ކަރަންޓު ބިލުގައި ވެމްކޯގެ ކުނި މެނޭޖްކުރުމުގެ ޚިދުމަތުގެ ބިލް ހިމެނުމަށް ވެމްކޯއާ ސްޓެލްކޯ ދެމެދު އެއްބަސްވުމެއްގައި ސޮއިކޮށްފިއެވެ.
މިއީ ވެެމްކޯ އިން މާލެ ސަރަހައްދުގައި ކުނި އުކައިދޭ ޚިދުމަތަށް ގިނަ ގޭބިސީތަކުން ފައިސާ ނުދައްކާ މައްސަލައަށް ހައްލެއް ހޯދައިދިނުމުގެ ގޮތުން އެންވަޔަރަމެންޓް މިނިސްޓްރީއާއެކު ސްޓެލްކޯ އަދި ވެމްކޯ އިން ބޭއްވީ މަޝްވަރާތަކަށްފަހު ނިންމި ނިންމުމެކެވެ.
މި ކަމަށް ވާން ޖެހޭ ތައްޔާރީތައް ނިންމައި ވެމްކޯއާ ސްޓެލްކޯ ދެމެދު ބިލު އެއްކޮށްލުމުގެ އެއްބަސްވުމުގައި ސޮއިކުރުމަށް ސްޓެލްކޯގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު ޝަރީފް އާދަމް އެވެ. އަދި ވެމްކޯގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު ޔޫސުފް ސިރާޖް އެވެ.
މި އެއްބަސްވުމުގައި ސޮއިކުރުމާއެކު، ކަރަންޓު މީޓަރު ހަރުކޮށްފައި ހުރި ކޮންމެ ގޭބިސީއަކަށް އަންނަ މަހުން ފެށިގެން ސްޓެލްކޯއިން ފޮނުވާ ބިލުގައި ކުނި ބިލް ހިމަނާނެ ކަމަށް އެ ކުންފުނިން ބުނެއެވެ. އަދި އެކަމަށް ގޭބިސީތައް ރަޖިސްޓްރީ ކުރަން ނުޖެހުނު ނަމަވެސް، ވިޔަފާރިތަކުގެ ކަރަންޓު ބިލުގައި ކުނި ބިލް ހިމަނާނީ ރަޖިސްޓްރީ ކުރުމުންނެވެ.
ވެމްކޯ އިން ބުނެފައިވާގޮތުގައި، ކުންޏަށް ފީ ނަގާނީ 34 އަށް ވުރެ ގިނަ ކަރަންޓް ޔުނިޓް ބޭނުންކުރާ ގޭބިސީތަކުން އެކަންޏެވެ. އަދި އެއަށްވުރެ މަދުން ކަރަންޓް ބޭނުންކުރާ ނަމަ އެ ގޭބިސީއަކުން ކުނި ނުއުފައްދާ ކަމަށް ބަލައި، ބިލެއް ނުކުރާނެ އެވެ.
ދެ ބިލު އެއްކޮށްލައިގެން ފީ ނަގަން ފެށުމުން ރައްޔިތުންނަށް އެތައް ގޮތަކުން ލުއިފަސޭހަވާނެ ކަމަށް ސަރުކާރުން ދެކެއެވެ. އޭގެތެރޭގައި؛ މީގެކުރީން، ވެމްކޯގެ ފީ ދައްކަން އުފުލަން ޖެހޭ ތަކުލީފުތަކަށް ނިމުން އައުމާއި، ކުރީ އެޕާޓުމަންޓުގެ ބިލު މިހާރުގެ ބިލުން އުނި ނުކުރެވިގެން އުޅެން ނުޖެހުމާއި، އުޅެމުންދާ ގެ ބަދަލުވިޔަސް އަލުން ރަޖިސްޓްރީ ކުރާކަށް ނުޖެހުމުގެ އިތުރުން ޚިދުމަތަށް އެދި ހުށަހެޅުމަށް ގޭގެ ވެރިފަރާތުގެ ސިޓީއެއް ހޯދާން ނުޖެހުން ފަދަ ގިނަ ކަންތައްތަކުގައި ފަސޭހަގޮތްތަކެއް ތަނަވަސްވެފައިވުން ހިމެނެއެވެ.
މީގެއިތުރުން، މި ފަދަ ޚިދުމަތެއްގެ ކުރީކޮޅު ދިމާވެދާނެ މައްސަލައެއް ހައްލުކުރަން ނުވަތަ ޝަކުވާއެއް އޮތްނަމަ އެ ކަމެއްގައި ވެމްކޯ އަދި ސްޓެލްކޯއާ މުއާމަލާތްކުރަން އެދޭ ކަމަށްވެސް އެ ދެ ކުންފުނިން ވަނީ ބުނެފައެވެ.