ދިގުތިޔަރަ ފަތަކީ ދިވެހިން ޒަމާނުއްސުރެ ކަމުން އަންނަ މީރު ފަތެކެވެ. ނަމަވެސް މިހާރަކަށް އައިސް ދިގުތިޔަރަ ފަތް ކެއުން ވަރަށް މަދެވެ. ފަހަރުގައި ދިގުތިޔަރަ ގަސްތައް ނެތިގެންދިއުން އެއީ އެއްމެ ބޮޑު އެއް ސަބަބު ކަމުގައި ވެދާނެއެވެ. ނަމަވެސް މިއީ ނެތިދާން ދޫކޮށްލެވޭ ވަރުގެ ފަތެއް ނޫނެވެ. ކޮޕީފަތް ހައްދާ އުސޫލުން ދިގުޔިތަރަ ނުހައްދަންވީ ސަބަބެއް ނެތެވެ.
ސާންސުކްރިތު ބަހުން ދިގުތިޔަރައަށް ކިޔަނީ "ކަސާމަރްދާ" އެވެ. އެ ބަހުގައި "ކަސާ" ގެ މާނައަކީ ކެއްސުމެވެ. "މަރްދާ" ގެ މާނައަކީ ފަރުވާއެވެ. ގަދީމީ ޒަމާނުއްސުރެ ދިގުތިޔަރަފަތަކީ ކެއްސުމަށް އޮތް ފަރުވާއެއްގެ ގޮތުގައި ބޭނުންކުރަމުން އައި ފަތެކެވެ. ސާންސުކްރިތު ބަހުން އެގަހަން އެ ނަން ދެވުނީވެސް އެމަގުންނެވެ. ދިގުތިޔަރަފަތުގައި ހުންނަ ބައެއް ފައިދާތަކަށް ބަލާލާނަމެވެ.
ދިގުތިޔަރަފަތަކީ އޭގައި އެންޓިހިސްޓަމިން ނަމަކަށް ކިޔާ މާއްދައެއް ގިނަ ފަތެކެވެ. މިއީ ކެއްސުމާއި ކަރުތެރެ ހިރުވުމާއި ނޭވާހިއްލުންފަދަ އުނދަގޫތަކަށް ލުއިކަމެއް ގެނެސްދޭ މާއްދާއެކެވެ. މީގެ އިތުރުން ދިގުތިޔަރަ އަކީ އޭގައި އެންތްރަކުއިނޯން ނަމަކަށް ކިޔާ އަސަރުގަދަ މާއްދާއެއް އެކުލެވޭ އެއްޗެކެވެ. މިއީ ހަޖަމުގެ ނިޒާމުގައި ވާ ބޮޑުގޮހޮރުގެ ދުޅަހެޔޮކަމަށް މުހިއްމު މާއްދާއެކެވެ. ބޮޑުގޮހޮރުގެ މަސްތައް ހަރުދަނާކޮށްދީ ތާޒާކޮށްދެއެވެ. އެއާއި އެކު ބޮޑުކަމުދިއުމަށް އެތައް ގޮތަކުން ލުއިފަސޭހަކަމެއް ލިބިގެން ދެއެވެ.
އެކިކަހަލަ ފަންގަލް އިންފެކްޝަން ތަކަށާއި ބެކްޓީރިއަލް އިންފެކްޝަންތަކާ ދެކޮޅަށް ހަށިގަނޑުގެ ހަތާތައް ވަރުގަދަކޮށްދިނުމަށްވެސް ދިގުތިޔަރަފަތް އެހީތެރިވެދެއެވެ. ހާއްސަކޮށް ހަމަށް ޖެހޭ އެކިކަހަލަ އިންފެކްޝަންތަކާއި ކުޑަކަމުދާ ނިޒާމުގެ އިންފެކްޝަންތަކާ ދެކޮޅަށް، މި ފަތުގައި ހުންނަ މާއްދާތަކުން މަސައްކަތް ކުރެއެވެ. ކުޑަކަމުދާ ނިޒާމުގެ މައްސަލަ ތަކުގެ ތެރެއިން ކުޑަކަމުދާ ހޮޅި ސާފު ނުވުމާއި، އަދި ކުޑަކަމު ނުދެވުމާއި ދާން އުނދަގޫވުންފަދަ ކަންކަމަށް ލުއިތަކެއް ލިއްބައިދޭ މާއްދާތަކެއްވެސް ދިގުތިޔަރަ ފަތުގައި ވެއެވެ.
ހަމަ ކޮންމެ މީހަކަށްވެސް ކެއުމަށް ބޭނުން ކުރެވޭ ދިގުތިޔަރަ ފަތަކީ މަސްހުނި މޮޑެގެން ދިވެހިން މީރުކޮށް ކައި އުޅުނު ފަތެކެވެ. ނަމަވެސް ބޭރަށްހިނގާ މީހެއްނަމަ، ބޭރަށްހިނގާ ދުވަސްކޮޅު، މި ފަތް ކެއުން އެދެވިގެން ނުވާކަމަށް ދިރާސާވެރިން ދެކިލައްވައެވެ. ދިވެހިންގެ ކާނާގެ ތެރޭގައި އިރެއްގައި މާ ގިނައިން މި ފަތް ބޭނުން ކޮށް އުޅުނަސް މިއަދު މިއީ ތަދު އެއްޗެކެވެ. އިރެއްގައި ރަށްރަށުގެ ވަލުތެރޭގައި ބޯކޮށް ހެދިފައި ހުރި ދިގުތިޔަރަ ގަސްތަސް މިއަދު އެ ދަނީ ނެތެމުންނެވެ. މިއީ ބޭހެއް ޖެހުމެއް ނެތި ހެއްދޭނެ ގަހެއްކަމުން މިގަހުގެ ފަތްތަކުގައި އެއްވެސް ވިހަ ކެމިކަލެއް ނުހުންނާނެއެވެ. އެހެންކަމުން ބޮޑު އަގު ދީފާ، ގިނަ ކެމިކަލް ޖެހި ފަތް ގަނެގެން ކެއުމުގެ ބަދަލުގައި މިފަދަ ގެވެހި ގަސްގަހުން ކާނާ ހޯދަން އާދަކުރަމާ ހިނގާށެވެ.
ހަވާލާ: މީނާކްޝީ ޗައުހާން، ހީލިން ތްރޫ ހާބްސް - 2019