އުޅުމުގައި ބައެއް މީހުން ނަންވެފައި ވަނީ ރުޅިގަދަ މީހުންގެ ގޮތުގައެވެ. އަދި އަނގަ ހުތުރު، އުޅުން ނުބައި މީހުންގެ ގޮތުގައެވެ. އަގަލު ކުޑަ، ހަޔާތް ކުޑަ، ގޮތެއް ފޮތެއް ނެތް މީހުންގެ ގޮތުގައެވެ. ނަމަވެސް އަސްލަކީ ބައެއްފަހަރު އެ މީސްމީހުންނީ އެފަދަ ބަޔަކަށް ނުވާ ކަމެވެ. ނަމަވެސް އެބައިމީހުން ނަންވެފައި އޮންނަނީ އެފަދައިންނެވެ.

ދުނިޔޭގައި އިންސާނާ އުޅެމުން ދާއިރު، އޭނާގެ އަހުލާގާއި މިޒާޖު، އެހެންމީހުންނަށް ފެންނާނީ ނުވަތަ އެނގޭނީ އެހެން މީހުންތެރޭގައި އެމީހަކު އުޅޭ ގޮތަކުންނެވެ. އެހެން މީހުނަށް އެމީހާ ފެންނަ ތަނަކު، އެމީހަކު އުޅޭ ގޮތަކުންނެވެ. މިއީ އިންސާނުންގެ ޠަބީއަތެވެ.

ކުޅިވަރު މައިދާން ތަކާއި އިޖްތިމާއީ އެއްވުންތަކުގައި، އަޑުގަދަކޮށް ހަޅޭލަވާ ހަދާ މީހުން އުޅެއެވެ. އަނގަ ހުތުރު މީހުންނާއި އަގަލު ކުޑަ މީހުން އުޅެއެވެ. އަދަބެއް ސަދަބެއް، އަހުލާގެއް ނެތް މީހުން އުޅެއެވެ. އެހެން މީހުންނަށް އިހްތިރާމް ކުރުމެއް ނެތި، ޖެއްސުން ކުރުމާއި މަލާމާތް ކުރާ މީހުން އުޅެއެވެ. މިފަދަ މީހުންނީ ކާއިނާތުގެ ދަށުގައި މުޑުދާރު ބައެއްގެ ގޮތުގައި ނަން ލިޔެވި، ކިޔޭނޭ ބައެކެވެ. އެހެނީ ގިނަ ބަޔަކު، އެމީހަކު ދުށް ގޮތުގައި އެމީހާގެ އުޅުމެއް ގުޅުމެއް، އަދަބެއް ސަދަބެއް ނެތީތީއެވެ.

ޒަމާން ބަދަލުވެފައިވާ މި ދުނިޔޭގައި މިއަދު މީސްމީޑިޔާގެ ދައުރު ވަރަށް ބޮޑެވެ. މީސް މީޑިޔާގެ މަންސަ ތަކުގައި އަޑުގަދަކޮށް ހިތުހުރި އެއްޗެ ބުނެ، ހަޑިހުތުރު ބަހުން ޕޯސްޓްކޮށް ހަދާ މީހުން މަދެއް ނޫނެވެ. މީހުން ކޮށްފައި ހުންނަ ޕޯސްޓް ތަކަށް ޒުވާބުދީ އަވަގުރާނަ ގޮވާ މީހުން މަދެއް ނޫނެވެ. ހައްތަހާވެސް މި ދުނިޔޭގައި އެމީހެއްގެ އަބުރު އެމީހަކު އަމިއްލަ އަށް ކަތިލަން ކުރެވޭ ކަންކަމެވެ. އަދުގެ މި ޒަމާނުގައި މީސް މީޑިޔާގައި ލިޔެ ދޫކޮށްލާ އެއްޗަކީ ގިނަ ބަޔަކަށް ފެންނަ އެއްޗެއްސެވެ. އަދި ފަހުން އެ ލިޔެވުނު އެެއްޗެއްގެ މައްޗަށް ހިތާމަކޮށް، މީސްމީޑިޔާއިން އެ ފުހެލިނަމަވެސް، ރައްކާކުރި މީހެއްގެ އަތުގައި ރައްކާވެފައި އޮންނާނެއެވެ. މިފަދައިން މީސްމީޑިޔާގެ މަންސަތަކުގައި އަނގަ ހުތުރުވެ، ތިމާ ވަރެއް ނެތިގެން އުޅޭ މީހުންނީ ވެސް ގޮތެއް ފޮތެއް ނެތް ބައެއްގެ ގޮތުގައި ކާއިނާތުގެ ދަށުގައި ނަން ވާނޭ މީހުންނެވެ.

ކަން މިހެން ހުރުމާއި އެކު، އަނގަ ހުތުރު، ނުލަފާ މީހެއްގެ ގޮތުގައި ނަންވިޔަ ނުދޭށެވެ. ކުޅިވަރު މައިދާންތަކާއި އިޖްތިމާއީ އެއްވުންތަކުގައި އަވަގުރާނަ ނުގޮވާށެވެ. ހަޔާތް ކަނޑާލާފާ، މާ ގަދަވެފައި ނޫޅޭށެވެ. އަގަލު ކުޑަވެގެން، މާ ރުޅިގަދަވެގެން ނޫޅޭށެވެ. މީސްމީޑިޔާގައި ހަމަ ކަމެއް ވާއިރަށް އަވަގުރާނަ ގޮވާ އެއްޗެހި ނުލިޔާށެވެ. ހަގީގަތް ނުބަލާ ރުޅި އިސްކޮށް އެއްޗެހި ނުލިޔާށެވެ. މިހުންނަނީ އުޅުމެއްގެ ގިތުން މުޑުދާރު ކަންކަމެވެ. ތިބާގެ ނަން، ތިބާ ހުތުރު ނުކުރާށެވެ. އަނގަ ހުތުރު، ނުލަފާ މީހެއްގެ ލޭބަލް، ގައިގާ ނާޅުވާށެވެ!