އަންހެނުން ބުރުގާ ނާޅާ އުޅޭ ވާހަކަ އަކީ ބައެއް ފިރިހެނުން ވަރަށް އާއްމުކޮށް ދައްކާ ވާހަކައެކެވެ. އެވެނި މިވެނި އަންހެނެއް އަދިވެސް ބުރުގާ ނާޅާ ވާހަކައަކީ ބައެއް ފިރިހެންވެރިން އާދަވެ، ދައްކާ ވާހަކައެކެވެ. އަދި ބުރުގާ ނާޅާ އުޅޭ އަންހެނުންނާ ދިމާލަށް، އައުރަ ނިވާ ނުކުރާ، އޮރިޔާމުން އުޅޭ ބައެކޭ ބުނަނީ މަދެއްކޮށެއް ނޫނެވެ. ކަންމިހެން ހުރިނަމަވެސް ބައެއް ފިރިހެނުންނަށް، އަންހެނުން ބުރުގާ ނާޅާ ވާހަކަދެއްކުން މާ ތާހިރެއް ނޫނެވެ.

އިސްލާމް ދީނުގައި ދެ ޖިންސުގެ ދެބައިމީހުންގެ އައުރަ ވަނީ ބަޔާންކޮށްދީފައެވެ. އެންމެ އާއްމުކޮށް އެނގޭ ގޮތުގައި ފިރިހެނާގެ އައުރަ އަކީ އޭނާގެ ފޫޅާއި ކަކުލާއި ދެމެދެވެ. އަންހެނާގެ އައުރައިގެ ތެރޭގައި އޭނާގެ ބޮލުގެ އިސްތަށިގަނޑާއި ކަނދުރާ އަދި ކަރު ހިމެނެއެވެ. މަޒްހަބީ ހިލާފުތަކެއް ހުރިނަމަވެސް މިއީ އަހަރެމެން ގަބޫލު ކުރާ ހަމައެވެ. އެހެންކަމުން ބުރުގާ ނާޅާ އަންހެނުންނާ ދިމާލަށް އައުރަ ނިވާ ނުކުރާ ބައެކޭ މީހުން ބުނެ އުޅެއެވެ.

އާދޭހެވެ! ފިރިހެނާގެ އައުރަ އަކީ އޭނާގެ ފޫޅާއި ކަކުލާއި ދެމެދެވެ. ޒަމާން ބަދަލުވެ އޮރިޔާމުން އުޅުނު ފިރިހެނުން އެމީހުންގެ އައުރަ ނިވާކުރި ޒަމާނެއް ދިވެހިންގެ ތެރޭގައި އައެވެ. މި ދެންނެވީ ފޫޅުން ތިރީގައި މުންޑު އަނދެ، ހުސްގަޔާ އުޅުނު ޒަމާން ބަދަލުވި ވާހަކައެވެ. އެއަށްފަހު އަނެއްކާ މި ފެންނަނީ އެއްކަލަ ދިގު ފަޓުލޫނުތަކާއި ކަކޫ ނިވާވަރުގެ ސޯޓުތައް ކުރުވަމުން ގޮސް، ކަކޫ ފެންނަ ވަރުގެ ކުރު ސޯޓުބުރިތައް ލާ މަންޒަރެވެ. 

ދަންނާށެވެ! ފިރިހެނާގެ ކަކުލާއި ފަލަމަސްފަނޑު ފެނުމަކީ އެއީ އޭނާގެ އައުރަ ކަޝްފުވުމެވެ. އަދުގެ ގިނަ ޒުވާން ފިރިހެންކުދިން މިއަދު ތިބެނީ މި ހާލުގައެވެ. ހީވާ ކަހަލައެވެ. ފިރިހެނެއްވިއްޔާ "އޯކޭ" ވާނެއެވެ. ނޫނެކެވެ! "އޯކެ" އެއް ނުވާނެއެވެ. އަންހެނެއް ވިޔަސް އަދި ފިރިހެނެއްވިޔަސް އައުރަ ނިވާ ނުކޮށް އުޅޭނަމަ އެ އުޅެވެނީ ހަމަ އޮރިޔާމާއެވެ. މި ސަބަބާއި އެކު އަންހެނުން ބުރުގާ ނާޅާ ވާހަކަދައްކަން ބައެއް ފިރިހެނުން ލަދުގަންނަން ޖެހޭނެއެވެ.

އަންހެނާ ބުރުގާ ނާޅާ ހުރީމަ އެ ހުރީ އޭނާގެ އައުރަ ކަޝްފުކޮށްގެންނޭ އަހަރެމެން ބުނާއިރު، ކަކުލާ ފަލަމަސްގަނޑު ދައްކައިގެން އުޅޭ ފިރިހެނުން އެ ތިބެނީ އައުރަ ކަޝްފުނުކޮށް ހެއްޔެވެ؟ އައުރަ، އައުރައަކަށް ވަނީ ހަމައެކަނި އަންހެނާ ބުރުގާ ނާޅާތީ ހެއްޔެވެ؟ ފިރިހެނާގެ ފަލަމަސްގަނޑު، އައުރައަކަށް ނުވަނީ ހެއްޔެވެ؟

ބުރުގާ ނާޅާ އުޅޭ އަންހެނުންގެ ވާހަކަ، ކުރު ސޯޓުބުރި ލައިގެން، ފަލަމަސްގަނޑު ދައްކައިގެން އުޅޭ ފިރިހެނުންނަކަށް ނުދެއްކޭނެއެވެ. ތިމާ އިސްލާހު ނުވެ، އެހެންމީހުން އިސްލާހު ކުރާނީ ކޮން ހަމައަކުން ހެއްޔެވެ؟

ކަންމިހެން ހުރުމާއި އެކު، ދެ ޖިންސުގެ މީހުންވެސް،  އައުރަ ނިވާކުރަން ސަމާލުކަން ދޭށެވެ. އެއީ އަންހެނަކަށް ވީތީ އެކަނި އޮންނަ ކަމެއް ނޫނެވެ. އެކަން ފިރިހެނުން ދަންނަން ވާނެއެވެ.