ދުނިޔޭގައި އިންސާނުން ލައްވަވާފައި ވަނީ ޖޯޑު ޖޯޑަށެވެ. އަންހެނުންނާއި ފިރިހެނުންނެވެ. އިންސާނުން މި ދުނިޔެމަތީގައި އުޅި، މި ދުނިޔެ އާބާދު ކުރުމަށް، ދެ ޖޯޑު ބޭނުން ވެއެވެ. ހަމަ އެފަދައިން މޭވާ އަޅާ ގަސްގަހުގައި މޭވާ އެޅުމާއި، އޭގެ އާބާދީ އިތުރުވުމަށްވެސް ދެ ޖޯޑު ބޭނުންވެއެވެ. މިއީ ދުނިޔޭގެ ނިޒާމު ތަރުތީބުވެފައިވާ ގޮތެވެ.

ގަސްގަހާގެއްސާއި ފަތްޕިލާވެލީގެ ދިރާސާކުރާ ފަރާތްތަކުންވެސް ފާހަގަ ކުރާ ހަމަ ކޮންމެ މޭވާއެއް އެޅުމަށްވެސް، އެ މޭވާއެއްގެ މަލުގެ އަންހެން މަލަކާއި ފިރިހެން މަލެއް ބޭނުންވެއެވެ. މިއީ ދިރާސާވެރިން ހޯދި ހޯދުމެއް ނަމަވެސް މީގެ އެތައް ސަތޭކަ އަހަރެއް ކުރިން ބާވައިލެއްވި ކީރިތި ޤުުރުއާނުގައި މާތް ﷲ ވަނީ މިކަން ސާފުކޮށް ބަޔާން ކޮށްދީފައެވެ. މާތް ﷲ ވޙީކުރައްވާފައި ވެއެވެ.

﴿3﴾ وَهُوَ الَّذِي مَدَّ الْأَرْضَ وَجَعَلَ فِيهَا رَوَاسِيَ وَأَنْهَارًا ۖ وَمِن كُلِّ الثَّمَرَاتِ جَعَلَ فِيهَا زَوْجَيْنِ اثْنَيْنِ ۖ يُغْشِي اللَّيْلَ النَّهَارَ ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ. މާނައީ: އަދި އެކަލާނގެއީ، ބިން ފަތުރުއްވައި، އެ ބިމުގައި ހަރުލައި ހުންނަ ފަރުބަދަތަކާއި، ކޯރުތައް ލެއްވި ރަސްކަލާނގެއެވެ. އަދި އެއީ، ހުރިހާ ބާވަތެއްގެ މޭވާތައް، ޖޯޑުޖޯޑަށް (ދެވައްތަރުން ދެވައްތަރުން) ލެއްވި ރަސްކަލާނގެއެވެ. (އަދި) އެކަލާނގެ ރޭގަނޑުން ދުވާލު ނިވައިކުރައްވަތެވެ. ހަމަކަށަވަރުން، އެ (ހުރިހާ) ކަންތަކުގައި ފިކުރުކުރާ ބަޔަކަށް، ހެކިތަކެއް ވާކަން ކަށަވަރެވެ. (އައް ރަޢްދް 3 ވަނަ އާޔަތް)

މި އާޔަތުގައި ޖޯޑު ޖޯޑަށް (ދެވައްތަރުން ދެވައްތަރުން) ވޭވާތައް މާތް ﷲ ލައްވަވާފައިވާކަން ވަރަށް ސާފުކޮށް އެބަ އެނގެއެވެ. މި ކަންކަން މިހެން ތަރުތީބު ވެފައި ވުމުގައި އެތައް ސިއްރެއް ވާނެއެވެ. ސައިންސުވެރިން މި ހޯދަނީ މިފަދަ ސިއްރުތަކެވެ. މިފަދަ ކަންކަމާއި މެދު ވިސްނުމަށް އިޝާރަތްކުރައްވާ "ހަމަކަށަވަރުން، އެ (ހުރިހާ) ކަންތަކުގައި ފިކުރުކުރާ ބަޔަކަށް، ހެކިތަކެއް ވާކަން ކަށަވަރެވެ." މިފަދައިން އެ އާޔަތުގެ ފަހު ބައިގައި މާތް ވަނީ ވަޙީ ކުރައްވާފައެވެ. 

އާދޭހެވެ! މާތް ﷲ ގެ މިފަދަ ކޮންމެ އުފެއްދުމެއްވެސް ވަނީ އޭގެ ފުރިހަމަ ގޮތުގައި އުފައްދަވާފައެވެ. މާތް ﷲ އީ އެއްމެ ފުރިހަމަ ގޮތުގައި މަހުލޫގުން އުފެއްދެވި އަދި އެ މަހުލޫގުންގެ ކަންކަން އެއްމެ މޮޅަށް ދެނެވޮޑިގެންވާ ރަސްކަލާންގެއެވެ. ﷲ ގެ ހުސްޠާހިރުވަންތަކަމާއެވެ.