އެމްޓީސީސީގެ 42 އަހަރުގެ ދިގު ތާރީޚުގައި މިހާތަނަށް ހާސިލްކުރި އެންމެ ބޮޑު އާމްދަނީ އަދި ހިންގުމުގެ ފައިދާ އާއެކު 2022 ވަނަ އަހަރުގެ މާލީ ހިސާބުތައް އާންމުކުރިއިރު، ރެކޯޑް އަދަދެއްގެ ފައިދާ އެ ކުންފުނީގެ ހިއްސާދާރުންނަށް ބެހުމަށް ޑިރެކްޓަރުންގެ ބޯޑުން ނިންމައިފިއެވެ.
އެ ކުންފުނީގެ މިދިޔަ އަހަރުގެ މާލީ ނަތީޖާގެ ތަފްސީލަށް ނަޒަރު ހިންގާލާއިރު 2022 ވަނަ އަހަރުގެ ޖުމްލަ އާމްދަނީގެ ގޮތުގައި 2.47 ބިލިއަން ރުފިޔާގެ ވިޔަފާރިކޮށްގެން 324.16 މިލިއަން ރުފިޔާ ވަނީ ހިންގުމުގެ ފައިދާގެ ގޮތުގައި ލިބިފައެވެ. މިއީ އޭގެ ކުރީ އަހަރު އާމްދަނީގެ ގޮތުގައި ލިބުނު 1.97 ބިލިއަން ރުފިޔާއާ އަޅާ ބަލާއިރު 26 އިންސައްތައިގެ އިތުރުވުމެކެވެ. އަދި އެ ކުންފުންޏަށް މިދިޔަ އަހަރު ލިބުނު ހިންގުމުގެ ފައިދާ ވެސް 2021 ވަނަ އަހަރާ އަޅާ ބަލާއިރު ވަނީ 1.5 އިންސައްތަ އިތުރުވެފައެވެ.
ނަމަވެސް، ރަޝިޔާ - ޔޫކްރޭން ހަނގުރާމައިގެ ސަބަބުން ދުނިޔޭގެ ބާޒާރުގައި ތަކެތީގެ އަގު އަދި ހާއްސަކޮށް ތެލުގެ އަގު އުފުލުމުގެ ސަބަބުންނާއި ބޭރު ފައިސާ ހޯދުމަށް ކުރަންޖެހުނު ޚަރަދު އިތުރުވުމުގެ ސަބަބުން 2022 ވަނަ އަހަރު ޓެކުހަށް ކެނޑުމުގެ ކުރީން ލިބުނު ފައިދާ ވަނީ 2021 ވަނަ އަހަރަށް ވުރެ 15.36 އިންސައްތަ ދަށް ވެފައެވެ. މިދިޔަ އަހަރު ޓެކުހަށް ކެނޑުމުގެ ކުރީން ފައިދާގެ ގޮތުގައި 229.53 މިލިއަން ރުފިޔާ ލިބިފައިވާއިރު، އޭގެ ކުރީ އަހަރު ލިބުނީ 271.82 މިލިއަން ރުފިޔާ އެވެ.
އެމްޓީސީސީ އިން މިދިޔަ އަހަރު ހާސިލްކުރި މާލީ ނަތީޖާއާއެކު -/5 ރުފިޔާގެ މޫނުމަތީ އަގުގެ ހިއްސާއަކަށް -/4 ރުފިޔާގެ މަގުން ޖުމްލަ ހިއްސާގެ ފައިދާގެ ގޮތުގައި 32.15 މިލިއަން ރުފިޔާ ބެހުމަށް އަހަރީ އާންމު ޖަލްސާ އަށް ހުށަހެޅުމަށް ކުންފުނީގެ ޑިރެކްޓަރުންގެ ބޮޑުން ވަނީ ނިންމާފައެވެ. މިއީ އެ ކުންފުނީގެ ތާރީޚުގައި ހިއްސާގެ ފައިދާގެ ގޮތުގައި ހިއްސާދާރުންނަށް ބެހުމަށް ހުށަހަޅާ އެންމެ ބޮޑު އަދަދުކަން ފާހަގަކޮށްލަންޖެހެއެވެ.
2022 ވަނަ އަހަރު އެ ކުންފުނިން ހާސިލްކޮށްފައިވާ ލަނޑުދަނޑިތަކަށް ބަލާއިރު ރާއްޖޭގެ ޢުމްރާނީ ތަރައްޤީގެ އައު 65 މަޝްރޫޢު އަކާއި ހަވާލުވެ، 42 މަޝްރޫޢުއެއްގެ މަސައްކަތް ވަނީ ކާމިޔާބުކަމާއެކު ނިންމާލައިފައެވެ. ނިމިގެންދިޔަ އަހަރަކީ ދިވެހިރާއްޖޭގެ ދަތުރުފަތުރުގެ ނިޒާމަށް ވެސް އެ ކުންފުނިން އިންޤިލާބީ ހެޔޮ ބަދަލެއް ގެނައި އަހަރެކެވެ. އެގޮތުން، ރާއްޖޭގެ ރަށްތައް ފެރީގެ ނިޒާމަކުން، އެއް ވިއުގައަކުން ގުޅާލުމަށް ސަރުކާރުން ވެފައިވާ ވަޢުދުގެ ދަށުން "ރާއްޖެ ޓްރާންސްޕޯޓް ލިންކް" ފެރީގެ ޚިދުމަތުގެ ފުރަތަމަ ފިޔަވަހީގައި ހިމެނޭ ޒޯން 1 ގެ ހއ.، ހދ. އަދި ށ. އަތޮޅަށް ވަނީ މިދިޔަ އަހަރު ތެރޭގައި ޚިދުމަތް ފަށާފައެވެ. މީގެއިތުރުން، ރާއްޖޭގެ އާންމު ބަހުގެ ޚިދުމަތުގެ ފެންވަރު ރަނގަޅުކޮށް ތަރައްޤީކުރުމުގެ ތެރެއިން، ރާއްޖެ ޓްރާންސްޕޯޓް ލިންކް ވިއުގަ ދަށަށް ބަދަލުކޮށް މުޅިން އައު ބަސް އަދި ޑިޖިޓަލް ޕޭމަންޓް ޕްލެޓްފޯމަކާއިއެކު ދިވެހިރާއްޖޭގެ ތާރީޚް މިހާތަނަށް ދެކެފައިނުވާފަދަ ތަރައްޤީ އާންމު ދަތުރުފަތުރުގެ ސިނާޢަތަށް ވަނީ ގެނެވިފައެވެ.