ކަންފަތަކީ އެތަނުގެ ތެރޭގައި ހެތް ހޫނުކަމެއް އެކުލެވިގެންވާ ތަނެކެވެ. އަދި އަނދިރިކަމެއްވެސް ހިސާބަކަށް ވާ ތަނެކެވެ. ހޮޅުވިފައިވާ ހޮހޮޅައެއްހެން އިންސާނާގެ ކަންފަތް ހުންނަ އިރު، އެތަނަކީ ބައެއް ދިރޭތަކެތި ޝައުގުވެރިވާ ތަނެކޭ ބުނުމުން ހައިރާން ވާން ޖެހޭނެ ހެއްޔެވެ؟ ކަންފަތަށް އެކި ކަހަލަ ދިރޭ އެއްޗެހި ވަނުމަކީ އާދައިގެ ކަމެކެވެ. ދުނިޔޭގެ ބައެއް ހިސާބުތަކުގައި އެއީ އާއްމު ކަމެކެވެ. އާދައިގެ އާއްމު ކަމެއް ކަމުގައި މިކަން ވީނަމަވެސް މިއީ ނުރައްކާވެސް ވެދާނެ ކަމެކެވެ. ބިރުވެރި ފަކުރު އިހުސާސްތަކެއްވެސް ކުރުވަފާނޭ ކަމެކެވެ.
ކަންފަތަށް ވަންނަ ބައެއް ސޫފިތަކުގެ ތެރެއިން ކުރަތްޕަކީ އާއްމުކޮށް ކަންފަތަށް ވަންނަ ސުއިއްޕެކެވެ. އާނއެކެވެ! ކަންފަތަށް ކުރަފި ވަންނަ ވާހަކަ އަކީ ހަމަ ހަގީގަތުގައިވެސް ތެދު ވާހަކައެކެވެ. އެހެންކަމުން ކުރަފި ދެކެ ބިރުގަންނަ މީހުން އެމީހުންގެ ކަންފަތްތަކާއި މެދު ސަމާލު ވާށެވެ.
ކުރަތްޕެއް ކަންފަތަށް ވަދެވާނެ ނުވަތަ ވަނުމަށް ޝައުގުވެރިކުރުވާ ސަބަބުތަކެއް ހުރެއެވެ. ކުރަތްޕަކީ އަނދިރި ކަމަށް ލޯބިކުރާ، ތެތްކަމަށް ލޯބިކުރާ އަދި ހެތް ހޫނަށްވެސް ލޯބި ކުރާ އެއްޗެކެވެ. އެހެންކަމުން މި ސިފަތަކަކީ ކަންފަތުގައި ހުންނަ ސިފަތަކެއް ކަމުން، ކުރަތްޕެއް ކަންފަތަށް ނުވަންނާންވީ ކީއްޗެ ހެއްޔެވެ؟ މި ސިފަތަކުގެ އިތުރުން، އިންސާނާގެ ކަންފަތުގައި އުފެދޭ މަޑަކީ އޭގައި ވަހެއް އެކުލެވޭ އެއްޗެކެވެ. ކުރަތްޕަކީ އިންސާނާގެ ހަށިގަނޑުން ބޭރުވާ ނުވަތަ އުފައްދާ ބޭކާރު ނުވަގަ ނަޖިސްތަކެއްޗަށް ދޯޅަ އެއްޗެކެވެ. އެމަގުން ކަންފަތުންގައި ހުންނަ މި މަޑުތަކަކީވެސް ކުރަފި އެ އެއްޗަކަށް ޝައުގުވެރިވާ އެއްޗެކެވެ. އޭގެ ވަސް އިންސާނުންނަށް މާ ގަދަޔަށް ނުދުވިޔަސް، ކުރަތްޕަށް އެފަދަ ވަސްތައް ދުރުން ދެނެގަންނަން އެނގެއެވެ.
ކަންފަތުގައި މަޑު އުފެދިފައި ހުރެމެ، ކަންފަތުގައި ފެން ނުވަތަ ތެތްކަމެއް މާ ބޮޑަށް ހުރެއްޖެނަމަ، އެ މަޑުގެ ވަސް ގަދަވެއެވެ. ނަތީޖާއަކަށްވަނީ ކުރަފިފަދަ ސޫފިތަކުގެ ޝައުގުވެރިކަން އުފެދުމެވެ.
އެމެރިކާގެ ހޮސްޕިޓަލް ސެޓިންގްސް އައުޓްޕޭޝަންްޓް ސްޓެޓިސްޓިކްސް ގެ އީ.އެން.ޓީ ތަފާސް ހިސާބުތައް ދައްކާ ގޮތުގައި، ކަންފަތަށް އެއްޗެއް ވަދެގެން ހޮސްޕިޓަލުތަކުގައި ފަރުވާ ހޯދާ މީހުންގެ %8 މީހުން ފަރުވާ ހޯދާފައިވަނީ ކުރަތްޕެއް ކަންފަތަށް ވަދެގެންނެވެ. އެހެންކަމުން މިއީ ހަމަ ވަރަށް އާއްމު ކަމެކެވެ. އަދި ވުންވެސް ވަރަށް ގާތް ކަމެކެވެ. ބައެއް ދިރާސާތަކުގައި ބުނާ ގޮތުގައި އިންސާނާ ނިދާފައި އޮންނަ ވަގުތު، ކުދި ކުރަފި، އިންސާނާގެ ކަންފަތުގެ ތެރެއަށް ވަދެ، މަޑު ކައި ހެދެމަށްފަހު، ނުކުމެގެން ދިއުމަކީ އާއްމުކޮށް ހިނގާ ކަންކަމެވެ. ނަމަވެސް އެކަން ގިނަ މީހުންނަށް އިހުސާސްވެސް ނުކުރެވެއެވެ.
ފަހަރުގައި ދިވެހިރާއްޖޭގައި މިކަންކަން މިހާ އާއްމު ކަމަކަށް ނުވެދާނެއެވެ. ނަމަވެސް ފަގީރު ބައެއް ހިސާބުތަކުގައި އަދި ސާފުތާހުރުކަން ކުޑަ، ތޮށްޖެހުން ބޮޑު މުޖުތަމައުތަކުގައި މިއީ އާއްމު ކަންކަމެވެ. އެހެންކަމުން ކަންފަތަށް ކުރަތްޕެއް ވަނުމަށް ނޭދޭ މީހާ ކަންފަތް ހިއްކަން ސަމާލުކަން ދޭންވާނެއެވެ. ކޮންމެވެސް ވަރަކަށް މަޑު ހުއްޓެއް ކަމަކު، ތެތްކަން ކުޑަ ނަމަ، ވަސް ދުވުން ކުޑަ ވާނެއެވެ. އެހެންކަމުން އެއްމެ މުހިއްމު ކަމަކީ ކަންފަތް ހިތްކުމެވެ. ކަފަބުރެއްފަދަ އެއްޗަކުން ކަންފަތުގެ ތެރޭގައި އަށަގަނެފައި ހުންނަ ފެންތައް ހިއްކާލާ ފުހެލުމެވެ. އޭރަށް ކަންފަތަށް ކުރަފި ވަނުމުގެ ފުރުސަތު ބޮޑުރަނުން ކުޑަ ކުރެވޭނެެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން