އިހްތިރާމް ކުރުމަކީ މިއަދު އަހަރެމެންގެ ތެރޭގައި ނެތެމުންދާ ސިފައެކޭ ބުނުން ދޮގަކަށް ނުވާނެއެވެ. އެކި ދަރަޖަ ދަރަޖައިން އެކި މީސް މީހުނަަށް ކުރަން ޖެހޭ އިހްރިތާމުގެ ދަރަޖަތައް އަހަރެމެންނަށް މިއަދު ނޭނގޭ ކަހަލައެވެ. އިހްތިރާމު ލިބޭނީ އިހްތިރާމް ކޮށްގެން ކަން ވެސް މިއަދު ގިނަ ބަޔަކަށް ނޭނގެއެވެ.

ދަރިން މައިންނަށް ކުރާ އިހްތިރާމުގެ އުފާވެރިކަން ލިބޭ މައިން މިއަދު މަދެވެ. ދަރިން ބައްޕައިންނަށް ކުރާ އިހްތިރާމުގެ ފޮނިކަން ލިބޭ ބައްޕައިން މިއަދު މަދެވެ. މިއީ އެއް ލޭ ހިނގާ، އާއިލާތަކުގެ އެތެރޭގެ ހާލަތެވެ. މައިންބަފައިންގެ އަގު ވެއްޓޭ ގޮތްގޮތަށް އުޅުމާއި އެފަދަ ބަސްތައް ބުނުމާއި މައިންބަފައިންގެ އަބުރަށް ހުތުރުވާފަދަ ބަސްތައް ބުނެ ހަދަނީ ކިތައް ކިތައް މީހުންތޯއެވެ. އިހްތިރާމުގެ ތިލަފަތުގައި އެބައިމީހުން ގެ ބަރުދަން އިހުސާސްވެސް ނުވާ ހާލުގައެވެ.

ދަރިވަރުން އެދުރުންނަށް ކުރި އިހްތިރާމަކީވެސް މި ދިވެހި ފަސްގަނޑުގައި ނުހަނު ބޮޑުކޮށް ކުރަމުން އައި އިހްތިރާމެކެވެ. ނަމަވެސް މިއަދު ނިކަން ދެކެބަލާށެވެ! މުދައްރިސުންނަކީ އެއްވެސް އަގެއް ހުރި ބައެއްކަމުގައި ދަރިވަރުން ދެކޭ ހެއްޔެވެ؟ އެ ދަރިވަރުންގެ ކުރިމަތީގައި މޫނު ދައްކާލަން ނުކެރޭވަރަށް މުދައްރިސުންނަށް މަލާމާތް ކުރުމާއި ޖެއްސުން ކުރުމާއި ފުރައްސާރަކުރުން އިތުރުވެއްޖެއެވެ. ސުކޫލު މާހައުލުގައްޔާއި ސުކޫލުތަކުން ބޭރުގައިވެސް އެއްވެސް އިހްތިރާމެއް ނުކުރެއެވެ. އެ މުދައްރިސުންނަށް ހެއްދެވި ނުހެއްދެވިއަށްވެސް ގޮވަނީއެވެ. އެ މުދައްރިސަކު ދޭ ހެޔޮ ނަސޭހަތަކުން، އެ މުދައްރިސަކަށް މަލާމާތްކޮށް ފުރައްސާރަ ކުރަނީއެވެ. ހެޔޮވާނީ ކިހިނަކުން ހެއްޔެވެ؟

ރައްޔިތުންގެ ކަންކަން ބެލެހެއްޓުމަށް ދައުލަތުގެ އެކި އެކި މަގާމު ތަކުގައި އެކި ދަރަޖަ ދަރަޖައިގާ އެ ތިބޭ އެކި ވަރުވަރުގެ މީހުންނަށްވެސް އަހަރެމެން އިހްތިރާމް ކުރަން ވާނެއެވެ. ނަމަވެސް މި ފެންނަނީ އެ މީސްމީހުންނަށްވެސް އަވަގުރާނަ ގޮވާ ތަނެވެ. ނުދަންނަނީ ތިމަ ތިމާމެންގެ އަސާސީ ހިދުމަތްތައް އެ ގޮތުގައި ލިބިނުމުގައި އެބައިމީހުންގެ މަސައްކަތްތައް ވާ ކަމެވެ. ދިވެހި ރައްޔިތުންނީ ވެރިންނަށް ނުހަނު ބޮޑު އިހްތިރާމަކާއި ގަދަރެއް ކުރި ބައެކެވެ. ނަމަވެސް މިއަދު މުޅި މި މަންޒަރު ބަދަލުވެއްޖެއެވެ. އިހްތިރާމް ކުރުން އެއީ އަޅުވެތިވުން ކަމުގައި ބުނެ، އަވަގުރާނަ ގޮވުމަކީ މިނިވަންކަން ކަމުގައި ވެ ނިމިއްޖެއެވެ. ހެޔޮވާނީ ކިހިނަކުން ހެއްޔެވެ؟

ދަރިން މައިންބަފައިންނަށް ކުރާ އިހްތިރާމާއި، ދަރިވަރުން އެދުރުންނަށް ކުރާ އިހްތިރާމާއި، ރައްޔިތުން ވެރިންނަށް ކުރާ އިހްތިރާމުގެ އަސަރު މުޖުތަމައުން މި ދަނީ ނެތެމުންނެވެ. މުޅިން ނެތިގެން ދިއުމުގެ ކުރިން، މިއީ އިއާދަކުރަންޖެހޭ ރީތި އާދައެކެވެ. މިކަމުގައި ހަމަ ކޮންމެ ދިވެހި ދަރިއެއްގެ އެއްބާރުލުން ބޭނުން ވާނެއެވެ.