ކީރިތި ޤުރުއާނަކީ މާތް ﷲގެ ކަލާމްފުޅެވެ. ސަމާވީ ފޮތެއްގެ ގޮތުގައި ބިމަށް ފޮނުއްވެވި އެންމެ ފަހުގެ ދުސްތޫރެވެ. އެންމެހާ މަޚުލޫޤާތްތަކާ މެދު އިންސާނާ ބަހައްޓަންޖެހޭ ގުޅުން ކަނޑައަޅައި، ފުރިހަމަ ގޮތުގައި ބަޔާންކޮށްފައި އޮތް އިލާހީ ގާނޫނެވެ. އިންސާނިއްޔަތަށް ބޭނުންވާ އަމާންކަމާއި އޮމާންކަމާއި ޞުލްހަ މަސަލަސްކަމަށް އެ ފޮތް މަގު ދައްކައެވެ. މުއުމިނުންނަށް އޭގައި ޝިފާއެއް ވެއެވެ. އީމާނުގެ އަހުލުވެރީންނަށް އުފާވެރިކަމުގެ ޚަބަރު ދެއްވައެވެ. ކާފިރުވި މީހުންނަށް ވަޢީދުގެ އިންޒާރު ކުރައްވައެވެ. އެހެންކަމުން ކީރިތި ޤުރުއާނަށް ލޯބިކުރުމީ އީމާންކަމުގެ ޢަލާމާތެކެވެ. އަދި އެ ފޮތަށް ރުޅިއެރުމީ ކާފިރުކަމެވެ.

ކީރިތި ޤުރުއާނަކީ އެއްވެސް މަޚުލޫޤެއްގެ ހިއްސާއެއް ނެތް، ޚާލިޤުވަންތަ މާތް ﷲގެ ރިސާލަތެކެވެ.  އެންމެހާ މަޚުލޫޤުންގެ ހުރިހާ ކަމެއް އެންމެ މޮޅަށް ދެނެވޮޑިގެންވާ ޚާލިޤުގެ ފަރާތުން އެ މަޚުލޫޤުންނަށް ފޮނުއްވެވި މަގު ޗާޓެކެވެ. އެއް މަޚުލޫޤެއްގެ ޙައްޤު ކަނޑައެޅުއްވުމުގައި އެހެން އެއްވެސް މަޚުލޫޤަކަށް އުނިކަމެއް ނާންނާނޭ ގޮތަށް ރާއްވަވައިފައިވާ ޤަވާއިދުތަކެކެވެ. މަތިވެރި އިލާހެއްގެ ކިބައިން މެނުވީ މިހާ ފުރިހަމަ ގޮތެއްގައި އެއްވެސް އުސޫލުތަކެއް ކަނޑައެއް ނޭޅޭނެ އެވެ. އެހެންނޫނީ ފެންނަން ހުންނާނީ ފުށުއެރުންތަކާއި، އެއްކަމެއް އަނެއްކަމަކާ މުޑިއަރާ އެތައް ކަމެކެވެ. މި ވާހަކަ ބަޔާންކުރައްވައި މާތް ﷲ ވަޙީކުރައްވައިފައި އޮތް ބަސްފުޅެއްގެ މާނައިގައި ވަނީ "ފަހެ، ޤުރުއާނާ މެދު އެއުރެން ވިސްނައި ފިކުރު ނުކުރަނީ ހެއްޔެވެ؟ އެ ޤުރުއާނަކީ، ﷲ ނޫން އެހެން ފަރާތަކުން އައި އެއްޗެއް ކަމުގައި ވީ ނަމަ، ގިނަވެގެންވާ ތަފާތުތައް އެއިން އެއުރެންނަށް ފެނުނީހެވެ." (އައްނިސާ: 82)

ކީރިތި ޤުރުއާނުގައި އަންގަވައިފައި އެވާ ފަދައިން އެއްވެސް ޚިލާފެއް އެ ފޮތުގެ އެއްވެސް ހިސާބަކުން ފެންނަން ނެތީ އެކަންޏެއް ނޫނެވެ. އަދި ކިޔެއް، އެ ފޮތުގައި ބަޔާންކުރާ އެއްވެސް ކަމަކާ، ދުނިޔެ ހިނގުމުގެ ނިޒާމާ ވެސް ފުށުއެރުމެއް ނުވަނީއެވެ. އިންސާނީ ޠަބީއަތުގެ އަސްލާ ވެސް ޚިލާފުކަމެއް ނުފެންނަނީ އެވެ. ޒަމާނީ ޢިލްމީ ހޯދުންތަކުން ނުކުންނަ އެކިއެކި ނަތީޖާތަކާއި ކަންކަމުގެ ޙަޤީޤަތްތަކުގެ ވާހަކަ ހަމަ އެ ގޮތަށް، ރަނުންރަނަށް ބަޔާންވެގެން ވާތީ އެބަ ފެނެއެވެ. މި ކަންކަމުން ތާޒާވެ އާރޯވަނީ އީމާންތެރި ހިތްތަކުގެ ތަޤުވާއެވެ. ނިފާޤުގެ ހިތްތަކަށްބަލިމަޑުކަން އިތުރުވެ ޝައްކުގެ މަގަށް ވެއްޓިދެއެވެ. ކާފިރުތަކުންގެ ފުރެދުން ބޮޑުވެ އުރެދުން އިތުރުވަނީ އެވެ.

ޤުރުއާނުގެ ތިލާވަތުކުރެވޭ ހިނދު ކަނުލައި އަޑު އެހުމަކީ، މާތް ﷲ ރަޙުމަތްލައްވާނޭ ކަމެކެވެ. ކިޔެވާ އާޔަތްތަކުގެ މާނަ ނޭނގުނު ކަމުގައި ވިޔަސް މެއެވެ. މި ކަން ބަޔާންކުރައްވައި އެންގެވި ބަސްފުޅުގެ މާނައިގައި ވަނީ އަންނަނިވި ފަދައިންނެވެ. "އަދި ޤުރުއާން ކިޔަވާހިނދު ތިޔަބައިމީހުން ހަނުތިބެ، އެއަށް ކަނުލައި އަހާށެވެ! (އެއީ) ތިޔަބައިމީހުންނަށް ރަޙުމަތް ލެއްވުމަށް ޓަކައެވެ." (އަޢްރާފް: 204)

 

(ކީރިތި ޤުރުއާނަކީ ...  - އައްޝެއިޚް މުޙައްމަދު އަފްޟަލް؛ ދީނުގެ މަގު، އަހަރު 3، އަދަދު 22، ޞ.1 – 26 މެއި 2023)