ޒަމާނާއި އެކު އެތައް ކަމެއް މިވަނީ ބަދަލުވެފައެވެ. ފަންނިއްޔާތުގެ ކުރިއެރުންތަކާއި އެކު، މީސްމީޑިޔާގެ ތަނަވަސްކަމާއި ފަހި ކަމާއި އެކުގައިވެސް އެތައް ކަމެއް މިވަނީ ބަދަލު ވެފައެވެ. އެހެންކަމުން މި ބަދަލުތަކުގެ ތެރޭގައި އިންސާނާ ދިރިއުޅޭއިރު، ހެވާއި ނުބައި ވަކިކުރަން އެނގެންވާނެއެވެ. އަދުގެ މި މުޖުތަމައުގައި އަނެކާ ފަޟީޙަތްކުރުން މިއީ ހާދަހާ ކުރާހިތްވާ ކަމެކޭ ބުނެވިދާނެއެވެ. ހާއްސަކޮށް މީސްމީޑިޔާގެ އެކި އެކި މަންސަތަކުގައެވެ.

އަތުގައި އޮންނަ ފޯނަކުން، އިނގިލި ޖައްސާލާ ތަނަކުން، އެތައް މަންޒަރުތަކެއް އެ ފޯނަށް އެބަ ނަގައިގަނެވެއެވެ. ހަމަ އެ ފޯނުން އިތުރު ދެތިން ތަނަކު އިނގިލި ޖައްސާލުމުން އެ މަންޒަރުތައް މީސްމީޑިޔާއަށް ހިއްސާވެދެއެވެ. މިކަންކަމުގައި އެމީހެއްގެ ފޮލޯވަރުން ގިނަ މީހަކު އާއްމު ކުރާ މިފަދަ މަންޒަރުތައް މަދު ސިކުންތުކޮޅެއް ތެރޭ އެތައް ބަޔަކަށް އެބަ ފެނެއެވެ. މިއީ އަދުގެ ހާލަތަކެވެ. ޒަމާނާއި އެކު ލިބިފައިވާ ކުރިއެރުމެވެ. ނަމަވެސް މި އިންސާނާއަށް މިމަގުން ކުރިއެރުމެއް ނާދެއެވެ.

މުޖުތަމައުގެ ތެރެއިން ތަފާތު މަންޒަރެއް ފެނުމާއި އެކު އެ މަންޒަރެއް މީސްމީޑިޔާއަށް ދޫކޮށްލަނީ ހިސާބަކަށް ފަހުރުވެރިވެލާފައެވެ. އެ މަންޒަރެއްގައި އެ އުޅޭ މީހަކު ނުބަތަ ބަޔަކު ފަޟީޙަތް ކޮށްލަނީ އެއްވެސް ޖެހިލުމެއް ނެތިއެވެ. އެ ފެންނަ މަންޒަރެއްގެ ހަގީގަތް ނޭނގޭ ހާލު، އެއީ އެވެނި މީހަކު ނުވަތަ ބަޔަކު އެވެނި މިވެނި ކަމެއް ކުރަނީއޭ ނުވަތަ އެވެނި މިވެނި ކަމެއް ވެގެން އުޅެނީއޭ ބުނެ މީސްމީޑިޔާއަށް ދޫކޮށްލައެވެ. ފަހަރުގައި އެ ތަނެއްގައި ކަން ހިނގާފައި ވަނީ ތިބާ ތިޔަ ބުނި ގޮތްނޫން ގޮތަށް ކަމުގައި ވަނީނަމަ، ތިބާ ތިޔަ ކުރީ ދެ ކުށެވެ. އެއީ ދޮގެއް ހެދުމާއި އެކު އަނެކާ ފަޟީޙަތްކޮށް ބަދުނާމު ކުރުވުމެވެ. އަދި އެ ކަމެއް އެހެން ހިނގި ކަމުގައި ވީނަމަވެސް ތިބާ އަނެކާ ފަޟީޙަތްކުރި ކުރުން އެއީ ތިބާ ހެދި ގޯހެކެވެ. ބޮޑު ގޯހެކެވެ.

މީސްމީޑިޔާގައި ފޮލޯވަރުން ގިނަ ކަމާއި އެކު، ތާއީދު އަދިވެސް އިތުރަށް ހޯދުމާއި މީހުންގެ ޝައުގުވެރިކަން އިތުރަށް ހޯދަންވެސް އެހެން މީހެއްގެ އަބުރަށާއި އިއްޒަތާއި ކަރާމަތަށް އުނިކަން އަންނާނެ ފަދަ ކަންކަން ކުރުމަކީ ދެރަ އަދި ފިނޑި އަމަލެކެވެ. ހާއްސަކޮށް އެކަމެއްގެ ހަގީގަތް ނޭނގޭ ކަންކަމެވެ. ލޮލަށް ފެންނަ މަންޒަރަކުން އަދި އެ މަންޒަރެއްގެ އިހާއި ފަހެއް ނޭނގޭނެއެވެ. މީސްމީޑިޔާއިން ފެންނަ މަންޒަރަކުންވެސް، އެ މަންޒަރެއްގެ އިހާއި ފަހެެއް ނޭނގޭނެއެވެ. އެހެންކަމުގައި ވަނީނަމަ، އެ މަންޒަރަކަށް ބަލާ ހުކުމެއް ޖަހާލުން އެއީ އަދި މާ ރަނގަޅު ގޮތެއް ނޫނެވެ. އެ މަންޒަރަށް ބަލާލާ ގޮތް ނިންމާނަމަ، ތިޔަ ކުރެވެނީ އަނެކާ ފަޟީޙަތެވެ. ކަމުގެ ދެކޮޅު ބަލަން ވާނެއެވެ. ކަން ވީ ގިތާއި ވަމުންދާ ގޮތާއި އަދި ވެ ނިމުނު ގޮތްވެސް އެނގިތިބެ ނޫނީ އަނެކުންގެ ވާހަކަތަކާއި މަންޒަރުތައް ހިއްސާ ނުކުރާށެވެ. ނަމަވެސް އަހަރެމެންނަށް މި ފެންނަނީ އަނެކާ ފަޟީޙަތް ކުރުމުގައި ޒާތެއްގެ ވާދަވެރިކަމެއް މި މުޖުތަމައުގައި އުފެދިގެން އުޅޭ މަންޒަރެވެ. 

އާދޭހެވެ! މިއަދު ތިބާއަށް، އަނެކާ ފަޟީޙަތް ކޮށްލެވިދާނެއެވެ. އަނެކާގެ އަބުރާ ކަރާމަތަށް އަރައިގަނެވިދާނެއެވެ. ނަމަވެސް ތިބާގެ ހަނދާނުގައި ނެތް ކަމަކީ، މާދަމާ ތިބާ ފަޟީޙަތްކޮށް ތިބާގެ އަބުރަށް ބަޔަކު އަރައިގަންނަ ނަމަ ތިބާއަށް ވެދާނެ ގޮތެވެ. އެހެންކަމުން މީސްމީޑިޔާއަށް ތިޔަ ދޫކޮށްލާ ވާހަކަ ތަކާއި މަންޒަރުތަކުވެ ފަސް ކާފު، ސާފުކޮށް ހޯދާށެވެ. އަނެކާ ފަޟީޙަތް ކުރަން ނުހަދާށެވެ. ފަހަރުގައި މާދަމާ، ތިބާވެސް ފަޟީޙަތް ވެގެން ހިނގައިދާނެއެވެ.