އއ. އުކުޅަސް މަގުހެދުމުގެ މަޝްރޫޢުގެ އަމަލީ މަސައްކަތް މި ޖުލައި މަހުގެ 4 ވީ އަންގާރަ ދުވަހު ފަށާފައިވާ ކަމަށް އެމްޓީސީސީ އިން ބުނެފިއެވެ.
ގާތްގަނޑަކަށް 1،700 އެއްހާ މީހުން ދިރިއުޅެމުން އަންނަ އުކުޅަހަކީ ގެސްޓް ހައުސް ވިޔަފާރި ވަރަށް ހަލުވި މިނެއްގައި ކުރިއަރަމުން އަންނަ ރަށެކެވެ. ފަތުރުވެރިކަމުގެ ސިނާއަތަށް 50 އަހަރުވެގެން ބޭއްވި ހަފްލާގައި އެންމެ ކުރިއަރަމުން އަންނަ ގެސްޓް ހައުސް މަންޒިލްގެ ގޯލްޑް އެވޯޑް ވެސް ހޯދާފައިވަނީ އއ. އުކުޅަހުންނެވެ. ފަތުރުވެރިކަން އެންމެ ރަނގަޅު ދުވަސްވަރުގައި ރަށުގެ އާބާދީ 2،000 އާ ގާތްކުރާނެ ކަމަށް ކައުންސިލުން ލަފާކުރާއިރު މި ރަށުގެ ރައްޔިތުންނާއި ރަށަށް ޗުއްޓީ ހޭދަކުރަން އަންނަ ފަތުރުވެރިންނަށް ވެސް އެންމެ ދަތިވާ ކަމަށް ފާހަގަކުރާ އެއް ކަމަކީ ރަށުގެ މަގުތައް ރަނގަޅު ފެންވަރަކަށް ހެދިފައި ނެތުމެވެ.
އުކުޅަހުގެ މަގުހެދުމުގެ މަޝްރޫޢުގެ ދަށުން، 2،678 މީޓަރުގެ 10 މަގެއް ތަރައްޤީ ކުރެވިގެންދާނެ ކަމަށް އެމްޓީސީސީ އިން ބުނެއެވެ.
އެގޮތުން، މި މަގުތަކުގައި ފެން ހިންދާ ނިޒާމެއް ޤާއިމްކުރުމުގައި، ސެޓްލްމަންޓް ޓޭންކެއް ބެހެއްޓުމާއި، ކޭބަލް ޖަންކްޝަން ބޮކްސްއެއް ވަޅުލުމާއި، 4،193 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި. 14،452 އަކަ މީޓަރުގެ ކެރިއެޖްވޭ ސަރަޙައްދެއް ޤާއިމްކުރުމާއި، މަގުބައްތި ހަރުކުރުމާއި، މަގުމަތީ ނިޝާން ކުރެހުމާއި، ކަފިހިހުރަސް ފާހަގަކުރުމާއި، ސްޕީޑް ބްރޭކަރު ހަރުކުރުމާއި، މަގުމަތީ ސަލާމަތީ ސައިން ބޯޑް ހަރުކުރުމުގެ މަސައްކަތް ހިމެނެއެވެ.
މި މަޝްރޫޢުގެ އަގަކީ 59.48 މިލިއަން ރުފިޔާ އެވެ.