ލޭ މައްޗަށް ދިއުމޭ އަހަރެމެން މި ކިޔާ އުޅެނީ ލޭގެ ޕުރެޝަރު މައްޗަށް ދިއުމަށެވެ. މިއީ މިއަދު ވަރަށް ގިނަ ދިވެހިން ތަހައްމަލު ކުރަމުން އަންނަ ހާލަތެކެވެ. އަދި މިކަން ގިނަ ޒުވާނުންވެސް މިއަދު ތަހައްމަލުކުރަން ޖެހޭ ކަމީ ހަގީގަތެކެވެ.
ލޭމައްޗަށް ދާކަމަށް ބުނަނީ، ލޭގެ ޕުރެޝަރުބެލުމަށް ފަހުގައެވެ. ކަރަންޓު ނުވަތަ އޮޓަމެޓިކް މެޝިނަކުން ލޭގެ ޕުރެސަރު ބަލާއިރު، ކަރަންޓު އަދި އޮޓަމެޓިކު ކަމެއް ނުހުންނަ މެޝިނުންވެސް ލޭގެ ޕުރެޝަރު ބަލައެވެ. މިދެންނެވި ފަހު ގޮތަށް ލޭގެ ޕުރެޝަރު ބަލާނީ އަތުގައި ކަށިގަނޑެއްވެސް ޖައްސައިގެންނެވެ. ދެގޮތުގައިވެސް ލޭގެ ޕުރެޝަރު ބެލުމަށް އަތުގެ އުޅަނބޮށީގެ މަތީގައި ފޮތިގަނޑެއް ޒާތުއެއްޗެއް އުޅާނެއެވެ. އަދި އެއަށް ވައި ފޮނުވާ، ބާރު ކުރުވާނެއެވެ.
ކޮންމެ ގޮތަކަށް ލޭގެ ޕުރެޝަރު ބެލިނަމަވެސް ނަތީޖާ ފެންނާނެއެވެ. މިގޮތަށް ލޭ ބަލާއިރު، އޭގެ ނަތީޖާ ދޭ އިރު، ދެ އަދަދެއް ބޭނުން ކުރެއެވެ. މަތީގައި އެއް އަދަދު ޖަހާ ރޮނގުބުރިއެއް ދަމާ އޭގެ ތިރީގައި އަނެއް އަދަދު ޖަހާފައި އޮންނަ ގޮތަކަށެވެ. މިގޮތަށް އިނގިރޭސިން ފްރެކްޝަން އޭ ކިޔައެވެ. ލޭގެ ޕުރެޝަރު ލިޔެފައި ހުންނަ އިރު، ފަށަން ނުވަތަ ފުރަތަމަ ލިޔެފައި އޮންނަނީ ބޮޑު އަދަދެކެވެ. ފަހުން ނުވަތަ ތިރީގައި ލިޔެފައި އޮންނަކީ ކުޑަ އަދަދެކެވެ. އެގޮތުން ލޭގެ ޕުރެޝަރުގެ އެއްމެ އާއްމު މިންގަނޑަކީ ސަތޭކަވިހި، އައްޑިހައެވެ. (ވަން ޓްވެންޓީ އޯވަރ އެއިޓީ) އެވެ. (120/80) އެވެ.
މަތިކޮށް ބޮޑުކޮށް މި އިންނަ އަދަދަށް ކިޔާ އުޅެނީ ސިސްޓޯލިކް ބްލަޑް ޕްރެޝާރ އެވެ. މިއީ ހިތް ތެޅެމުންދާއިރު، ކުރުގެޅޭ ވަގުތު، ހިތުން، ލޭހޮޅިތަކުގެ ތެރެއަށް ލޭ ފޮނުވައިދޭ އިރު، އެ ލޭ ގޮސް ލޭހޮޅިތަކުގެ ފާރުގައި ޖެހޭ ބާރުމިނެވެ. ދަށްކޮށް ކުޑަކޮށް މި އިންނަ އަދަދަށް ކިޔާ އުޅެނީ ޑައިސްޓޯލިކް ބްލަޑް ޕްރެޝާރ އެވެ. މިއީ ހިތް ތެޅެމުންދާއިރު، ހިތުގެ މަސްތަކަށް ދޫ ލިބޭ ވަގުތު، ހިތަށް ލޭ އެޅޭ އިރު، ލޭހޮޅިތަކުގައި ދައުރުވާ ލޭ، އެ ލޭހޮޅިތަކުގެ ފާރުގައި ޖެހޭ ބާރުމިނެވެ. ހިތް ކުރުގެޅޭ ވަގުތަކީ ހިތުން ބޭރަށް ލޭ ފޮނުވައިދޭ ވަގުތެވެ. އަދި ހިތުގެ މަސްތަކަށް ދޫޖެހޭ ވަގުތަކީ ހިތުގެ ތެރެއަށް ލޭ އެޅޭ ވަގުތެވެ. ހިތަކީ މައި ހަތަރު ލޭހޮޅި އެ ގުނަވަނަކާއި ގުޅިފައިވާ ގުނަވަނެކެވެ.
ހިތުގެ މަސައްކަތަކީ ހަށިގަނޑުގެ ގުނަންތަކަށް ލޭ ފޮނުފައިދީ ހަށިގަނޑުގައި ލޭ ދައުރުކޮށްދިނުމެވެ. އެހެންކަމުން އެ ލޭ ފޮނުވައިދޭއިރު، އެއް ހަމައެއްގައި އެއް "ވަޒަނެއްގައި" އަދި އެކަށީގެންވާ ބާރުމިނެއްގައި ފޮނުވައިދޭން ޖެހޭނެއެވެ.