އެޓްލާންޓިކް ކަނޑުގެ އަޑީގައިވާ ޓައިޓެނިކް ބޯޓުގެ ބައިތައް ބަލާލުމަށް ފަތުރުވެރިން ގެންދިއުމަށް ބޭނުންކުރި ސަބްމާސިބަލްއެއް ގެއްލިގެން ހޯދުމުގެ މަސައްކަތް ކުރަމުންދާ ކަމަށް ބޮސްޓަން ކޯސްޓްގާޑުން ހޯމަ ދުވަހު ބުނެފި އެވެ.
ކޯސްޓްގާޑުން ބުނީ ގެއްލިފައިވާ އުޅަނދު ހޯދުމުގެ މަސައްކަތުގައި ސާޗް އެންޑް ރެސްކިއު މިޝަނެއް ހިންގަމުންދާ ކަމަށެވެ.
އެގޮތުން، އިނގިރޭސި ނޫހެއް ކަމަށްވާ ގާޑިއަން އިން ރިޕޯޓްކޮށްފައިވާ ގޮތުގައި ކަނޑުއަޑީގައިވާ ޓައިޓޭނިކް ބޯޓު ބަލާލުމަށް އޯޝަންގޭޓް އެކްސްޕެޑިޝަންސް ކުންފުނިން މި ޖޫން މަހުގެ 12 އިން 20 ގެ ނިޔަލަށްކުރިއަށްގެންދިއުމަށް ހަމަޖެހިފައި އޮތީ 8 ދުވަހާއި 7 ރޭގެ މައްޗަށް އެކުލެވިގެންވާ އެންމެ ގިނަވެގެން ހަ މީހުން ހިމެނޭ ގޮތަށް އޮތް ދަތުރެކެވެ.
އަދި އޯޝަންގޭޓް އެކްސްޕެޑިޝަންސް އިން 8 ދުވަހުގެ މުއްދަތަށް ޓައިޓެނިކް ބަލާލުމަށް ފަތުރުވެރިންނަށް ކުރިއަށްގެންދާ މި ޑައިވިން ޓުއާތަކަށް މީހަކަށް 250،000 އެމެރިކާ ޑޮލަރު ޚަރަދުވާ ކަމަށް ބީބީސީން ބުނެ އެވެ.
މީގެ 37 ވަރަކަށް އަހަރުކުރީން، 1985 ވަނަ އަހަރު ކެނެޑާގެ އައްސޭރިފަށާއި ގާތްގަނޑަކަށް 650 ކިލޯ މީޓަރު (404 މޭލު) ދުރުން އެޓްލާންޓިކް ކަނޑުގެ އަޑިން ޓައިޓޭނިކް ބޯޓު ފެނުނު ފަހުން، މިހާތަނަށްއައިއިރު ދުނިޔޭގެ އެކި ކަންކޮޅުތަކުން 250 އެއްހާ މީހުން ކަނޑުއަޑީގައިވާ އެ ސަރަހައްދަށް ޒިޔާރަތްކޮށްފައިވާއިރު، އޭގެ ތެރޭގައި "ޓައިޓޭނިކް" ފިލްމު ޑައިރެކްޓްކުރި މަޝްހޫރު ފިލްމު ޑައިރެކްޓަރު ޖޭމްސް ކެމަރަން ހިމެނެ އެވެ.
ފަހުގެ މީޑިއާ ހަބަރުތައް ބުނާގޮތުން، މިހާތަނަށްއައިއިރު ގެއްލިފައިވާ ސަބްމާސިބަލްގައި ތިބި ފަސިންޖަރުންގެ އަދަދު އަދި ކަށަވަރުކޮށްދީފައެއް ނުވެ އެވެ.