ދުނިޔޭގައި އިންސާނާ އުޅެމުން ދާއިރު، ތަފާތު އެކި މަސައްކަތްތައް މި އިންސާނާ ކުރާނެއެވެ. އިންތިޒާމުވެ ރޭވިގެން ހިނގާ މަސައްކަތްތަކާއި ތަނާ ހާލަތާއި ވަގުތަށް ރިއާޔަތްކޮށް ކުރަންޖެހޭ ބައެއް މަސައްކަތްތަކެވެ. އެގޮތުން ބައެއް މަސައްކަތްތަކަކީ އެ މަސައްކަތެއް ކުރުމުގައި މާ ބޮޑެތި އުނދަގޫތަކެއް ނުވާ މަސައްކަތްތަކެވެ. އަދި އަނެއްބައި މަސައްކަތްތަކަކީ އެ މަސައްކަތްތަކުގައި ބުރަކަމާއި ތަކުލީފު ބޮޑު މަސައްކަތްތަކެވެ.
އާދޭހެވެ! ބައެއް މަސައްކަތްތަކަކީ ރާވާ އިންތިޒާމުވެގެން ކުރަން ގަސްތު ކުރާ މަސައްކަތްތަކެވެ. މިފަދަ މަސައްކަތްތައް އެކި ތަންތަނުން ރާވާ އިންތިޒާމުކުރާއިރު، އެ މަސައްކަތް ކުރާން ތިބޭ އަހުލުންނާ މަޝްވަރާ ކުރުމަކީ ވަރަށްވެސް މުހިއްމު ކަމެކެވެ. ހިންގާ ކޮމިޓީ އަކުން ނުވަތަ ވަކި ބަޔަކު، އެވެނި މިވެނި މަސައްކަތްތަކެއް ކުރާން ގަސްތު ކުޅަ ނަމަވެސް، އެއީ ކުރެވިދާނޭ މަސައްކަތްތަކެއްތޯ ބެލުން އެއީ ކޮންމެހެން ކުރަންޖެހޭނެ ކަމެކެވެ.
އާނއެކެވެ! ތިޔަ ހީކުރާހާ ފަސޭހައެއް ނޫނެވެ! ފިނި ކޮޓަރިތަކުގައި ކޮންޕިއުޓަރު ދޮށުގައި ތިބެގެން ނިންމާ ނިންމުންތަކަކީ ވަރަށްވެސް ފަސޭހައިން ނިންމިދާނެ ނިންމުން ތަކެކެވެ. މަސައްކަތްތަކެއްގެ ތަރުތީބަކީވެސް ކަނޑައެޅިދާނެ އެއްޗެކެވެ. މަސައްކަތް ކުރާނޭ ބަޔަކާއި ވަގުތެއްވެސް ކަނޑައެޅިދާނެއެވެ. ނަމަވެސް އެ މަސައްކަތެއް ކުރާން ތިބި ބަޔަކަށް ނޫނީ އެ މަސައްކަތެއްގައި ހުރި ބުރަކަމެއް އިހުސާސެއް ނުކުރެވޭނެއެވެ.
އިންތިޒާމުކޮށް ރާވާ ބަޔަކަށް، އެއީ ވަރަށް ފަސޭހައިން ކިޔާލެވިދާނެ ބަސްތަކަކަށް ވެދާނެއެވެ. އަދި އެއީ އެހެން މިހެން ހަދާލުމުން ނިމިދާނޭ މަސައްކަތެއް ކަމަށްވެސް ބުނެވިދާނެއެވެ. ނަމަވެސް އާއްމުކޮަށް ހުރިހާ މަސައްކަތްތަކަކީވެސް އެ ހީކުރެވޭ ގޮތާއި ހިލާފަށް އުނދަގޫ މަސައްކަތްތަކެވެ.
ކަން މިހެން ހުރުމާއި އެކު، އޮފީސްތަކާއި ކުންފުނިތަކުން އަދި ޖަމުއިއްޔާ ޖަމާއަތްތަކުން މިފަދަ މަސައްކަތްތައް ރާވާ އިންތިޒާމުކުރާއިރު، މަސައްކަތް ކުރާން ތިބޭ މީހުން ކުރެން ލަފާ އަހާ މަޝްވަރާ ހޯދަން ވާނެއެވެ. ނޫންނަމަ މަސައްކަތް ބުރަވެ، ދާން ބޭނުންވާ އަމާޒަށް ވާސިލްނުވެ، ހުއްޓާލަން ޖެހުމަކީ ނުވުމަށްވުރެ ވުން ގާތް ކަމެކެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން