ށ. ފޭދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތް ނިމިފައިވާ ކަމަށް އެމްޓީސީސީ އިން ބުނެފިއެވެ.
1،335 މީހުންގެ އާބާދީގެ ށ. ފޭދޫ އަކީ ޖާގަ ތަނަވަސް ގާމަތީ ރަށެކެވެ. ފަޅުކުޑަ ގާމަތީ ރަށަކަށްވުމާއެކު، ފޭދޫ އަކީ ޒަމާނުއްސުރެ ލަފާފުރުމުގެ ދަތިކަން ތަހަންމަލު ކުރަމުން އައިސްފައިވާ ރަށެކެވެ. އެގޮތުން، މޫސުން ގޯސް ދުވަސްވަރު ރަށު ބަނދަރު ބޭނުންކުރުމަކީ އޮޑިދޯނި ފަހަރުތަކަށް ދަތި އުނދަގޫ ކަމަކަށް ވަނީ ވެފައެވެ.
މީގެއިތުރުން، ބަނދަރުގައި އުޅަނދުފަހަރު ގިނަވަމުންދިއުމާއެކު، ބަނދަރުގެ ޖާގަވެސް ވަނީ ރަށުގެ ބޭނުންތަކަށް ފުދޭވަރަށްވުރެ ކުޑަވެފައެވެ. ހަމައެހެންމެ ކޮޅުވެއްޓި ފަދަ އުޅަނދުތައްވެސް ކައިރިކޮށްލާނެ ރޭމްޕެއް ނެތުމާއެކު، އެފަދަ އުޅަނދުތަކަށްވެސް މުދާ އަރުވާ ބޭލުމުގައިވަނީ ދަތިތަކާ ކުރިމަތިލާންޖެހިފައެވެ.
ނަމަވެސް ފޭދޫ ބަނދަރު ތަރައްޤީކުރުމުގެ މިހާރު ނިމިފައިވުމާއެކު، އެ ރަށުގެ ރައްޔިތުންނަށް މިވަނީ ކުރިއަށްވުރެ ޖާގަ ތަނަވަސް ޒަމާނީ ރީތި ބަނދަރެއް ލިބިފައެވެ. މި ބަނދަރާއެކު، ފޭދޫ ރައްޔިތުންނަށް ލަފާފުރުމުގައި އެތައް ލުއިފަސޭހައަކާއި، ވަރަށް ބޮޑު ހިތްހަމަޖެހުމެއް ލިބޭނެ ކަމަށް އެމްޓީސީސީ އިން ދެކެއެވެ.
އަދި ބާރުބޮޑުވެފައިވާ ރަށުގެ ބަނދަރަށް ޖާގައިގެ ތަނަވަސްކަން ލިބި، ޓީ-ޖެޓީއެއް އިތުރުވެ، ކޮޅުވެއްޓި ފަދަ އުޅަނދުތައް ވެސް ކައިރިކުރެވޭނެ ފަދަ ރޭމްޕެއް ބަނދަރަށް އިތުރުވުމާއެކު، އުޅަނދުފަހަރަށް ފަސޭހައިން ގާތްކޮށް ލަފާފުރުމުގައި ގިނަ ފަސޭހަތަކެއް މިހާރު ފޭދޫގެ ރައްޔިތުންނަށް ލިބިގެންދާނެ އެވެ.
ފޭދޫ ބަނދަރު ތަރައްޤީކުރުމުގެ މަޝްރޫޢުގެ ދަށުން، 25،456 ކިއުބިކް މީޓަރުގެ ސަރަހައްދެއްގެ ބަނދަރު ފުންކުރުމާއި، 9،000 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 280 މީޓަރުގެ ސަރަހައްދެއްގައި އެއްގަމުތޮށި ލުމާއި، 110 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 317 މީޓަރުގެ ސަރަހައްދެއްގައި ބޭރުތޮށި ލުމާއި، 1،782 އަކަ މީޓަރުގެ ސަރަހައްދެއްގައި ހާބަރު ޕޭވްމަންޓް ހެދުމާއި، ރޭމްޕެއް ހެދުމާއި، މޫރިންގ ބޯއީސް ހަރުކުރުމާއި، ނެރު ބައްތި އާއި ބަނދަރު ބައްތި ހަރުކުރުމުގެ މަސައްކަތް ހިމެނެއެވެ.
މިއީ 35.67 މިލިއަން ރުފިޔާގެ މަޝްރޫޢެކެވެ.