ސްޓެލްކޯ އިން ކުރަމުންއައި ގްރޭޓާމާލޭގެ އެމަރޖެންސީ ބެކަޕް ޕަވަރޕްލާންޓުގެ މަސައްކަތް ނިންމާލައިފިއެވެ.
ހުޅުމާލޭ ބައު އިންޖީނުގޭގައި ގާއިމްކޮށްފައިވާ މި ބެކަޕް ޕަވަރޕްލާންޓްގެ ކެޕޭސިޓީއަކީ 20.2 މެގަވޮޓް އެވެ. މި ޕަވަރޕްލާންޓަކީ، ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް އާދަމްގެ ސީދާ ބެއްލެވުމުގެ ދަށުން، އެ ކުންފުނީގެ އަތޮޅުތެރޭގައި އަދި ގްރޭޓާމާލޭގެ އިންޖީނުގެތަކުގެ ތިބި، މި މަސައްކަތަށް އެންމެ ޤާބިލް މުވައްޒަފުން ހިމަނައިގެން އެކުލަވާލި ޓީމަކުން ކޮށްފައިވާ ބުރަ އަދި އަވަސް މަސައްކަތެކެވެ.
އަދި މިއީ ސްޓެލްކޯގެ ތާރީހުގައިވެސް މިހާ ކުރު މުއްދަތެއްގެ ތެރޭގައި މިހާ ގިނަ އިންޖީނުތަކެއް އެއްފަހަރާ ކަމިޝަންކޮށް ނިންމާލެވުނު ފަހަރުކަން ފާހަގަކޮށްލަންޖެހެއެވެ. އެގޮތުން، އިމަރޖެންސީ ޕަވަރޕްލާންޓްގެ މަސައްކަތުގައި އެންމެ އިސްކޮށް އުޅުއްވި ސްޓެލްކޯގެ ޖެނެރަލް މެނޭޖަރު އަހުމަދު ޝަރުނީޒް ވިދާޅުވީ، ހުޅުމާލޭގައި މި ގާއިމްކުރެވުނު ޕަވަރޕްލާންޓްގެ މަސައްކަތް މިދިޔަ އޭޕްރީލް މަހުގެ 26 ގައި ފަށައިގެން މެއި މަހުގެ 26 ގެ ނިޔަލަށް ނިންމާލެވިފައިވާ ކަމަށެވެ. އެހެންކަމުން، މި މަސައްކަތް ނިންމާލުމަށް ހޭދަވެފައިވަނީ ގާތްގަނޑަކަށް އެއް މަސް ދުވަހެވެ.
މި އެމަރޖެންސީ ޕަވަރޕްލާންޓާއެކު، ޖެނެރޭޝަން ކެޕޭސިޓީ އިތުރު ކުރެވި، ކެޕޭސިޓީ ނެތިގެން ނުވަތަ އޯވާލޯޑްވެގެން ކަރަންޓު ނުކެނޑޭނެ ކަމުގެ ފުރިހަމަ ޔަގީންކަމާއި އެކު، ގްރޭޓާމާލޭގެ ޕަވަރ ސެކިއުރިޓީ އިތުރަށް ކަށަވަރު ކުރެވިގެންދާނެ ކަން މެނޭޖިންގ ޑިރެކްްޓަރ އަހުމަދު ޝަރީފް ވަނީ ފާހަގަ ކުރައްވާފައެވެ.
"އަޅުގަނޑުމެންގެ އިންޖީނަށް އިތުރު އިމަރޖެންސީއެއް ދިމާވެގެން ހުއްޓި ނުވަތަ މެއިންޓަނަންސަށް ނަގާ އިންޖީނުތައް ނެތްތަން ފޫބެއްދުމަށްވެސް މި ޕަވަރޕްލާންޓްގެ ބޭނުން ހިފޭނެ،" ގްރޭޓާމާލެ އެމަރޖެންސީ ޕަވަރޕްލާންޓްގެ މަސައްކަތުގެ ނިމުން ފާހަގަ ކުރުމުގެ ގޮތުން ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވާހަކަފުޅު ދައްކަވަމުން ވިދާޅުވިއެވެ.
ޝަރީފް އިތުރަށް ވިދާޅުވިގޮތުގައި، މި ގާއިމްކުރެވުނު ޕަވަރޕްލާންޓްގެ އެހީގައި ހުޅުމާލޭގައި އިތުރުވަމުން އަންނަ އާބާދީތަކަށް ބޭނުންވާ ކެޕޭސިޓީ ހިފެހެއްޓިގެންދާނެ ކަމަށެވެ.
ރާއްޖޭގައި މިހާތަނަށް އެންމެ މަތީ ހޫނުމިން ރެކޯޑްކުރެވިފައިވަނީ މިދިޔަ އޭޕްރީލް މަހުގައި ކަމަށްވާއިރު ޕަވަރ ޖެނެރޭޝަން ކެޕޭސިޓީ ވެސް އެ މަހުގެ ދެ ދުވަހެއްގައި މެކްސިމަމް އަށް ގޮސްފައިވާ ކަމަށް ސްޓެލްކޯ އިން ވަނީ ބުނެފައެވެ.
އަދި އާންމުކޮށް ހޫނު ދުވަސް ދުވަހު މާލެ ސަރަހައްދުގައި 90 މެގަވޮޓާ ހަމައަށް ކަރަންޓު ބޭނުންކުރެވޭ ކަމަށާއި، ވިއްސާރަ ދުވަހެއް ވިޔަސް ކަރަންޓު ބޭނުން ކުރާ މިންވަރު 65 މެގަވޮޓަށްވުރެ ދަށް ނުވާ ކަމަށް ސްޓެލްކޯ އިން ބުނެއެވެ.