ދުނިޔޭގެ އެކި ކަންކޮޅުތަކުގައި އަބަދުވެސް ކޮންމެވެސް ހައިރާން ކުރަނިވި ކަމެއް ހިނގައެވެ. އެފަދަ ކަންކަމުގެ ވާހަކަ މުޅި ދުނިޔެއަށް ފެތުރި، ގިނަ ބައެއްގެ ސަމާލުކަން ލިބެނީ މީސްމީޑިޔާގެ ޒަރިއްޔާއިންނެވެ. މިއީވެސް އެފަދަ ހައިރާން ކުރަނިވި ވާހަކައެކެވެ.

އުމުރުން އެއްމެ 6 އަހަރުގެ ކުއްޖަކު، އޭނާގެ ބައްޕަ ސަލާމަތް ކޮށްދިން ވާހަކައެވެ. ޗައިނާގެ ހޫބޭ ޕްރޮވިންސްގައި ހިނގި މި ހާދިސާގެ ސީސީޓީވީ ފުޓޭޖް މީސްމީޑިޔާގައި ދަނީ ދައުރުވަމުންނެވެ. އެ މަންޒަރުން ފެންނަ ގޮތުގައި އެ ކުޑަ ކުއްޖާގެ ބައްޕަ، ހަރުގަނޑަށް އަރާތީ ފެނެއެވެ. އެއާއި އެކު އެކުއްޖާ އެ ހަރުގަނޑުގައި ހިފަހައްޓައިގެން ހުރެއެވެ. ގާތް ގަނޑަކަށް 12 ވަރަކަށް ފޫޓު ހުންނަ އެ ހަރުގަނޑުގެ ތިރީގައި އެ ކުޑަ ކުއްޖާ ހިފަހައްޓައިގެން ހުރި އިރު، އެކުއްޖާގެ ބައްޕަ ހަރުގަނޑަށް އަރާ މަސައްކަތް ކުރަމުން ގެންދެއެވެ.

ދެން ފެންނަނީ ކުއްލި އަކަށް އެ ހަރުގަނޑުގެ އެއްފަޅިން ބިންދައިގެން ދާ މަންޒަރެވެ. އެއްފަޅި ބިންދައިގެން ގޮސް އަނެއްފަޅި ބިންދައިގެން ނުދާތީ، ހަރުގަނޑު އެއްކޮށެއް ނު ރޫޅެއެވެ. ނަމަވެސް އެ ހަރުގަނޑުގައި ހަރުދަނާ ކަމެއް ނެތެވެ. އެވަގުތު ހަރުގަނޑުގައި ހިފަހައްޓައިގެން ހުރި 6 އަހަރުގެ ކުއްޖާ ބިރުން ސިއްސައިގެން ދާ މަންޒަރު ފެނެއެވެ. އަދި ހާސްވެ ނުތަނަވަސްވެފައިވާ ހާލު، ބިރުން ރޯތަންވެސް ފެނެއެވެ. ހަރުގަނޑުން އަތް ދޫކޮށްލަން އުޅޭ ކަހަލަ ހަރަކާތެއް އެކުއްޖާގެ ކިބައިން ފެނުނު ނަމަވެސް އެ ކުއްޖާ ރޮމުން ރޮމުންވެސް އެ ހަރުގަނޑުގައި ހިފަހައްޓައިގެން ހުރެއެވެ. އިހުނަށްވުރެ ބާރުލާފަައި ހިފަހައްޓާފައި ހުރިކަން އެނގެއެވެ. 

އެ ކުއްޖާގެ ބައްޕަ ހަރުގަނޑުން މަޑު މަޑުން ފައިބަން މަސައްކަތް ކުރެއެވެ. އަދި އެކުއްޖާއަށް ދުރަށް ދިއުމަށް އިޝާރާތް ކުރެއެވެ. ނަމަވެސް އެކުއްޖާ ބޯ ހުރާލާމަންޒަރުވެސް ފެނެއެވެ. 

ކޮންމެއަކަސް އެކުއްޖާގެ ބައްޕަ މަޑުމަޑުން އެ ހަރުގަނޑުން ފައިބަންދެެއް އެ ކުއްޖާ އެ ހަރުގަނޑުގައި ހިފަހައްޓައިގެން ހުއްޓެވެ. ފަހަރުގައި މި މަންޒަރު ފެނި އަދި މި ވާހަކަ އަޑުއިވިފައި މިކަމަކީ މާ ހައިރާން ކުރުވާ ކަމަކަށް ނުވެދާނެއެވެ. ނަމަވެސް ޗައިނާގެ ޔުނިވަސީޓީއެއްގައި ފިޒިކްސް ރިސާޗް އެންޑް ސްޓަޑީ ސެންޓްރުގެ ޕްރޮފެސަރެއް ވަނީ އެ ސީސީޓީވީ ފޮޓޭޗް އެނަލައިޒް ނުވަތަ ދިރާސާކޮށްފައެވެ. އޭނާ ވިދާޅުވާ ގޮތުގައި އެ ކުޑަކުއްޖާގެ އެފަޓެއް ނުވަތަ އެ ކުއްޖާގެ ސަޕޯޓެއް އެ ހަރުގަނޑުގެ ފުލަށް ނުވަތަ ތިރިއަށް ނުލިބުނު ނަމަ، ހަރުގަނޑުގެ އަނެއްފަޅިވެސް ބިންދައިގެން ގޮސް، އެ ބައްޕަ ވެއްޓޭނެއެވެ. އެކުއްޖާ އެ ހަރުގަނޑުގެ ފުލަށް އެ ދިން ސަޕޯޓުގެ ސަބަބުން ހަރުގަނޑު ކަހާނުލައި ހުރުމަށްވެސް އިތުރު ބާރެއް ލިބޭނެއެވެ. ކަން މިހެން ހުރުމާއި އެކު، އެކުއްޖާ ވެގެން އެ ދިޔައީ ބޮޑު އަނިޔާއަކުން އެކުއްޖާގެ ބައްޕަ ސަލާމަތްކޮށްދިން ކުއްޖަކަށެވެ. އުމުރުން އެއްމެ ހަ އަހަރުގައެވެ.

މި ހާދިސާއިން އެނގެނީ ދަރިން ތަރުބިއްޔަތު ކުރުމުގައި ޖެހިލުން ކުޑަކަމާއި ހިތްވަރުގަދަ ކަން އެކުދިންގެ ހަށިގަނޑުގައި އަށަގަންނުވަން ވާނެ ކަމެކެވެ. އަދި ކަންކަމާ ކުރިމަތި ލުމުގެ ގާބިލުކަމާއި މައިންބަފައިންގެ ހައްގުގައި ފަސްޖެހުމެއް ނުވާކަން އެކުދިންނަށް ބުނެދޭން ވާނެ ކަމެވެ. މިފަދަ ހިތްވަރުގަދަ، ކެރޭ، ދަރިންތަކެއް ކަމުގައި އަޅަމެންގެ ދަރިން ލައްވާށިއެވެ.

 

ހަވާލާ: ސައުތް ޗައިނާ މޯނިން، "ސިކްސް އިޔާސް ބޯއީ، ހޫ ސޭވްސް ހިސް ފާދާރ" - ލިޔަ ސޫ - 2023