އިސްލާމްދީނުގައި ކަމެއް މަނާކޮށް، ހަރާމް ކުރައްވާފައިވަނީ އެކަންތައްތަކުގައި ސަބަބުތަކެއް ވާތީއެވެ. އެގޮތުން މީގެ 1400 އަހަރު ކުރިން، އައިސްފައިވާ އިލާހީ އަމުރުތަކާއި އެކު މުސްލިމުންނަށް ހަރާމްވެގެންވާ އެތައް ކަމެއް އެބަހުއްޓެވެ. އެގޮތުން މުސްލިމު ފިރިހެނުން، ގަހަނާގެ ގޮތުގައި ރަން ބޭނުން ކުރުން، މުސްލިމު ފިރިހެނުންނަށް ހަރާމެވެ. މިކަމުގައި ބުއްދީގެ ހަމައިން ބަލާނަމަ، ސަބަބު ސާފު ނުވެދާނެއެވެ. ނަމަވެސް ސައިންސުވެރިން މިވަނީ މިކަމުގެ ސަބަބު ހޯދާފައެވެ.

ފިރިހެނުންގެ ހަށިގަނޑުގެ ނިޒާމުތައް އުފެދި ތަރުތީބުވެފައިވާ ގޮތުން އަންހެނުންނާއި އެއްމެ ތަފާތުގޮތަކަށް އުފެދިފައިވާ އެއް ނިޒާމަކީ ދަރިމައިވުމުގެ ނިޒާމެވެ. ފިރިހެނާގެ ހަށިގަނޑުގައި ލައްވާފައިވަނީ ދަރިފަނި އުފެދުމުގެ ފުރިހަމަ ނިޒާމެވެ. އަދި މިއީ އެ ނިޒާމުގެ ތެރެއިން އަންހެނާގެ ހަށިގަނޑުގެ ތެރެއަށް އެ ދަރިފަނި ފޮނުވައިދޭ ފުރިހަމަ ނިޒާމެކެވެ.

ފިރިހެނާގެ ހަށިގަނޑުން އުފެދޭ ދަރިފަނީގެ ދުޅަހެޔޮކަމަކީ އަންހެނާ ދަރިމައިވުމަށް އަސާސީ ކަމެކެވެ. އެހެންކަމުން ދަރިފަނި ބަލިކަށިވެދާ އެއްމެހާ ކަންކަމުން ފިރިހެނާ ދުރުވާން ޖެހެއެވެ. މީގެތެރެއިން ގިނަ ކަންކަމަކީ އަހަރެމެން އެކަންކަން ދަންނަ ކަންކަމެވެ. ނަމަވެސް ސައިންސުވެރިން މި ވަނީ، ރަނުގެ ނެނޯޕާޓިކްލްސް ގެ ސަބަބުން ދަރިފަނީގެ ދުޅަހެޔޮކަން ދަށްވާކަމަށް ބުނެފައެވެ. 

ރަނުގެ ނެނޯޕާޓިކްލްސް އޭ ކިޔަނީ ރަނުގެ ވަރަށް ކުދިކުދި ޒައްރާތަކަކަށެވެ. އެ ނެނޯޕާޓިކްލްސް ތަކުގެ ސަބަބުން ފިރިހެނާގެ ހަށިގަނޑުގައި އުފައްދާ ދަރިފަނީގެ އުމުރު ކުރުވާ ކަމަށް ދިރާސާތަކުން ދައްކައެވެ. އަދި އެ ދަރިފަނިތަކުގެ ހަރަކާތްތެރިކަން ކުޑަވެއެވެ. އަދި ދަރިފަނިތައް އުފެދުމުގައި އުނި ކަންތައްތަކެއް ހުންނަ ކަމަށްވެސް ބުނެވެއެވެ. (ނޭޝަނަލް ލެބޯރަޓްރީ އޮފް މެޑިސިން)

ރަނުގެ ނެނޯޕާޓިކްލްސް ގެ ސަބަބުން ފިރިހެނާގެ ދަރިފަންޏަށް އަސަރު ކުރާއިރު، އަންހެނާގެ ދަރިމައިވުމުގެ ނިޒާމަށް ރަނުގެ ސަބަބުން އެއްވެސް އަސަރެއް ނުކުރެއެވެ. މިއީ ފަހުގެ ދިރާސާތަކުންނާއި ހޯދުންތަކުން ހޯދިފައިވާ ކަންކަމެވެ. ވީއިރު، މީގެ 1400 އަހަރު ކުރިން، ފިރިހެނުން ރަން ބޭނުން ކުރުން ހަރާމް ކުރައްވާފައި ވުމުގެ ހިކުމަތާއި މެދު މިއަދު ސާފުކޮށް ވިސްނާލެވޭ ނޫންތޯއެވެ.

މިހިސާބުން އެއްބަޔަކު އުފައްދާ ސުވާލަކީ ފިރިހެނުންނަށް ރަން ހަރާމް ކުރެއްވުމުގެ ކުރީގައި، ރަނުގެ ނެނޯޕާޓިކްލްސް ގެ ސަބަބުން ދަރިފަންޏަށް އަސަރު ނުކުރަނީތޯ އުފައްދާ ސުވާލެވެ. އެ ސުވާލުގެ ޖަވާބުގައި ބައެއް ދިރާސާވެރިން ދެއްވާ ޖަވާބަކީ، އިންސާނާ ދުނިޔޭގައި އުޅެމުންދާއިރު، އެކި ޒަމާންތަކުގައި އުޅުނު އިންސާނުންގެ ޖީލުތަކުގެ ހަށިގަނޑުތަކުގައި ބަދަލުތަކެއް އައިސްފައިވާކަމަށެވެ. އެގޮތުން މާ އިސްކޮޅުން ދިގު ބަޔަކާއި މާ އުމުރު ދިގު ބަޔަކުވެސް މި ދުނިޔޭގައި އުޅެފައިވާކަމަށް ވެއެވެ. އެހެންކަމުން، ފަހަރުގައި އެފަދަ ގޮތަކަށް އިންސާނާގެ ހަށިގަނޑަށް ބަދަލުތަކެއް އައިސްފައިވަނީ ކަމުގައިވެސް ވެދާނެއެވެ. އެއްމެ މޮޅަށް ދެނެވޮޑިގެންވަނީ ހަމަ މާތް ﷲ އެވެ. އެ އިލާހުގެ އަމުރުފުޅުތަކާއި މެދު ސުވާލު އުފެއްދުމެއް ނެތެވެ. އެ އަމުރުފުޅުތަކުގައި ވަނީ އިންސާނާއަށް އެއްމެ މޮޅު ގޮތެވެ. އެއީ މި ދުނިޔެއާއި އާހިރަތުގައިވެސް މެއެވެ.

 

މަސްދަރު: އިންޓްނޭޝަނަލް ޖާނަލް އޮފް ރިޕްރޮޑަކްޓިވް ބަޔޯމެޑިސިން