އެމްޓީސީސީ ހުނަވަރު ޕްރޮގްރާމްގެ ދަށުން ވެލްޑަރުން ތަމްރީންކުރުމުގެ ޕްރޮގްރާމަށް ބައިވެރިން ހޮވުމަށް އޯޕަން ޑޭ ސެޝަންތަކެއް 3 އަތޮޅެއްގައި ބާއްވާގޮތަށް ހަމަޖެހިއްޖެއެވެ.

އޯޕަން ޑޭ ބޭއްވުމަށް ހަމަޖެހިފައިވަނީ 18 މެއި އިން 27 މެއި ގެ ނިޔަލަށް ލާމު އަތޮޅާއި، އައްޑޫ ސިޓީ އަދި ފުވައްމުލަކު ސިޓީގައެވެ.

އަދި މުސްތަޤުބަލުގައި ރާއްޖޭގެ އެހެނިހެން އަތޮޅުތަކުގައި ވެސް އެމްޓީސީސީ ހުނަވަރު ޕްރޮގްރާމަށް ބައިވެރިން ހޯދުމަށް އޯޕަން ޑޭ ބޭއްވުމަށް ވަނީ ހަމަޖެހިފައެވެ.

އެމްޓީސީސީގެ އަމާޒަކީ މި ޕްރޮގްރާމް މެދުވެރިކޮށް "ވެލްޑަރ - ހުނަވަރު ޓްރޭނީ" މަޤާމުގެ 15 ވެލްޑަރުން ތަމްރީން ކުރުމެވެ. އޯޕަން ޑޭ އާއި ބެހޭ އިތުރު މަޢުލޫމާތު ކުންފުނީގެ ސޯޝަލް މީޑިއާ ޕްލެޓްފޯމްތަކުގައި ޝާއިޢު ކުރެވޭނެ އެވެ.

މި ޕްރޮގްރާމްގެ މައިގަނޑު މަޤްޞަދަކީ އެމްޓީސީސީގެ އިންޖިނިއަރިންގ އެންޑް ޑޮކިންގ ޑިވިޜަނަށް ބޭނުންވާ ވެލްޑަރުން ހޯދުމެވެ. ވޭތުވެދިޔަ އަހަރުތަކުގެ ތެރޭގައި، އެ ޑިވިޜަންގެ މަސައްކަތްތައް ވަނީ ވަރަށް ބޮޑަށް ފުޅާވެ، ކުރިއަރައިގެން ގޮސްފައެވެ. އެމްޓީސީސީ އިން ބޭނުންވަނީ މިފަދަ ޕްރޮގްރާމްތައް މެދުވެރިކޮށް ދިވެހިން ވަޒީފާތަކަށް ތަމްރީންކޮށް، ފަންނީ މަސައްކަތުގެ ދާއިރާގައި ބިދޭސީންނަށް އޮތް ބަރޯސާވުން ވީހާވެސް ކުޑަކުރުމަށެވެ. މި ޕްރޮގްރާމް ކުރިއަށްދާނީ 3 މަސް ދުވަހުގެ މުއްދަތަށެވެ. 

މި މުއްދަތުގެ ތެރޭ ރާއްޖޭގައި ތަމްރީންވުމަށްފަހު ވަޒީފާ އަށް ހޮވޭ ފަރާތްތަކަށް ކުރިމަގުގައި ރާއްޖޭން ބޭރުގައި ތަމްރީންވުމުގެ ފުރުޞަތުވެސް ފަހިވެގެންދާނެ އެވެ. މި ޕްރޮގްރާމްގައި ބޮޑަށް އަހައްމިއްޔަތުކަން ދެވޭނީ އިންޑަސްޓްރިއަލް ވެލްޑިންގެ ފަންނު ތަރައްޤީކުރުމަށެވެ.

މި ޕްރޮގްރާމަށް ކުރިމަތިލުމުގެ ފުރުޞަތު ދެ ޖިންސުގެ 25 އަހަރުން ދަށުގެ ބައިވެރީންނަށް ވަނީ ހުޅުވާލެވިފައެވެ. މި ޕްރޮގްރާމަށް ކުރިމަތިލާ ފަރާތަކީ ޖިސްމާނީ ގޮތުން ދުޅަހެޔޮ ސިއްޙަތެއްގައި ހުރި ފަރާތަކަށް ވާންޖެހެއެވެ. ހަމައެހެންމެ އެއްގަމާއި ކަނޑުމަތީގައި މަސައްކަތް ކުރުމަށް ޝައުގުވެރިކަންހުރި ކަނޑުމައްޗަށް ފަރިތަ މީހެއް ކަމުގައި ވާންޖެހެއެވެ. މީގެ އިތުރުން، ހިސާބު، ފިޒިކްސް، ކެމިސްޓްރީ ހިމެނޭހެން އޯ ލެވެލް 3 މާއްދާއިން ފާސްވެފައިވާ ފަރާތްތަކަށް އިސްކަން ދެވޭނެ ކަމަށް އެމްޓީސީސީ އިން ބުނެއެވެ. 

އަދި މި ޕްރޮގްރާމަށް ހޮވޭ ބައިވެރިންނަށް 5,000 ރުފިޔާގެ އެޕްރެންޓިސްޝިޕް އެލަވަންސަކާއި 3,000 ރުފިޔާގެ އެކޮމޮޑޭޝަން އެލަވަންސެއް ދޭ ގޮަތަށް ވަނީ ހަމަޖެހިފައެވެ. މި ޓްރޭނިންގ ޕްރޮގްރާމް ކުރިއަށްގެންދިއުމަށް ހަމަޖެހިފައިވަނީ ތިލަފުށީގައި ހުންނަ އެމްޓީސީސީ ބޯޓުޔާރޑްގައެވެ.