އަރިހަށް ދަމުން ފަރިކަން އެހާ، އަރިހަށް އެ ގެންގޮސް ދައްކަނީ

   މަރިޔާދުކަން ވެރިވާނެތާ، މަރިޔަނބު އެތަނުގާ ވާ ކަމުން

 

ކަރިގަނޑުގެ ފޮނިކަން ދައްކަމުން، އަރިއަރިއަށޭ ފިޔަތަން ނޮޅީ

    ހަރިވެސް ޖަހާފާ ދައްކަނީ، ވަރިހަމަ ނުވާން ފައި ވިއްދަމުން

 

ނަރިފައި ވެފައިވާ ހާލުގައި، ވަރިވާކަށެއް ނުކެރޭނެ ތާ

    ތަރިވެސް މިހާލަތުގާ އުޑުން، ފަރިކަން މަތީ ބާލާ އުޅުން

 

ކަރިވާރު ބަނދެފާ ހުއްޓަކަސް، އަރިވީގޮތުން ކުނބު ބިންދުނޭ

    އަރިއަށް ޖަހާ ބިޔަ ރާޅުތައް، އަރިކަށި އެކީ ތެންމާލަމުން

 

ފަރި ރޯޅި ވައި ފަހިކޮށް ޖެހޭ، ފަރިދުވެލި ހުރި އޮޑިއެއް ވިޔަސް

   ފަރިޔަށްހިނގާއިރު ގާތުގާ، އަރިއަށް ޖަހާ ކޮށްޕާލަމުން

 

ފަރިކަން އެހާ ދައްކާ އުޅުން، މަރިޔަނބުގެ ހާލަތަކީ މިއީ

   ވަރިބޯވިޔަސް ދެން ބޮޑުވަރޭ، ވަރިފުށް ނުބައިކަން ދައްކަމުން