އަހަރެމެންގެ ކެއުމުގެ ވައްޓަފާޅީގައި ބައެއްކަހަލަ މޭވާތަކުގެ ތޮށި މަށަމުއެވެ. އެގޮތުން އަނބަކީ ވަރަށްގިނަ މީހުން އޭގެ ތޮށި މަށައިގެން ކައި އުޅޭ މޭވާއެކެވެ. ދިވެހިރާއްޖޭގައި އެއްވެސް ބޭހެއް ބޭނުން ނުކޮށް ހެދިފައި ހުންނަ މި އަނބުތަކުގެ ތޮށި މަށައިގެން އަހަރެމެން ކާއިރު، ބޭރުން ގެނެސްފައި ހުންނަ އާފަލުފަދަ މޭވާތަކުގެ ތޮށި ނުމަށާ އަހަރެމެން ކަނީ އެއަށް ޖަހާފާ ހުންނަ ބޭހާއި ކެމިކަލަށް އެއްވެސް ފަރުވާލެއް ނެތިއެވެ. އަނބު ތޮށްޓަކީ އޭގައި އިންސާނާގެ ސިއްހަތަށް އެތައް ފައިދާތަކެއް ލިއްބައިދޭ އެއްޗެކެވެ. ވުމާއި އެކު އަނބު ކާންވީ އޭގެ ތޮށި ނުމަށާ، ތޮށްޓާއި އެކުގައެވެ.
އަނބު ތޮށިން ލިބޭ ބައެއް ފައިދާތަކުގެ ތެރޭގައި، ހަކުރުބައްޔާ ދެކޮޅަށް މަސައްކަތް ކުރުމުގެ ގާބިލުކަން ލިބިފައިވާ އެންޓިއޮކްސިޑަންޓްސް ތަކެއް ކަމުގައިވާ ޕޮލިފެނޯލްސް އާއި މެގްނިފެރިން އަދި ނޮރަތައިރިއޯލް އޭގައި ހުރެއެވެ. އެހެންކަމުން މިއީ ހަކުރުބަލި ޖެހުމުގެ ފުރުސަތު ބޮޑު މީހުން ކެއުން ރަނގަޅު އެއްޗެކެވެ. އެހެނީ މީގެ ސަބަބުން ހަކުރުބަލި ޖެހުމުން މީހާ ދުރުކޮށްދޭނެތީއެވެ.
އަނބު ތޮށީގައި ހުންނަ ޕެކްޓިން ކިޔާ މާއްދާ އަކީ ނުބައި ކޮލެސްޓްރޯލް (އެލް.ޑީ.އެލް) ދަށްކޮށްދީ އަދި ރަނގަޅު ކޮލެސްޓްރޯލް (އެޗް.ޑީ.އެލް) ގިނަ ކޮށްދިނުމަށް އެހީތެރިވެދޭ މާއްދާއެކެވެ.
އެންޓިއިންފްލެމޭޓަރީ ކޮންޕައުންޑްސް ގިނަ އަދަދަކަށް ހުންނަ އަނބު ތޮށްޓަކީ އޭގައި ވިޓަމިން ސީ ވެސް ވަރަށް ގިނައިން އެކުލެވޭ އެއްޗެކެވެ. އެހެންކަމުން މިއީ އިންސާނާގެ ދިފާއީ ނިޒާމު ވަރުގަދަކޮށް ހަރުދަނާ ކޮށްދިނުމަށްވެސް ބޭނުންވާ އަސާސީ މާއްދާތައް ގިނަ އެއްޗެކެވެ.
އަނބު ތޮށީގައި ހުންނަ ފައިބަރުގެ ވައްތަރެއްގެ ސަބަބުން ހަޖަމުގެ ނިޒާމު ހަރުދަނާވެ ތަރުތީބުވެއެވެ. އަދި ހަޖަމު އަވަސްވެ އިންސާނާގެ ބަރުދަން ލުއިކޮށްދިނުމަށް ހިސާބަކަށް އެހީތެރިވެދެއެވެ. އަދި ހަޖަމުގެ ނިޒާމަށް ޖެހޭ ބައްޔެއް ކަމުގައިވާ ޑައިވާޓިކިއުލައިޓިސް ނަމަކަށް ކިޔާ އިންފެކްޓިވް ބައްޔަކުން ދުރުކޮށްދިނުމަށް، އަނބު ތޮށީގައި ހުންނަ މި ފައިބަރުން އެހީތެރިވެދެއެވެ.
ކަންކަން މިހެން ހުރުމާއި އެކު، އަނބު ތޮށްޓަކީ ނުކައި އުކާލަންވީ ވަރުގެ އެއްޗެއް ނޫނެވެ. ހާއްސަކޮށް ދިވެހިރާއްޖޭގައި ހެދިފައި ހުންނަ ގަސްގަހުގައި ހުންނަ އަނބު އަނބުގެ ތޮށްޓެވެ. ނަމަވެސް ތޮށި ނުމަށާ އަނބު ކާނަމަ، ރީއްޗަށް އެ އަނބު ދޮންނަން ވާނެއެވެ. ބޭރުގައި އެއްވެސް ކަހަލަ އެއްޗެއް ވާނަމަ ސާފުކޮށް ރީތިކޮށް ދޮންނަން ވާނެއެވެ.
ހަވާލާ: "ކޮލިންސް ވޮކޯލޯ" - ހެލްތް ގައިޑް - 2023