މިއަދަކީ ހައްޖު މަހުގެ 9 ވަނަ ދުވަހެވެ. އެހެން އިބާރާތަކުން މިއަދު ސިފަކުރާނަމަ މިއަދަކީ ބަރަކާތްތެރި ޙައްޖު ދުވަހެވެ. ނުވަތަ ޢަރަފާތް ދުވަހެވެ. އެތަކެއް މުސްލިމުންނެއް މައްކާގެ އަރަފާތް ބިމަށް ޖަމާވެ ހައްޖުގެ މަތިވެރި އަޅުކަން އަދާކުރާ، މާތް ދުވަހެކެވެ. ދުނިޔޭގެ އެކި ކަންކޮޅުތަކުގައި ގިނަ އަދަދެއްގެ މުސްލިމުން ރޯދައަށް ހުންނަ ދުވަހެކެވެ.

މިދުވަހާއި މުސްލިމުން ކުރިމަތިލާއިރު ދީނީގޮތުން ސަމާލުކަން ދޭންޖެހޭ ކަންތައްތަކެއް އެބަހުއްޓެވެ. މުޅި އަހަރުގައި އަންނަ އެންމެ މާތް ދުވަސްތަކުގެ ތެރޭގައި ހިމެނޭ ޙައްޖު ދުވަހުގެ މާތްކަމާއި މަތިވެރިކަން ކީރިތި ގުރްއާނާއި މާތް ރަސޫލާގެ ސުންނަތުގައި ވަނީ ބަޔާން ކުރައްވާފައެވެ.

ދީނީ އިލްމުވެރިން ވިދާޅުވާ ގޮތުގައި ހައްޖުދުވަހަކީ މާތް ﷲ އަށް ދަންނަވާ ދުޢާ އިޖާބަކުރައްވާނެ ދުވަހެކެވެ. މިއަދަކީ ﷲ ގެ އަޅުތަކުންނަށްޓަކައި މަލާއިކަތުންގެ އަރިހުގައި ﷲ ސުބުޙާނަހޫވަތަޢާލާ ފަޚުރުވެވޮޑިގަންނަވާ ދުވަސް ކަމަށްވެސް އިލްމުވެރިން ވިދާޅުވެފައިވެއެވެ. މިއަދަކީ އަޅުގަނޑުމެންގެ މައްޗަށް ﷲ ރަހުމަތެއް ކަމުގައި ބާވައިލެއްވި އިސްލާމް ދީން ފުރިހަމަ ކުރެއްވި ދުވަސްވެސްމެއެވެ. މިއަދަކީ އެންމެ ގިނައިން ފާފަފުއްސަވައި ނަރަކައިން މުއްތިކުރުމުގެ ދުވަސް ކަމަށްވެސް ގިނަ އިލްމުވެރިން ވިދާޅުވެއެވެ.

ހައްޖު ދުވަހުގެ ބަރަކާތާއި މާތްކަން ލިބިގަތުމަށް ސުންނަތުގައި ވަރަށް ބޮޑަށް ބާރުއަޅުއްވާފައިވެއެވެ. ޙައްޖު މަހުގެ ފުރަތަމަ ދިހަ ދުވަހުގެ މާތް ކަމަށް ބަލާއިރު މިދުވަސްތަކަކީ ކިޔަމަންތެރިކަން އަދާކުރުމަށް އެންމެ އެދެވިގެންވާ ދުވަސްތަކުގެ ތެރޭގައި ހިމެނޭ ދުވަސްތަކެކެވެ. އެގޮތުން މި ދިހަ ދުވަހު، ރޯދައަށް ހުރުމާއި ހާއްސަކޮށް ހައްޖު ދުވަހު ރޯދައަށް ހުރުމަކީ މުސްލިމުން ކުރުން މުސްތަޙައްބު ކަމެކެވެ.

އަދި މިދުވަސްތައް މާތް ﷲ ވަނީ އެހެން ދުވަސްތަކަށްވުރެ މަތިވެރި ކުރައްވާ މާތް ކުރައްވާފައެވެ. އެހެންކަމުން ކޮންމެ މުސްލިމަކުވެސް މި ދިހަ ދުވަހު ހެޔޮ ޢަމަލުކޮށް ތައުބާވުން އިތުރު ކުރަން ޖެހެއެވެ. ޙައްޖު މަހުގެ ފުރަތަމަ ދިހަ ދުވަހުގެ ބަރަކާތާއި ޘަވާބު ލިބިގަތުމަށްޓަކައި ކުރުން އެދެވިގެންވާ ހެޔޮކަން ބޮޑު ޢަމަލުތަކެއްވެއެވެ. މިދުވަސްތަކުގައި ހެޔޮ ޢަމަލު ގިނަ ކުރުމަށް ކީރިތި ރަސޫލާ ވަނީ އުއްމަތަށް ބާރުއަޅުއްވާފައެވެ.

ޙައްޖުގެ އަޅުކަމަކީ ކުޅަދާނަވެގެންވާ ކޮންމެ މުސްލިމެއްގެ މައްޗަށް އުމުރުން އެއްފަހަރު އަދާ ކުރުމަށް ﷲ ފަރުޟު ކުރައްވާފައިވާ އަޅުކަމެކެވެ. މިއަޅުކަން އަދާ ކުރުމަށް ދުނިޔޭގެ އެކިކަންކޮޅު ތަކުން އެތައްސަތޭކަ ބަޔަކު ކޮންމެ އަހަރަކު މައްކާގައި ހުންނަ ކައުބަތު ﷲ ގެފުޅަށް ޖަމާވެއެވެ. މިއީ ދުނިޔޭގައި ބާއްވާ މިފަދަ އެންމެ ބޮޑު އެއްވުމެވެ. މިއެއްވުން ދުނިޔެ ދެމިއޮތްހާ ދުވަހަކު، ކޮންމެ އަހަރަކުމެ ތަކުރާރު ވަމުން ދާނެއެވެ. މިއެއްވުމުގައި ތަފާތު ގައުމުތަކުން ތަފާތު ނަސްލުތަކުގެ މީހުން އެއްވެސް ތަފާތު ކުރުމެއްނެތި ބައިވެރި ވަމުންދެއެވެ. މިއަޅުކަމަކީ އިސްލާމް ދީނުގައި ހަމަހަމަކަމާއި އަދުލުވެރިކަން ވަރަށް ފުރިހަމައަށް ހާމަވެގެންވާ އަޅުކަމެކެވެ.

މިއަހަރުގެ ހައްޖުގެ އަޅުކަން އަދާކުރުމަށް މައްކާއަށް ގޮސްތިބި ޙައްޖާޖީންގެ ފާފަތައް ފުއްސަވައި އެބައިމީހުންނަށް ޙައްޖުގެ ސަވާބައި ދަރުމަ މިންވަރު ކުރައްވާށިއެވެ! އަދި ހައްޖަށް ދިއުމުގެ އުންމީދުގައި ތިބި، އެ ފުރުސަތު ނުލިބި ތިބި ފަރާތްތަކަށް އަވަސް ނުސްތަޤުބަލެއްގައި އެ ފުރުސަތު މިންވަރުކޮށްދެއްވުން އެދި ދުޢާ ކުރަމެވެ!