ކެރިއަރއަކީ ތިމާ މުޖުތަމަޢުއަށް ނުކުމެ އުޅެން ގަސްތުކުޅަ ދާއިރާއެވެ. ނުވަތަ މަސައްކަތްކުރާނޭ ދާއިރާއެވެ. ތިމާ ހިތް އެދޭ، ކުރާ ހިތްވާ އަދި ކުރަން ބޭނުންވާ ދާއިރާއެކެވެ. މީގެ މާނަ މިހެން އޮތް ކަމުގައި ވީ ނަމަވެސް މިޒަމާނުގައި ކުއްޖާ އުފަންވުމުގެ ކުރިން އެކުދިންގެ މައިންބަފައިން އޮންނަނީ އެކުއްޖާ ބޮޑުވެގެން ވާނެ އެއްޗެއް ނުވަތަ އެކުއްޖެއްގެ ކެރިއަރ ކަނޑައަޅައި ނިންމާފައެވެ. ތިމަންނާގެ ދަރިފުޅު ވާނީ ޑޮކްޓަރަކަށް، ނަރުހަކަށް، ޕައިލެޓަކަށް، ކެބިން ކުރޫއަކަށް، ނޫނީ ލޯޔަރަކަށެވެ. ބޮޑަށް ވިސްނިފައި އޮންނަނީ ގިނަ ރުފިޔާ ލިބޭ އަދި މުޖުތަމައު ބޮޑަށް ބަލައިގަންނަ ދާއިރާއެއްގެ ވަޒީފާއެއް ދަރިފުޅު އަދާ ކުރުވާށެވެ.
ސްކޫލު މަދަރުސާތަކުގައި ބާއްވަމުން އަންނަ "ކެރިއަރ ޑޭ" ތަކަށް ކުދިން ތައްޔާރުކޮށް ފޮނުވަނީ ބެލެނިވެރިންނެވެ. އެކުދިންގެ އިހްތިޔާރު އެކަމުގައި އޮންނަނީ މަދު ފަހަރަކު އެވެ. މައިންބަފައިން ބޭނުން ގޮތަކަށް ދަރިން ތައްޔާރުކޮށް ފޮނުވައެވެ. ކަން މިހެންހުރުމުން އެކުއްޖާ ބޮޑުވެ، މުޖުތަމައުގެ ތެރެއަށް ނުކުންނަ ހިނދު، އެކުއްޖާއަށް ދިމާވެދާނެ ކަންތައްތަކާއި ދޭތެރޭ ވިސްނާލަނީ އަޅުގަނޑުމެންގެ ތެރެއިން ކިތައް މީހުންތޯއެވެ؟
ކުއްޖާގެ މައިންބަފައިން އެގޮތަށް އެކުއްޖާ ހައްދުވަމުން ބޮޑުކުރާނަމަ، ކުއްޖާއަށް އެދާއިރާއަކުން ކުރިއަަށް ދިއުމަށް ޒާތެއްގެ މަޖުބޫރުކަމެއް އިހުސާސް ކުރެވޭނެއެވެ. ކުދިންނަށް އެކުދިން ކެރިއަރ ނުވަތަ ކުރިއަށް ދާން ބޭނުންވާ ދާއިރާ ދެނެގަނެވެނީ ގިނަ ފަހަރަށް މައިންބަފައިން ބުނާ ދާއިރާއަކުން ކިޔަވަން ފަށާ ފަހުންނެވެ. ދުނިޔެއަށް ލޯ ހުޅުވި، ކަންކަމުގެ އާޖުފާޖު އެނެގެން ފަށާ ހިސާބުންނެވެ. މިހިސާބުން އޮންނަނީ ވަގުތު ފާއިތު ވެފައެވެ. މީގެ ސަބަބުން ބައެއް ކުދިން ކިޔަވާ ހިތް ނުވެ، ޝައުޤުވެރިކަން ގެއްލި، ފާސް ނުވެ ކޯސް ދޫކޮަށްލާ ހިސާބަށްވެސް ދެއެވެ. މިހެން ދިމާވުމުން ކުއްޖާ ނަން ވަނީ ކިޔަވަން ނޫޅޭ، ނުކިޔަވާ ކުއްޖެއްގެ ގޮތުގައެވެ. އޭގެ ތެރެއިން ބައެއް ކުދިން އެހެން ދާއިރާއަކުން ކިޔަވަން ބަލާއިރު އޮންނަނީ ބޭކާރު އަހަރުތަކެއް ފާއިތުވެެގެން ގޮސްފައެވެ. ދިރިއުޅުމެއް ފެށިފައެވެ. ދެން އެކުއްޖަކު އަސްލުގައި ޝައުގުވެރިކަން އުފެދުނު ދާއިރާއަކުން ކިޔަވާނޭ ހިތްވަރެއް އެކުއްޖާގެ ނުހުރެއެވެ. ޒާތެއްގެ މަޖުބޫރު ކަމެއްގައި އެކުއްޖާ ގައިދުވަނީއެވެ.
ދަންނަވަން މިއުޅެނީ ކުދިން ކިޔަވަން ބޭނުންވާ ދާއިރާއަކުން ކިޔެވުމުގެ ފުރުސަތު އެކުދިންނަށް ދޭށެވެ. އެކުދިން ބޭނުންވާ ދާއިރާއެއް އިހްތިޔާރު ކުރުމުގެ ފުރުސަތު އެކުދިންނަށް ދޭށެވެ. އެކުދިން މުޖުތަމައަށް ނުކުތުމުގެ ކުރިން، ކެރިއަރ "ގައިޑް" ކޮށްދޭށެވެ! އެއްމެ ޅަ އުމުރުގައި މިގޮތަށް "ގައިޑް" ކޮށްދިނުމަށްވުރެ، ތަންދޮރު އޮޅުންފިލާ، އަމިއްލައަށް ނިންމުންތައް ނިންމޭވަރަށް ކުއްޖާ ބޮޑުވުމުން "ގައިޑް" ކޮށްދިނުން މުހިއްމެވެ. އެހާރުން އެކުދިން ޝައުގުވެރިވާ ދާއިރާއަކުން ކުރިއަށް ހިނގާނެއެވެ. އެކަމުގައި އެއްވެސް މަޖުބޫރުކަމެއް ނުހުންނާނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން