ތަނަކު އަދި ކޮންމެ ވަގުތެއްގައި ވެސް ބޭނުންކުރެވޭ ޑިޖިޓަލް ޕޭމަންޓް ހިދުމަތެކެވެ.
އުރީދޫގެ "އެމް-ފައިސާ" އަށް ރަޖިސްޓްރީ ކުރުމަށް http://ore.do/mf އިން އުރީދޫ އެޕް ޑައުންލޯޑް ކުރައްވާށެވެ. ކޮންމެ ނެޓްވޯކެއްގެ ކަސްޓަމަރުންނަށް ވެސް މި ހިދުމަތް ބޭނުންކުރެއްވޭނެ ކަމަށް އުރީދޫ އިން ބުނެއެވެ.