ބައެއްމީހުން ބައެއް ފާފަތަކަށް އަރައިގަންނަނީ އެއްވެސް ޖެހިލުމެއް ނެތިއެވެ. އަދި ބައެއް މީހުން އެ ކަމާމެދު ފަހުރުވެރިވެ އެވާހަކަ ދައްކަނީ ބޮޑާވެރިކަމާއި އެކުގައެވެ. ހީވާ ކަހަލައެވެ! ތިމާއަށް މި ކުރެވެނީ އަދި މާ މޮޅު ކަމެކެވެ. މިގޮތުން ބައެއް މީހުން، އެމީހުންގެ ވާހަކަތަކުގައި ދޮގު ހެދުން އެއީ އާއްމު ކަމެއް ކަމުގައި ހަދައެވެ. ހާއްސަކޮށް ތަންދޮރު ދަނެ، ދުނިޔޭގެ ވާނުވާ އެނގޭ، "ހަރުދަނާ ލީޑަރުންނެވެ!"

މިގޮތަށް މިބައިމީހުން ދޮގު ހަދާއިރު، ދޮގު ހަދާ އެއްމެ އާއްމު އެއް ދާއިރާއަކީ ސިޔާސީ ދާއިރާއެވެ. ސިޔާސީ ދާއިރާގައި މި ބައިމީހުން ހަދާ ދޮގުތައް ހަދަނީ ސިއްރު ސިއްރުންނެއް ނޫނެވެ. ފާޅުގައެވެ. ފާޅުކަންބޮޑު ގޮތެއްގައި މީޑިޔާތަކުގައެވެ. އާއްމުންގެ ކުރިމަތީގައި އަޑުގަދަ ކުރާ ތަކުންނެވެ. އެއްވެސް ބިރެއް ޖެހިލުމެއް ނެތެވެ. ކަންބޮޑުވުމެއް ހާސްކަމެއްވެސް ނުހުރެއެވެ. ހީވާ ކަހަލައެވެ. ތިމާ މިކުރަނީ މާ މޮޅުކަމެއްތާއެވެ.

ސިޔާސީ ގޮތުން، އެކި އެކި ސިޔާސީ ފަރާތްތަކުން ތަފާތު އެކި ދޮގުތައް ހަދަނީ އެބައިމީހުންގެ އަމިއްލަ ނަފްސުތައް ދިފާއުކުރާށެވެ. އަނެއްބަޔަކު، އެމީހުން ތާއީދުކުރާ ސިޔާސީ ލީޑަރަކު ދިފާއު ކުރާށެވެ. އަނެއްބަޔަކު، އެބަޔަކާ ވާދަވެރި ސިޔާސީ ލީޑަރުންގެ އަގު ވައްޓާލުމުގެ ގޮތުން ތަފާތު އެކި އެކި ދޮގުތައް ހަދައެވެ. ހަމަ އެއްވެސް ޖެހިލުމެއް ނެތިއެވެ. ފާފައެއްކަން ހަނދާންވެސް ނެތިހުރެއެވެ. ނުވަތަ ފާފައެއްކަން އެނގުނަސް، ނުލަފާކަމުން ހަމަ ދޮގު ހަދަނީއެވެ. ލަދެއްވެސް ނުގަންނަނީއެވެ. އަގަލުވެސް ކުޑައީއެވެ.

ނޫސް މަޖައްލާތަކަށްވެސް ބަލާލަމާ ހިނގާށެވެ. އެއް ހަބަރު އެކި ނޫސްތަކުން ގެނެސްދެނީ އެކި ގޮތަށެވެ. އެއް ކަމެއްގެ ސުރުހީ އެކި މިސްރާބުތަކަށް އެކި ނޫސްތަކުގައި ހުރެއެވެ. އެއް ނޫހެއްގައި އެ ހަބަރެއް އައިސްފައިވާ ގޮތުގެ ދިމާ އިދިކޮޅަށް އެހެން ނޫހެއްގައި އޮވެދާނެއެވެ. ނޫސް ތަކުންވެސް ހަބަރުތައް ގެނެސްދޭއިރު، ދޮގު ހަބަރުތައް ގެނެސްދެނީ މަދެއްކޮށެއް ނޫނެވެ. ކަނޑައެޅިގެން ދޮގުކަން އިނގޭ ހާލުގައި އެ ހަބަރުތައް އާއްމު ކުރަނީ އެވެ. ދޮގު ހެދުމަކީ ފާފައެއްކަން ނޭނގެނީއެވެ. ނުވަތަ އެނގުނަސް ނުލަފާކަމުން ދޮގު ހަދަނީއެވެ.

ދޮގު ހެދުމަކީ ކިހާވަރެއްގެ ފާފައެއްކަން އަހަރެމެން ދަންނާން އެބަ ޖެހެއެވެ. ދޮގު ހަބަރު ފެތުރުމާއި، ދޮގު ބަހުން އާއްމުންގެ ތެރޭ ފާޅުކަންބޮޑު ގޮތުގައި ވާހަކަ ދެއްކުން ހުއްޓާލަން އެބަ ޖެހެއެވެ. ހެދޭ ދޮގުތަކުގެ ސަބަބުން ފަޟީހަތްވެ ބޭޒާރުވިޔަސް، އަނެއްކާވެސް ދޮގުތަކެއް ހަދާ، އިހު ހެދުނު ދޮގު ފޫބެއްދޭތޯ އުޅެއެވެ. ހެދޭ ދޮގުތައް ހައްތަހާ ވަނީ ގިނައެވެ. ފަހުރުވެރިކަމާއި ބޮޑާވެރިކަމާއެކު ދޮގުހަދާ މީހުން ވަގުތުން ވަގުތަށް އެކަންކަން ހުއްޓާލާށެވެ. އާޚިރުގައި އެ ދޮގުތަކާ ބެހޭގޮތުން ސުވާލު ކުރުމުން، ތިބާއަކަށް އެއްކަލަ ބޮޑާވެރިކަމާއެކު، ދިފާއުގައި އިތުރު ދޮގެއް ނުހެދޭނެއެވެ. ތިބާގެ ދޫ، ދިބާއަށް ޝްފާއަތްތެރިވާނެއެވެ. އެ ދޫ ބުނާނެތެވެ! ތިބާ އެދުވަހު ހެދީ ދޮގެކެވެ! ދެން އެދުވަހުން ތިބާ ވާނެ ނުކަމެތި ހާލު ސިފަކުރައްވާށެވެ!