ކޮމިއުނިޓީ ފަންޑްގެ ނަމުގައި މުޖުތަމައުގެ އެކި މަސައްކަތްތަކަށް އެހީ ދިނުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފަންޑެއް ތަޢާރަފްކޮށް، އެހީ ހޯދުމަށް އެދި ހުށަހެޅުމުގެ ފުރުޞަތު ހުޅުވާލައިފިއެވެ.

އަހަރަކު ދެ ފިޔަވައްސަށް ބަހާލައިގެން ކުރިއަށްގެންދިއުމަށް ނިންމާފައިވާ މި ފަންޑުގެ ދަށުން، މުޅި އަހަރުގައި ޖުމްލަ 600،000ރ. ޚަރަދު ކުރުމަށް ހަމަޖެހިފައިވެއެވެ. އެއީ މުޅި އަހަރަށް ބަލާނަމަ 10 މަޝްރޫޢު ކަމަށާއި، އޭގެތެރޭގައި 50،000ރ. ގެ ކުދި 8 މަޝްރޫޢު ހިމެނޭއިރު ދެން ހިމެނެނީ 100،000ރ. ބޮޑު ދެ މަޝްރޫޢު ކަމަށް ވެސް އެމްޕީއެލް އިން ވަނީ ބުނެފައެވެ.

އެމްޕީއެލް އިން ބުނީ، ފުރަތަމަ ފިޔަވަހީގެ ދަށުން ކޮމިއުނިޓީ ފަންޑަށް އެދި ހުށަހެޅުމުގެ ފުރުޞަތު މިދިޔަ އޭޕްރީލް މަހުގައި ހުޅުވާލައިފައިވާ ކަމަށެވެ. އަދި އެ ފަންޑަށް އެދި މި މެއި މަހުގެ 31 ގެ ނިޔަލަށް ކުރިމަތިލެވޭގޮތަށް އޮތްއިރު މިހާތަނަށް ހުށަހަޅާފައިވަނީ އެންމެ ދެ ފަރާތުން ކަމަށް ވެސް އެމްޕީއެލް އިން ބުނެއެވެ.

އެމްޕީއެލް އިން ފަންޑުގެ ދަށުން އެހީ ދޭ ފަރާތްތައް ކަނޑައެޅުމަށް ހާއްސަ ކޮމިޓިއީއެއް އެކުލަވާލާފައިވާއިރު، ފަންޑުގެ ދަށުން އެހީދިނުމުގައި އދ.ގެ ދެމެހެއްޓެނެވި ތަރައްޤީގެ ލަނޑުދަނޑިތަކުގައި ހިމެނޭ ކަންކަން ހާސިލް ކުރަން ހުށަހަޅާ މަޝްރޫއުތަކަށް އެހީވުމުގައި އިސްކަންދޭނެ ކަމަށް ވެސް އެ ކުންފުނިން ވަނީ ބުނެފައެވެ.

އެގޮތުން، ޕޮއިންޓް ދިނުމުގައި ވެސް އދ.ގެ ލަނޑުދަނޑިތައް ހާސިލްވާ ގޮތަށް ހުށަހަޅާ ޕްރޮޖެކްޓްތަކަށް ޖުމްލަ މާކްސްގެ ތެރެއިން، 40 ޕަސެންޓް ދޭނެ ކަމަށާއި، އަދި އުފެއްދުންތެރި ޕްރޮޖެކްޓްތަކަށް 20 ޕަސެންޓު ދިނުމުގެ އިތުރުން ޕްރޮޖެކްޓް ޕްލޭން އަދި އިމްޕްލިމެންޓް ކުރާ ގޮތަށް 30 ޕަސެންޓު ދޭނެ ކަމަށެވެ. އަދި، ހުށަހަޅާ ޕްރޮޕޯސަލްގެ ޕްރޮފައިލް އަށް 10 ޕަސެންޓު މާކްސް ދޭނެ ކަމަށް ވެސް އެމްޕީއެލް އިން ބުނެއެވެ.

އެމްޕީއެލް އިން ބުނީ، އެ ކުންފުނީގެ ކޮމިއުނިޓީ ފަންޑަށް ހުށަހެޅުމުގެ ފުރުޞަތު ހުޅުވާލެވިފައިވަނީ، ކައުންސިލްތަކާއި، ހިލޭ ސާބަހަށް މަސައްކަތް ކުރާ ސަރުކާރު އަދި އަމިއްލަ ޖަމިއްޔާތަކާއި ކްލަބްތަކުގެ އިތުރުން ސްކޫލްތަކަށް އެކަނި ކަމަށެވެ.

އެމްޕީއެލް އިން އިތުރަށް ބުނީ، ކޮމިއުނިޓީ ފަންޑުގެ ދަށުން ވަކިން ހުޅުވާލި ނަމަވެސް، ވޭތުވެދިޔަ އަހަރުތަކުގައި އެ ކުންފުނިން ދިޔައީ ސީއެސްއާރު ބަޖެޓުގެ ދަށުން، މުޖުތަމައުގެ ފައިދާއަށް ޖަމިއްޔާތަކުން ކުރާ މަސައްކަތަކަށާއި، ތައުލީމީ ދާއިރާއަށާއި، ކުޅިވަރުގެ ދާއިރާއަށްވެސް އެކި ގޮތްގޮތުން އެހީތެރިކަން ފޯރުކޮށްދެމުން ކަމަށެވެ.

އެމްޕީއެލްގެ އުއްމީދަކީ ވީހާވެސް ގިނަ ބަޔަކު ކޮމިއުނިޓީ ފަންޑަށް ކުރިމަތިލައި، އެ ފުރުޞަތުގެ ބޭނުންހިފުން ކަމަށް ވެސް އެ ކުންފުނިން ވަނީ ބުނެފައެވެ.

ޕޯޓު ކޮމިއުނިޓީ ފަންޑަށް އެދޭ ފޯމު: https://port.mv/wp-content/uploads/2023/04/PCF_Application-Form.pdf