ތ. ތިމަރަފުށީ ކައުންސިލާއި ޓައިމްސް ޖަމްޢިއްޔާ އިން ގުޅިގެން އަޟްޙާ ޢީދު ދުވަހުގެ މުނާސަބަތުގައި ބޭއްވި "ކައުންސިލް އެންޑް ޓައިމްސް ޢީދު އުފާ މަސްރޭސް 1444" ނިންމުމުގެ ރަސްމިއްޔާތު ބާއްވައިފިއެވެ.
އަޟްޙާ ޢީދު ދުވަހާ ދިމާކޮށް ތިމަރަފުށީގައި އުޅޭ އެންމެހައި ރައްޔިތުންނަށް ހުޅުވާލައިގެން ބޭއްވި މި މަސްރޭހުގައި ޖުމްލަ ހަތް ޓީމު ބައިވެރިވެފައިވެއެވެ.
މިފަހަރުގެ މަސްރޭހުގެ ޗެމްޕިއަން ޓީމަކަށް 10،000ރ. (ދިހަ ހާސް ރުފިޔާ) ގެ ފައިސާ އިނާމެއްދީފައިވާއިރު އެއްވަނަ ޓީމަކަށް ހޮވުނީ ޓީމް އާކުރި އެވެ. ރަނަރަޕް މަގާމް ހާސިލްކުރީ ޓީމް ކަނބުލޮ އެވެ. ދެވަނަ އަށް ދިޔަ ކަނބުލޮ ޓީމަށް 1،500ރ. (ފަނަރަ ސަތޭކަ ރުފިޔާ) ގެ ފައިސާ އިނާމެއް ދީފައިވެއެވެ.
އެންމެ ބޮޑު މަސް ބޭނީ ފަރާތަކަށް ޓީމް ޑޯލްފިންގެ އިބްރާހިމް ރަޝީދު ހޮވުނުއިރު، އެންމެ ގިނަ މަސް ބޭނީ ފަރާތަކަށް ހޮވުނީ ޓީމް އާކުރިގެ އައުޒަމް އެވެ.
މި އަހަރުގެ މަސްރޭހުގައި ބައިވެރިވީ ޓީމުތަކަކީ؛ ޓީމް ކަނބުލޮ، ޓީމް އާކުރި، ޓީމް އައްޕަނުކޭ، ޓީމް އިބްރާހިމް،ޓީމް ޑޯލްފިން އާއި ޓީމް ނިޢުމަތު އަދި ފަޅުމަސް ސްޕޯޓްސް ކްލަބެވެ.